Mahabharata · Chapter 4.30

tato duryodhano rājā śrutvā teṣāṃ vacastadā /
ciramantarmanā bhūtvā idamāha sabhāsadaḥ // 1 //

aśakyaṃ khalu kāryasya gatiṃ jñātuṃ hi tatvataḥ /
tasmātsarve parīkṣadhvaṃ kvanu syuḥ pāṇḍavā gatāḥ // 2 //

alpāvaśiṣṭaḥ kālastu gato bhūyiṣṭha eva ca /
teṣāmajñātacaryāyāmasminvarṣe trayodaśe // 3 //

api varṣasya śeṣaṃ te hyatīyuriha pāṇḍavāḥ /
nivṛttasamayāste hi satyavrataparāyaṇāḥ // 4 //

kṣaranta iva nāgendrāḥ sarve hyāśīviṣopamāḥ /
duḥkhādbhaveyuḥ saṃrabdhāḥ kauravānprati te dhruvam // 5 //

vijñātavyā manuṣyendrāstarkayā supraṇītayā /
nipuṇaiścārapuruṣaiḥ prājñairdakṣaiḥ susaṃvṛtaiḥ // 6 //

ajñātasamaye jñātāḥ kṛcchrarūpasamāśritāḥ /
praviśeyurjitakrodhāstāvadeva punarvanam // 7 //

tasmātkṣipraṃ vicinvadhvaṃ yathā cātyantamavyayam /
rājyaṃ nirdvandvamavyagraṃ niḥsapatnaṃ ciraṃ bhavet // 8 //

duryodhanenaivamukte vacane'tīva duḥkhinā /
tataḥ karṇo'bravīdvākyaṃ satyadharmārthasaṃyutam // 9 //

ete punarna gacchantu anye gacchantu bhārata /
śīghravṛttā narā yogyā nipuṇāśchannacāriṇaḥ // 10 //

carantu deśānvividhānsphītāñjanapadākulān /
tatra goṣṭhīṣu ramyāsu siddhā brāhmaṇarūpiṇaḥ // 11 //

parivāheṣu tīrtheṣu vividheṣvākareṣu ca /
anveṣṭavyā manuṣyendra pāṇḍavāśchannacāriṇaḥ // 12 //

nadīkuñjeṣu tīrtheṣu grāmeṣu nagareṣu ca /
āśrameṣu ca ramyeṣu parvateṣu guhāsu ca // 13 //

vijñātavyā manuṣyendra tarkayā suvinūtayā /
vividhaistatparaiḥ samyaṅvipuṇaistajjñasammataiḥ // 14 //

athāgrajānantarajo bhrātuḥ priyahite rataḥ /
jyeṣṭhaṃ duḥśāsanastatra bhrātā bhrātaramabravīt // 15 //

yeṣu naḥ pratyayo rājaṃścāreṣu manujādhipa /
te yāntu dattadeyā vai bhūyastānparimārgitum // 16 //

yadāha karṇo rājendra sarvametadavekṣyatām /
yathoddiṣṭaṃ carāḥ sarve mṛgayantu yatastataḥ // 17 //

ghrāṇaiḥ paśyanti paśavo vedaireva dvijottamāḥ /
cāraiḥ paśyanti rājānaścakṣurbhyāmitare janāḥ // 18 //

yathoktāścārapuruṣā mṛgayantu punaḥpunaḥ /
ete cānye ca bahavo deśāṃśca nagarāṇi ca // 19 //

na hi teṣāṃ gatirvāsaḥ pravṛttirvopalabhyate /
atyantaṃ vā nigūḍhāste pāraṃ vormimato gatāḥ // 20 //

vyālairvā'pi mahāraṇye bhakṣitāḥ śūramāninaḥ /
dvīpaṃ vā paramaṃ prāptā giridurgavaneṣvapi // 21 //

hīnadarpā nirāśāste bhakṣitā vā'pi rākṣasaiḥ /
athavā viṣamaṃ prāpya vinaṣṭāḥ śāśvatīḥ samāḥ // 22 //

tasmānmānasamavyagraṃ kṛtvā'tmānaṃ niyamya ca /
kuru kāryaṃ mahotsāhaṃ manyase yannarādhipa // 23 //