Mahabharata · Chapter 4.26

tathā bhadre kariṣyāmi yathā tvaṃ bhīru bhāṣase /
adṛśyamānastasyāhaṃ tamisrāyāṃ sakuṇḍalam // 1 //

nāgo bilvamivākramya pothayiṣyāmi tacchiraḥ /
alabhyāmicchatastasya kīcakasya durātmanaḥ // 2 //

mayā yaduktaṃ pāñcāli dharmarājasutaṃ prati /
kopādṛte kimanyattu nānuvarteta ko nṛpam // 3 //
vaiśampāyana uvāca /

evamuktavā mahābāhustatra pāṇḍavanandanaḥ /
ardharātre tadotthāya satvavānbhīmavikramaḥ // 4 //

avadātena mṛdunā paṭenācchāditastathā /
draupadīṃ pṛṣṭhataḥ kṛtvā yatrāsīnnartanālayaḥ // 5 //

sa bhīmaḥ prathamaṃ gatvā tamisrāyāmupāviśat /
mṛgaṃ siṃha ivādṛśyaḥ pratyākāṅkṣatsa kīcakam // 6 //

kīcakastu śiraḥsnāto niśāyāṃ samalankṛtaḥ /
saṅketamagamattūrṇaṃ śūnyāgāramapāvṛtam // 7 //

tadeva nartanāgāraṃ pāñcālī yadabhāṣata /
tāṃ manyamānaḥ sankete sairandhrīṃ kāmamohitaḥ // 8 //

praviśya nartanāgāraṃ tatastaṃ puruṣarṣabham /
pūrvāgataṃ bhīmasenaṃ dṛptamapratimajasam // 9 //

śayānaṃ śayane tatra mṛtyuṃ mūḍhaḥ parāmṛśat /
jājvalyamānaṃ kopena kṛṣṇādharṣaṇajena ca // 10 //

ekānte bhīmamāsādya kīcakaḥ kālacoditaḥ /
harṣonmathitacittātmā smayamāno'bhyabhāṣata // 11 //

prahitaṃ te mayā bhadre bahuvittaṃ śucismite /
tvayi tiṣṭhatu tatsarvaṃ yathā'si svayamāgatā // 12 //

akasmānmāṃ praśaṃsanti sadā gṛhagatāḥ striyaḥ /
balavāndarśanīyaśca nānyaste sadṛśaḥ pumān // 13 //

ahaṃ rūpeṇa sampannaḥ snāto guruvibhūṣitaḥ / nityameva priyaḥ strīṇāṃ saubhāgyātpriyadarśanaḥ /
rūpasya tanmayā prāptaṃ phalaṃ kamalalocane // 14 //
bhīma uvāca /

diṣṭyā tvaṃ darśanīyosi diṣṭyā'tmānaṃ praśaṃsasi // 15 //

tvayā'pīdṛgguṇā nārī rūpaśīlasamanvitā / adṛṣṭapūrvā paśya tvaṃ yato jānāsi sūtaja /
drakṣyasi tvaṃ muhūrtena yatheyaṃ strī guṇānvitā // 16 //

uparaṃsyasi kāmācca śīghraṃ tvaṃ spraṣṭumarhasi /
īdṛśastu tvayā sparśaḥ spṛṣṭapūrvo na karhicit // 17 //

sparśaṃ vetsi vidagdhastvaṃ kāmadharmavicakṣaṇaḥ /
strīṇāṃ prītikaro nānyastvatsamaḥ puruṣastviha // 18 //
vaiśampāyana uvāca /

ityuktvā taṃ mahābāhurbhīmo bhīmaparākramaḥ /
sahasotpatya kaunteyaḥ prahasyedamuvāca ha // 19 //

adya tvāṃ bhaginī pāpaṃ kṛṣyamāṇaṃ mayā bhuvi /
drakṣyate'dripratīkāśaṃ siṃheneva mahāgajam // 20 //

nirābādhā tvayi hate sairandhrī vicariṣyati /
sukhameva cariṣyanti sairandhryāḥ patayaḥ sadā // 21 //

tato jagrāha keśeṣu mālyavatsu sugandhiṣu // 22 //

gṛhītvā kīcakaṃ bhīmo virarāja mahābalaḥ /
gṛhītvā grāsakāmastu siṃhaḥ kṣudramṛgaṃ yathā // 23 //

sa keśeṣu parāmṛṣṭo balena balināṃ varaḥ /
ākṣipya keśānvegena bāhvorjagrāha pāṇḍavam // 24 //

bāhuyuddhaṃ tayorāsītkruddhayornarasiṃhayoḥ /
vasante vāsitāhetorbalinornāgayoriva // 25 //

kīcakānāṃ tu mukhyasya narāṇāmuttamasya ca /
vālisugrīvayorbhrātroḥ pureva kapisiṃhayoḥ // 26 //

śārdūlāviva garjantau tārkṣyanāgāvivodyatau /
samayatnau samakrodhau patitau bhīmakīcakau // 27 //

gajāviva madonmattau nadantau patitau kṣitau /
vṛṣabhāviva valmīkaṃ mṛdgantau samavikramau // 28 //

īṣadāgalitaṃ cāpi krodhāccāvāṅmukhaṃ sthitam /
kīcako balavānbhīmaṃ jānubhyāṃ pātayadbhuvi // 29 //

pātito bhīmasenastu kīcakena balīyasā /
utpapātātha vegena daṇḍāhata ivoragaḥ // 30 //

spardhayā ca balonmattau tāvubhau bhīmakīcakau /
niśśabdaṃ paryakarṣetāmanyonyasya vinirjaye // 31 //

tatastadbhavanaśreṣṭhaṃ prākampata tadā bhṛśam /
tau krodhavaśamāpannāvanyonyamabhijaghnatuḥ // 32 //

talābhyāṃ bhīmasenena vakṣasyabhihato balī /
kīcako roṣaraktākṣo na cacāla padātpadam // 33 //

muhūrtamaśakatsoḍhuṃ vegaṃ tasya mahātmanaḥ /
kīcako bhīmasenena paścātpaścādahīyata // 34 //

taṃ hīyamānaṃ vijñāya bhīmaseno mahābalaḥ /
vakṣasyānīya vegena pramamātha vicetasam // 35 //

krodhāviṣṭo viniścasya punaścainaṃ vṛkodaraḥ /
jagrāha jayatāṃśreṣṭhaḥ keśeṣveva bhṛśaṃ tadā // 36 //

gṛhītvā kīcakaṃ bhīmo virarāja mahābalaḥ /
āmiṣārthe gṛhītvaiva śārdūlo mṛgayūthapam // 37 //

punaścātibalastatra kīcako baladarpitaḥ /
vyāyacchanneva durdharṣaḥ pāṇḍavena tarasvinā // 38 //

muṣṭinā bhīmasenena śirasyabhihato bhṛśam /
kīcako vṛttaraktākṣo gatāsurapatadbhuvi // 39 //

āsye pāṇī ca pādau ca śirogrīvāṃ sakuṇḍalām /
kāye praveśayāmāsa mṛditvā'ṅgāni sarvaśaḥ // 40 //

sa taṃ mathitasarvāṅgaṃ māṃsapiṇḍamathākarot // 41 //

tatrāgniṃ svayamujjvālya pāṇisangharṣajaṃ balī /
kaṣṇāyai darśayāmāsa bhīmaseno mahābalaḥ // 42 //

uvāca ca mahātejā draupadīṃ yoṣitāṃ varām / tvayi kāmukamatyantaṃ pāpinaṃ pāradārikam /
paśyainamehi pāñcāli kāmuko'yaṃ mayā hataḥ // 43 //

prārthayante sukeśānte ye tvāṃ śīlasamanvitām . evaṃ svapanti te bhīru śete'yaṃ kīcako yathā /
yastvāmabhyahanadbhadre padā bhūmau nipātya ca // 44 //

evamuktvā mahābāhurgandharveṇa hataṃ tadā /
vijñāpanārthamanyeṣāṃ virarāma mahāhavam // 45 //

tathā sa kīcakaṃ hatvā gatvā roṣasya niṣkṛtim /
āmantrya draupadīṃ paścātkṣipramāyānmahānasam // 46 //

snātvā'nulepanaṃ kṛtvā vyāpūrya ca manoratham /
sukhopaviṣṭaḥ śayane bhīmo bhīmaparākramaḥ // 47 //

tataḥ kṛṣṇā yadā mene gataṃ bhīmaṃ mahānasam . kīcakaṃ ghātayitvā ca draupadī yoṣitāṃ varā /
prahṛṣṭā gatasantrāsā sabhāpālānuvāca ha // 48 //

kīcako nihataḥ śete gandharvaiḥ patibhirmama /
parastrīkāmasantaptaṃ samāgacchanta paśyata // 49 //

tacchrutvā bhāṣitaṃ tasyā nartanāgārarakṣiṇaḥ /
sahasaiva samuttasthurulkāmādāya sarvaśaḥ // 50 //

tasyāstaṃ nihataṃ śrutvā kīcakasya sahodarāḥ / tato gatvā tu tadveśma kīcakaṃ vinipātitam /
gatāsuṃ dadṛśurbhūmau rudhireṇa samukṣitam // 51 //

pārṣṇipāmiśirohīnaṃ dṛṣṭvā te vismitā'bhavan // 52 //

kvāsya grīvā kva caramau kva pāmī kva śiraḥ kva dṛk /
iti sma te parīkṣante gandharveṇa hataṃ tadā // 53 //

amānuṣaṃ kṛtaṃ karma taṃ dṛṣṭvā vinipātitam /
nirīkṣante tataḥ sarve paraṃ vismayamāgatāḥ // 54 //