Mahabharata · Chapter 4.25

tathā bhadre kariṣyāmi yathā tvaṃ bhīru bhāṣase /
adyainaṃ sūdayiṣyāmi kīcakaṃ saha bāndhavaiḥ // 1 //

asyāḥ pradoṣe śarvaryāḥ kuruṣvānena saṃvidam /
duḥkhaṃ śokaṃ ca nirdhūya yājñaseni śucismite // 2 //

yaiṣā nartanaśāleha matsyarājena kāritā /
divātra kanyā nṛtyanti rātrau yānti tathā gṛhaṃ // 3 //

tatrāsti śayanaṃ bhīru dṛḍhāṅgaṃ supratiṣṭhitam / tatrainaṃ darśayiṣyāmi pūrvapretānpitāmahān /
tvaddarśanasamutthena kāmenākulitendriyam // 4 //

sanketaṃ sūtaputrasya kārayasva śubhānane /
yathā pare na paśyeyuḥ kurvantīṃ tena saṃvidam // 5 //

tathā kuruṣva kalyāṇi yathā sannihito bhavet /
tathā kuryāśca sanketaṃ sūtaputrasya saṃvṛtam // 6 //

āvayoḥ sangamaṃ bhīru yathā mārtyo na budhyati /
kīcakasya vināśāya tathā kuru nṛpātmaje // 7 //
vaiśampāyana uvāca /

tatra tau kathayitvā tu bāṣpamutsṛjya duḥkhitau /
rātriśeṣaṃ tamatyugraṃ dhārayāmāsaturhṛdi // 8 //

bhīmena ca pratijñāte kīcakasya vadhe tadā /
draupadī ca sudeṣṇāyāḥ praviveśa punargṛham // 9 //

tasyāṃ rajanyāṃ vyuṣṭāyāṃ prātarutthāya kīcakaḥ /
gatvā rājakulāyaiva draupadīmidamabravīt // 10 //

yattvā'haṃ paśyato rājñaḥ pātayitvā padā'hanam /
na kañcillabhase nāthamabhipannā balīyasā // 11 //

pravādena tu mātsyānāmayaṃ rājeti cocyate /
ahameva hi rājā vai mātsyānāṃ vāhinīpatiḥ // 12 //

sā sukhaṃ pratipadyasva dāso bhīru bhavāmi te /
na hyahaṃ tvāmṛte bhīru ciraṃ jīvitumutsahe // 13 //

ahanyahani suśroṇi śataniṣkaṃ dadāmi te /
dāsīśataṃ ca te dadyāṃ dāsānāmapi cāparam // 14 //

rathāṃścāśvatarīyuktānastu nau bhīru sangamaḥ /
sudāsānāṃ sahasraṃ ca mahiṣāṇāṃ sahasrakam // 15 //

antaḥpurasahasraṃ ca hemakūṭasahasrakam /
tubhyaṃ dāsyāmi sarvāṇi rājārhāṇyambarāṇi ca // 16 //
draupadyuvāca /

etanme vacanaṃ satyaṃ pratipadyasva kīcaka /
na te sakhā vā bhrātā vā jānīyātsangamaṃ mayā // 17 //

anupravādādbhītā'smi gandharvāṇāṃ yaśasvinām . anubodhādganarthaḥ syādayaśaśca mahadbhaveta /
etanme pratijānīhi tato'haṃ vaśagā tava // 18 //
kīcaka uvāca /

evametatkariṣyāmi yathā suśroṇi bhāṣase /
eko'hamāgamiṣyāmi śūnyamāvasathaṃ tava // 19 //

samāgamārthaṃ rambhoru tvayā madanadarpitaḥ /
yathā tvāṃ naiva paśyeyurgandharvāḥ sūryavarcasaḥ // 20 //
draupadyuvāca /

yadetannartanāgāraṃ mātsyarājena kāritam /
divātra kanyā nṛtyanti rātrau yānti svakaṃ gṛhaṃ // 21 //

niśāyāṃ tatra gacchethā gandharvāstanna jānate /
tatra doṣaḥ parihṛto bhaviṣyati na saṃśayaḥ // 22 //

ekastvaṃ nartanāgāraṃ rātrau sanketamāvraja /
tatrāhaṃ bhavitā tubhyaṃ vaśagā nātra saṃśayaḥ // 23 //
kīcaka uvāca /

tathā bhadre kariṣyāmi yathā tvaṃ bhīru vakṣyasi / ekaḥ sannartanāgāramāgamiṣyāmi bhāmini /
samāgamārthaṃ suśroṇi śape ca sukṛtena me // 24 //

yathā tvāṃ nāvabudhyanti gandharvā varavarṇini / satyaṃ te pratijānāmi gandharvebhyo na te bhayam /
alankariṣyāmyadyāhaṃ tvatsamāgamanāya vai // 25 //

vāsāṃsi ca vicitrāṇi manojñāni tavāpi ca /
yathā māṃ na tyajethāstvaṃ tatha raṃsye tvayā saha // 26 //
draupadyuvāca /

tathā cedapyahaṃ sūta darśayiṣyāmi te sukham /
yannānubhūtaṃ bhavatā janmaprabhṛti kīcaka // 27 //
vaiśampāyana uvāca /

tamarthamapi jalpantyā draupadyāḥ kīcakasya ha /
kṣaṇamātraṃ tadabhavanmāsenaiva samaṃ nṛpa // 28 //

kīcako'tha gṛhaṃ gatvā bhṛśaṃ harṣapariplutaḥ /
sairandhrīrūpiṇīṃ mūḍho mṛtyuṃ tāṃ nāvabuddhavān // 29 //

gandhābharaṇamālyeṣu vyāsaktaḥ sa viśeṣataḥ /
alañcakre tadā'tmānaṃ satvaraḥ kāmamohitaḥ // 30 //

tasya tatkurvataḥ karma kālo dīrgha ivābhavat /
anucintayataścāpi tāmevāyatalocanām // 31 //

āsīdabhyadhikā cāpi śrīḥ śriyaṃ pramumukṣataḥ /
nirvāṇakāle dīpasya vartīmiva didhakṣataḥ // 32 //

kṛtasampratyayastasyāḥ kīcakaḥ kāmamohitaḥ /
nājānātpatanaṃ svasya cintayaṃstāṃ śubhānanām // 33 //

tatastu draupadī gatvā bhīmasenaṃ mahānase /
upātiṣṭhata kalyāṇī kauravyaṃ patimantikāt // 34 //

tamuvāca sukeśāntā kīcakasya kṛto mayā /
saṅgamo nartanāgāre yathā'vocaḥ parantapa // 35 //

kālena niyataṃ baddhaḥ kāmena ca balātkṛtaḥ / śūnyaṃ sa nartanāgāramāgamiṣyati kīcakaḥ /
eko niśi mahābāho kīcakaṃ taṃ niṣūdaya // 36 //

taṃ mūtaputraṃ kaunteya kīcakaṃ madadarpitam /
gatvā tvaṃ nartanāgāraṃ nirjīvaṃ kuru pāṇḍava // 37 //

garvitaḥ mūtaputro'sau gandharvānavamanyate /
sa tvaṃ praharatāṃśreṣṭha nālaṃ nāga ivoddhara // 38 //

asraṃ duḥkhābhibhūtāyā mama mārjasva bhārata / bāhuvīryānurūpaṃ ca darśayādya parākramam /
ātmanaścaiva bhadraṃ te kuru mānaṃ kulasya ca // 39 //
bhīma uvāca /

svāgataṃ te varārohe yanmāṃ vedayase priyam /
nahyasya kañcidicchāmi sahāyaṃ varavarṇini // 40 //

sā me prītistvayā'khyātā kīcakasya samāgame /
hatvā hiḍimbaṃ yā prītirmamāsītsā śucismite // 41 //

satyaṃ bhrātṝṃśca putrāṃśca puraskṛtya śapāmi te /
kīcakaṃ nihaniṣyāmi vṛtraṃ devapatiryathā // 42 //

prasahya nihaniṣyāmi keśavaḥ keśinaṃ yathā /
rahasyaṃ vā prakāśaṃ vā sūdayiṣyāmi kīcakam // 43 //

ahaṃ bhadre haniṣyāmi kīcakaṃ madanānvitam /
yastvāṃ kāmābhibhūtātmā durlabhāmabhimanyate // 44 //

atha cedavabudhyanti sūtaputraṃ mayā hatam /
nirmanuṣyaṃ kariṣyāmi matsyānāmidamālayam // 45 //

mayā hatāṃścenmātsyāṃstu dhārtarāṣṭro vibudhyati / duryodhanaṃ tato hatvā sānubandhaṃ sabāndhavam /
kuruṇāmakhilaṃ rājyaṃ pratipatsyāmi bhāmini // 46 //

nāhaṃ śakto'nunayituṃ kuntīputraṃ yudhiṣṭhiram / kāmaṃ satyamupāsīta kuntīputro yudhiṣṭhiraḥ /
kāmamanye hyupāsantu vinītā dharmacāriṇaḥ // 47 //

tvāṃ tu duḥkhamidaṃ prāptāṃ nāhaṃ śaknomyupekṣitum /
nirvṛtā bhava pāñcāli kīcakasya vadhātpunaḥ // 48 //
draupadyuvāca /

kīcakasya vadhaṃ bhīma yadi jānanti nāgarāḥ /
tvayā kṛtaṃ mahābāho nāhaṃ jīvitumutsahe // 49 //

kathaṃ satyācca nāpeyādrājā'yaṃ matkṛte prabho /
niśi gūḍhaṃ tathā bhīma kīcakaṃ taṃ nipātaya // 50 //

anubuddhe hi kaunteyo dharmarājo yudhiṣṭhiraḥ /
punarvanaṃ vrajeddhīmānanujaiḥ parivāritaḥ // 51 //

kaśca dharmaparaṃ jyeṣṭhamativarteta bhārata /
bhīma bhītā'smi sambodhātsādhu mā cāpalaṃ kṛthāḥ // 52 //

yathā na kaściñjānīte sūtaputraṃ tvayā hatam / tathā kuruṣva kauravya balavannarimardana /
adṛśyamānastvantasya bhindhi prāṇānarindama // 53 //