Mahabharata · Chapter 4.27

tatkāle tu samāgamya sarve tatrāsya bāndhavāḥ . ruruduḥ kīcakaṃ dṛṣṭvā parivāryopatasthire // 1 /

sarve saṃhṛṣṭaromāṇaḥ santrastāḥ prekṣya kīcakam /
tathā sambhugnasarvāṅgaṃ kūrmaṃ sthala ivoddhṛtam // 2 //

pothitaṃ bhīmasenena mahendreṇeva dānavam /
kīcakaṃ balasammattaṃ durdharṣaṃ yena kena cit // 3 //

gandharveṇa hataṃ śrutvā kīcakaṃ puruṣarṣabham /
saṃskārayitumicchanto bahirnetuṃ pracakramuḥ // 4 //

apaśyannatha te kṛṣṇāṃ mūtaputrāḥ samāgatāḥ /
adūrādanavadyāṅgīṃ stambhamāliṅgya tiṣṭhatīm // 5 //

samāgateṣu sūteṣu tānuvācopakīcakaḥ /
hasanniva padā'marṣānnirdahanniva cakṣuṣā // 6 //

hanyatāṃ śīghramasatī yatkṛte kīcako hataḥ /
athavā naiva hantavyā dahyatāṃ kāminā saha // 7 //

mṛtasyāpi priyaṃ kāryaṃ sūtaputrasya sarvathā /
iyaṃ hi duṣṭacaritā mama bhrāturamitriṇī // 8 //

yatkṛte maraṇaṃ prāpto neyaṃ jīvitumarhati / saheyaṃ dahyatāṃ sūtā āmantrya ca janādhipam /
hatasyāpi hi gandharvaiḥ kīcakasya priyaṃ bhavet // 9 //
vaiśampāyana uvāca //

tato virāṭamāsādya sūtāḥ prāñjalayo'bruvan /
kīcako'yaṃ hataḥ śete gandharvaiḥ kāmarūpibhiḥ // 10 //

sairandhryā ghātito rātrau taṃ dahema sahānayā /
mānitāḥ smastvayā vīra tadanujñātumarhasi // 11 //

parākramaṃ tu sūtānāṃ jñātvā rājā'nvamanyata /
sairandhryāḥ sūtaputreṇa saha dāhaṃ narādhipaḥ // 12 //

tataste samanujñātāḥ sarve tatrāsya bāndhavāḥ /
ruruduḥ kīcakaṃ dṛṣṭvā parivāryābhitaḥ sthitāḥ // 13 //

āropya kṛṣṇāṃ saha kīcakena nibadhya keśeṣu ca pādayośca /
te cāpi sūtā vacanairavocannuddiśya caināmabhivīkṣya kṛṣṇām // 14 //

yasyāḥ kṛte'yaṃ nihato mahātmā tasmāddhi sā kīcakamārgametu /
avāryasatvena ca kīcakena gatāsunā sundarī svargalokam // 15 //

sā tena kṛṣṇā śayane nibaddhā yaśasvinī caiva manasvinī ca / anāryasattvena mahāryasattvā gatāsunā sā praruroda kṛṣṇā /
vilambamānā vivaśā hi duṣṭaistatraiva paryaṅkavare śubhāṅgī // 16 //

hriyamāṇā'tha suśroṇī sūtaputrairaninditā /
prākrośannāthamicchantī kṛṣṇā nāthavatī satī // 17 //

mṛtena saha baddhāṅgī nirāśā jīvite tadā /
śmaśānābhimukhaṃ nītā kareṇuriva rauti sā // 18 //
draupadyuvāca /

jayo jayeśo vijayo jayatseno jayadbalaḥ /
ta me vācaṃ vijānantu sūtaputrā nayanti mām // 19 //

yeṣāṃ dundubhinirghoṣo jyāghoṣaḥ śrūyate mahān /
te me vācaṃ vijānantu sūtaputrā nayanti mām // 20 //

yeṣāṃ jyātalanirghoṣo visphūrjitamivāśaneḥ /
aśrūyata mahānyuddhe bhīmaghopastarasvinām // 21 //

rathaghopaśca balavāngandharvāṇāṃ tarasvinām /
te me vācaṃ bijānantu sūtaputrā nayanti mām // 22 //

yeṣāṃ vīryamatulyaṃ tu śakrasyeva balaṃ yaśaḥ /
rājasiṃhā ivāgryāste māṃ jānantu suduḥkhitāṃ // 23 //

ityasyāḥ kṛpaṇā vācaḥ kṛṣṇāyāḥ paridevitāḥ /
śrutvaivābhyutthito bhīmaḥ śayanādavicārayan // 24 //
bhīma uvāca /

ahaṃ sairandhri te vācaḥ śṛṇomi tava bhāṣitāḥ /
tasmātte sūtaputrebhyo na bhayaṃ jātu vidyate // 25 //
vaiśampāyana uvāca /

ityuktvā sa mahābāhurvijajṛmbhe jighāṃsayā // 26 //

tataḥ sa vyāyataṃ baddhvā vastraṃ vipariveṣṭya ca /
advāreṇābhyavaskandya nirjagāma bahistadā // 27 //

sa laṅghayitvā prākāramāruhya tarasā drumam /
śmaśānābhimukhaḥ prāyādyatra te kīcakā gatāḥ // 28 //

sa laṅghayitvā prākāraṃ niḥsṛtya ca purottamāt /
javenotpatito bhīmaḥ sūtānāmagratastadā // 29 //

citāsamīpaṃ gatvā sa tatrāpaśyanmahābalaḥ /
tālamātraṃ mahāskandhamūrdhvaśuṣkaṃ vanaspatim // 30 //

taṃ nāgavadupakramya bāhubhyāṃ parirabhya ca /
vṛkṣamutpāṭayāmāsa bhīmo bhīmaparākramaḥ // 31 //

tato vṛkṣaṃ daśavyāmaṃ niṣpatramakarottadā // 32 //

taṃ mahākāyamudyamya bhrāmayitvā ca vegitaḥ /
pragṛhyābhyapatatsūtāndaṇḍapāṇirivāntakaḥ // 33 //

ūruvegena tasyātha nyagrodhāśvatthakiṃśukāḥ /
bhūmau nipatitā vṛkṣāḥ sambhagnāstatra śerate // 34 //

taṃ siṃhamiva sankruddhaṃ dṛṣṭvā gandharvamāgatam /
vitresuśca tadā sūtā vipādabhayapīḍitāḥ // 35 //

tamantakamiva kruddhaṃ gandharvabhayaśaṅkitāḥ / didhakṣantastathā jyeṣṭhaṃ bhrātaraṃ copakīcakāḥ /
parasparamathocuste viṣādabhayamohitāḥ // 36 //

gandharvo balavāneti kruddha udyamya pādapam / prabuddhāḥ sumahābhāgā gandharvāḥ sūryavarcasaḥ /
sairandhrī mucyatāṃ śīghraṃ bhayaṃ no mahadāgatam // 37 //
vaiśampāyana uvāca /

te dṛṣṭvā'tha samāviddhaṃ bhīmasenena pādapam /
vimucya draupadīṃ trastāḥ prādravannagaraṃ prati // 38 //

dravatastāṃśca samprekṣya sa vajrī dānavāniva /
atha bhīmaḥ samutpatya dravatāṃ purato'bhavat // 39 //

te taṃ dṛṣṭvā bhayodvignā niśceṣṭāḥ samavasthitāḥ // 40 //

dṛṣṭvā tāñśatasaṅkhyakānsa vajrī dānavāniva / ekenaiva prahāreṇa daśa sapta ca viṃśatim /
aṣṭādaśa ca pañcāśañjaghāna sa vṛkodaraḥ // 41 //

śataṃ pañcādhikaṃ bhīmaḥ prāhiṇodyamasādanam / vṛkṣeṇaikena rājendra prabhañjanasuto balī /
vāyuvegasamaḥ śrīmānsarvānsūtānaśeṣataḥ // 42 //

tānnihatya mahābāhurbhīmaseno mahābalaḥ /
āśvāsayattadā kṛṣṇāṃ pratimucya ca bandhanāt // 43 //

uvāca ślakṣṇayā vācā pāñcālīṃ bharatarṣabhaḥ . aśrupūrṇamukhīṃ bhītāmuddharansa vṛkodaraḥ // 44 // 4-27-45a[ mā khidastvaṃ yājñaseni pātivratyavrate sthitā / pātivratye sthitā nārī vrataṃ rakṣetsadā'tmanaḥ // 45 //

purā strī devarātasya patiprītā śiromaṇiḥ /
kadācidbhartṛrūpeṇa rakṣasā'pahṛtā satī // 46 //

kasyacitsarasastīre tāṃ niveśya sa rākṣasaḥ /
tadbhartṛrūpaṃ santyajya rakṣo bhūtvā sudāruṇam // 47 //

sāmnā dānena bhedena sā yadā nānvamanyata /
tadā tāṃ pātayitvā sa maithunāyopacakrame // 48 //

tataḥ sā dhairyamāsthāya vivaraṃ ta dadau tadā /
tataḥ sa khaṅgamutkṛṣya bhīṣayāmāsa tāṃ satīm // 49 //

sā'pi tyaktabhayā sādhvī prāṇatyāge suniścitā /
pratijñāmakarotkṛṣṇe pātivratyaparāyaṇā // 50 //

ārādhito yadi mayā bhartā me daivataṃ mahat / karmaṇā manasā vācā guravastoṣitā mayā /
tena satyena yonirme bhavatvadya śilā dṛḍhā // 51 //

evaṃ tayā pratijñāte tadyoniḥ sā śilā'bhavat /
antarā nābhijānvoryattatsarvaṃ ca śilā'bhavat // 52 //

tataḥ sa khaṅgamuddhṛtya vegenāsyāḥ śiro'harat // 53 //

jayā nāma sakhī sā'bhūtpārvatyā nakhamāṃsavat /
tasmātpativratāyāśca duḥkhamalpaṃ sukhaṃ bahu // ] // 54 //

evaṃ te bhīru vadhyante ye tvāṃ hiṃsanti mānavāḥ /
gaccha tvaṃ nagaraṃ kṛṣṇe na bhayaṃ vidyate tava // 55 //

anyena tvaṃ pathā śīghraṃ sudeṣṇāyā niveśanam / anyenāhaṃ gamiṣyāmi virāṭasya mahānasam /
yathā nau nāvabudhyeranrātrāvevaṃ vyavasthitau // 56 //
vaiśampāyana uvāca /

sā'gacchannagaraṃ kṛṣṇā bhīmenāśvāsitā satī // 57 // kṛtakṛtyā sudeṣṇāyā bhavanaṃ śubhalakṣaṇā /

śacīva nahuṣe śapte praviveśa triviṣṭapam // 58 // bhīmo'pyamitavīryastu balavānarimardanaḥ /

sarvāṃstānkīcakāṃstatra hatvā dharmātmajānujaḥ // 59 // niḥśeṣaṃ kīcakānhatvā rāmo rātricarāniva /

jitaśatruradīnātmā praviveśa puraṃ tataḥ // 60 // pañcādhikaṃ śataṃ tatra nihataṃ tena bhārata /

mahāvanamiva chinnaṃ śiśye vigalitadrumam // 61 // evaṃ te nihatā rājañśataṃ pañcopakīcakāḥ /

sa ca senāpatiḥ sūta ityetatsūtaṣaṭśatam // 62 // na gandharvabhayākiñcidvaktuṃ kīcakabāndhavāḥ /

aśaknuvantastāṃ tatra bhayādapyabhivīkṣitum // 63 // virāṭanagare cāpi sarve mātsyāḥ samāgatāḥ /

kālyaṃ pañcaśataṃ caitānapaśyansārathīnhatān // 64 // taddṛṣṭvā mahadāścaryaṃ narā nāryaśca nāgarāḥ /

vismayaṃ paramaṃ gatvā nocuḥ kiñcana bhārata // 65 //