Mahabharata · Chapter 4.19

akīrtayata suśroṇī dharmaṃ śakraṃ divākaram /
mārutaṃ cāśvinau devau kuberaṃ varuṇaṃ yamam // 1 //

rudramagniṃ bhagaṃ viṣṇuṃ skandaṃ pūṣaṇameva ca /
sāvitrīsahitaṃ cāpi brahmāṇaṃ paryakīrtayat // 2 //

ityevaṃ mṛgaśavākṣī suśroṇī dharmacāriṇī /
upātiṣṭhata sā sūryaṃ muhūrtamabalā tadā // 3 //

tadasyāstanumadhyāyāḥ sarvaṃ sūryo'vabuddhavān /
antarhitaṃ tatastasyā rakṣo rakṣārthamādiśat // 4 //

taccaināṃ nājahāttatra sarvāvasthāsvaninditām // 5 //

pratasthe sā sukeśāntā tvaramāṇā punaḥpunaḥ /
vilambamānā vivaśā kīcakasya niveśanam // 6 //

tāṃ mṛgīmiva vitrastāṃ dṛṣṭvā kṛṣṇāṃ samāgatām /
utpapātāsanāttūrṇaṃ nāvaṃ labdhveva pāragaḥ // 7 //

ślakṣṇaṃ covāca vākyaṃ sa kīcakaḥ kāmamūrcchitaḥ /
svāgataṃ te sukeśānte suvyuṣṭā rajanī mama // 8 //

svāminī tvamanuprāptā cirasya bhavanaṃ śubhe /
kuruṣva ca mayi prītiṃ vaśaṃ copānayasva mām // 9 //

pratigṛhṇīṣva me bhogāṃstvadarthamupakalpitān / sarvaratnamayīṃ mālāṃ kuṇḍale ca hiraṇmaye // 10 /

vāsāṃsi candanaṃ mālyaṃ dhūpaśuddhāṃ ca vāruṇīm / pratigṛhṇīṣva bhadraṃ te vihara tvaṃ yathecchasi /
prītyā me kuru madmākṣi prasādaṃ priyadarśane // 11 //

svāstīrṇamasti śayanaṃ sitasūkṣmottaracchadam /
atrāruhya mayā sārdhaṃ pibemāṃ varavāruṇīm // 12 //

bhajasva māṃ viśālākṣi bhartā te sadṛśosmyaham /
upasarpa varārohe merumarkaprabhā yathā // 13 //
vaiśampāyana uvāca /

sa mūḍhaḥ kīcakastatra prāptāṃ rājīvalocanām /
abravīddraupadīṃ dṛṣṭvā durātmā hyātmasammataḥ // 14 //

kīcakenaivamuktā sā draupadī varavarṇinī /
abravīttamanācāraṃ nedṛśaṃ vaktumarhasi // 15 //

nāhaṃ śakyā tvayā spraṣṭuṃ śvapaceneva brāhmaṇī /
gantumicchasi durbuddhe gatiṃ durgatarāntarām // 16 //

yatra gacchanti bahavaḥ paradārābhimarśakāḥ /
narāḥ sambhinnamaryādāḥ kīṭavaccāśubhāśrayāḥ // 17 //

apraiṣīnmāṃ surāhārīṃ sudeṣṇā tvanniveśanam /
tasyai nayiṣye madirāṃ bhaginī tṛṣitā tava // 18 //

pipāsitā ca kaikeyī tūrṇaṃ māmādiśattataḥ /
dīyatāṃ me surā śīghraṃ sūtaputra vrajāmyaham // 19 //
kīcaka uvāca /

anyā bhadre hariṣyanti rājaputryāḥ surāmimām /
kiṃ tvaṃ yāsyasi kalyāṇi madarthaṃ tvamihāgatā // 20 //
vaiśampāyana uvāca /

ityuktvā dakṣiṇe pāṇau sūtaputraḥ parāmṛśat / sā gṛhītā vidhūnvantī bhūmau nikṣipya bhājanam /
sabhāṃ śaraṇamādhāvadyatra rājā yudhiṣṭhiraḥ // 21 //

tāṃ kīcakaḥ pradhāvantīṃ keśapakṣe parāmṛśat /
pātayitvā tu tāṃ bhūmau sūtaputraḥ padā'vadhīt // 22 //

sabhāyāṃ paśyato rājño virāṭasya mahātmanaḥ /
brāhmaṇānāṃ ca vṛddhānāṃ kṣatriyāṇāṃ ca paśyatāṃ // 23 //

tasyāḥ pādābhitaptāyā mukhādrudhiramāsravat // 24 //

tato divākareṇāśu rākṣasaḥ sanniyojitaḥ /
sa kīcakamapovāha vātavegena bhārata // 25 //

sa papāta tadā bhūmau rakṣobalasamīritaḥ /
vighūrṇamāno niśceṣṭaśchinnamūla iva drumaḥ // 26 //

tāṃ dṛṣṭvā tatra te sabhyā hāhābhūtāḥ samantataḥ / na yuktaṃ sūtaputreti kīcaketi ca te'vadan /
kimiyaṃ vadhyate bālā kṛpaṇā cāpyabāndhavā // 27 //

tasyāmāsanhi te pārthāḥ sabhāyāṃ bhrātarastathā /
amṛṣyamāṇāḥ kṛṣṇāyāḥ kīcakena padā vadhaṃ // 28 //

tāṃ dṛṣṭvā bhīmasenasya krodhādāsramavartata / dhūmocchvāsaḥ samabhavannetre cocchritapakṣmaṇī /
sasvedā bhrukuṭī cogrā lalāṭe samavartata // 29 //

tasya bhīmo vadhaprepsuḥ kīcakasya durātmanaḥ /
dantairdantāṃstadā ropānniṣpipeṣa mahāmanāḥ // 30 //

bhūyaḥ sañcaritaḥ kruddhaḥ sahasotthāya cāsanāt /
niraikṣata drumaṃ dīrghaṃ rājānaṃ cāpyavaikṣata // 31 //

vadhamākāṅkṣamāṇaṃ taṃ kīcakasya durātmanaḥ /
ākāreṇaiva bhīmaṃ sa pratyapedhadyudhiṣṭhiraḥ // 32 //

tasya rājā śanaiḥ sañjñāṃ kuntīputro yudhiṣṭhiraḥ /
cakāra bhīmasenasya roṣāviṣṭasya dhīmataḥ // 33 //

pratyākhyānaṃ tadā cāha kaṅko nāma yudhiṣṭhiraḥ // 34 //

sūda mā sāhasaṃ kārṣīḥ phalito'yaṃ vanaspatiḥ /
nātra śuṣkāṇi kāṣṭhāni santi yāni ca kāni ca // 35 //

yadi te dārukṛtyaṃ syānniṣkramya nagarādbahiḥ /
samūlaṃ śātayervṛkṣaṃ śramaste na bhaviṣyati // 36 //

yasya cārdrasya vṛkṣasya śītacchāyāṃ samāśrayet /
na tasya parṇe druhyeta pūrvavṛttamanusmaran // 37 //

na krodhakālasamayaḥ sūda mā cāpalaṃ kṛthāḥ /
apūrṇo'yaṃ dvipakṣono nedaṃ balavatāṃ bahu // 38 //

athāṅguṣṭhenāvamṛdgādaṅguṣṭhaṃ tatra dharmarāṭ /
prabodhanabhayādrājño bhīmaṃ taṃ pratyaṣedhayat // 39 //

bhīmasenastu tadvākyaṃ śrutvā parapurañjayaḥ / sahasotpatitaṃ krodhaṃ nyayacchaddhṛtimānbalāt /
iṅgitajñaḥ sa tu bhrātustūṣṇīmāsīdvṛkodaraḥ // 40 //

bhīmasya ca samārambhaṃ dṛṣṭvā rājño'sya ceṣṭitam /
draupadī cādhikaṃ krodhātprārudatsā punaḥpunaḥ // 41 //

kīcakenānugamanātkṛṣṇā tāmrāyatekṣaṇā /
sabhādvāramupagamya rudantī vākyamabravīt // 42 //

avekṣamāṇā suśroṇī patīṃstāndīnacetasaḥ / ākāraṃ parirakṣantī pratijñāṃ dharmasaṃyutām /
dahyamāneva raudreṇa cakṣuṣā drupadātmajā // 43 //

prajārakṣaṇaśīlānāṃ rājñāṃ hyamitatejasām /
kāryā'nupālanaṃ nityaṃ dharme satye ca tiṣṭhatām // 44 //

svaprajāyāṃ prajāyāṃ ca viśeṣaṃ nādhigacchatām /
priyeṣvapi ca vadhyeṣu samatvaṃ ye samāśritāḥ // 45 //

vivādeṣu pravṛtteṣu samaṃ kāryānudarśinā /
rājñā dharmāsanasthena jitau lokāvubhāvapi // 46 //

rājandharmāsanastho hi rakṣa māṃ tvamanāgasam // 47 //

ahaṃ tvanaparādhyantī kīcakena durātmanā /
paśyataste mahārāja hatā pādena dāsivāt // 48 //

tvatsamakṣaṃ nṛpaśreṣṭha niṣpiṣṭā vasudhātale /
anāgasaṃ kṛpārhāṃ māṃ striyaṃ tvaṃ paripālaya // 49 //

rakṣa māṃ kīcakādbhītāṃ dharmaṃ rakṣa nareśvara /
matsyādhipa prajā rakṣa pitā putrānivaurasān // 50 //

yastvadharmeṇa kāryāṇi mohātmā kurute nṛpaḥ /
acirāttaṃ durātmānaṃ vaśe kurvanti śatravaḥ // 51 //

matsyānāṃ kulajastvaṃ hi teṣāṃ satyaṃ parāyaṇam /
tvaṃ kilaivaṃvidho jātaḥ kule dharmaparāyaṇe // 52 //

atastvāhamabhikrande śaraṇārthaṃ narādhipa /
trāhi māmadya rājendra kīcakātpāpapūruṣāt // 53 //

anāthāmiha māṃ jñātvā kīcakaḥ puruṣādhamaḥ /
praharatyeva nīcātmā na tu dharmamavekṣate // 54 //

akāryāṇāmanārambhātkāryāṇāmanupālanāt /
prajāsu ye suvṛttāste svargamāyānti bhūmipāḥ // 55 //

kāryākāryaviśeṣajñāḥ kāmakāreṇa pārthivāḥ /
prajāsu kilbiṣaṃ kṛtvā narakaṃ yāntyadhomukhāḥ // 56 //

naiva yajñairna vā dānairna gurorupasevanāt /
prāpnuvanti tathā dharmaṃ yathā kāryānupālanāt // 57 //

api cedaṃ purā brahmā provācendrāya pṛcchate /
dvandvaṃ kāryamakāryaṃ ca loke cāsītparaṃ yathā // 58 //

dharmādharmau punardvandvaṃ viniyuktamathāpi vā /
kriyāṇāmakriyāṇāṃ ca prāpaṇe puṇyapāpayoḥ // 59 //

prajāyāṃ sṛjyamānāyāṃ purā hyetadudāhṛtam /
etadvo mānuṣāḥ samyakkāryaṃ dvandvatrayaṃ bhuvi // 60 //

asminsunīte durnīte labhate karmajaṃ phalam /
kalyāṇakārī kalyāṇaṃ pāpakārī ca pāpakam // 61 //

tena gacchati saṃsargaṃ svargāya narakāya vā / sukṛtaṃ duṣkṛtaṃ vā'pi kṛtvā mohena mānavaḥ /
paścāttāpena tapyeta svabuddhyā maraṇaṃ gataḥ // 62 //

evamuktvā paraṃ vākyaṃ visasarja śatakratum /
śakropyāpṛcchya brahmāṇaṃ devarājyamapālayat // 63 //

yathoktaṃ devarājena brahmaṇā parameṣṭhinā /
tathā tvamapi rājendra kāryākārye sthiro bhava // 64 //