Mahabharata · Chapter 4.18

pratyākhyātaśca pāñcālyā kīcakaḥ kāmamohitaḥ /
praviśya rājabhavanaṃ bhaginyā agrataḥ sthitaḥ // 1 //

sobhivīkṣya sukeśāntāṃ sudeṣṇāṃ bhaginīṃ priyām /
amaryādena kāmena ghoreṇābhipariplutaḥ // 2 //

sa tu mūrdhryañjaliṃ kṛtvā bhaginyāścaraṇāvubhau /
sammohābhihatastūrṇaṃ vātoddhṛta ivārṇavaḥ // 3 //

sa provāca suduḥkhārto bhaginīṃ niśvasanmuhuḥ /
avyaktamṛdunā sāmnā śuṣyatā ca punaḥpunaḥ // 4 //

yathā sudeṣṇe sairandhryā sangaccheyaṃ sakāmayā /
tathā śīghraṃ kuruṣvādya mā'haṃ prāṇānprahāsiṣam // 5 //

yadīyamanavadyāṅgī na māmadyāpi kāṅkṣate /
cetasā'bhiprasannena gatosmi yamasādanam // 6 //
vaiśampāyana uvāca /

tamuvāca pariṣvajya sudeṣṇā bhrātaraṃ priyam /
bhrāturjīvitarakṣārthaṃ samāśvāsyāsitekṣaṇā // 7 //

śaraṇāgateyaṃ suśroṇī mayā dattābhayā ca sā /
śubhācārā ca bhadraṃ te naināṃ vaktumihotsahe // 8 //

eṣā hi śakyā nānyena spraṣṭuṃ pāpena cetasā /
gandharvāḥ kila pañcemāṃ rakṣanti ramayanti ca // 9 //

evameṣā mamācaṣṭe tathā prathamasangame / tathaiva gajanāsorūḥ satyamāha mamāntike /
te hi kruddhā mahātmāno nāśayeyurhi jīvitam // 10 //

rājā caiva samīkṣyaināṃ sammohaṃ gatavāniha /
mayā ca satyavacanairanunīto mahīpatiḥ // 11 //

sopyenāmaniśaṃ dṛṣṭvā manasaivābhyanandata / bhayādgandharvamukhyānāṃ jīvitasyopaghātinām /
manasā'pi tatastvenāṃ na cintayati pārthivaḥ // 12 //

te hi kruddhā mahātmāno garuḍānilatejasaḥ /
daheyurapi lokāṃstrīnyugānteṣviva bhāskaraḥ // 13 //

sainandhryā hyetadākhyātaṃ mama teṣāṃ mahadbalam /
tava cāhamidaṃ guhyaṃ snehādvakṣyāmi bandhuvat // 14 //

mā gamiṣyasi vai kṛcchrāṃ gatiṃ paramadurgamām /
balinaste rujaṃ kuryuḥ kulasya ca dhanasya ca // 15 //

tasmānnāsyāṃ manaḥ kartuṃ yadi prāṇā priyāstava /
na cintayethā māgāstvaṃ matpriyaṃ ca yadīcchasi // 16 //
vaiśampāyana uvāca /

evamuktastu duṣṭātmā bhaginīṃ kīcako'bravīt / gandharvāṇāṃ śataṃ vā'pi sahasramayutāni vā /
ahameko vadhiṣyāmi gandharvānpañca kiṃ punaḥ // 17 //

na ca tvamabhijānīṣe strīṇāṃ guhyamanuttamam /
putraṃ vā kila pautraṃ vā bhrātaraṃ vā manasvinam // 18 //

rahasīha naraṃ dṛṣṭvā nānāgandhavibhūṣitam /
yonirutsvidyate strīṇāṃ satīnāmapi ca śrutam // 19 //

māṃ nirīkṣyānuliptāṅgaṃ sarvābharaṇabhūṣitam / vaśameṣyati sairandhrī manmathenābhipīḍitā /
sā tvaṃ dṛṣṭvā brūhi caināṃ mama ceñjīvitaṃ priyaṃ // 20 //
vaiśampāyana uvāca /

evamuktā sudeṣṇā tu śokenābhiprapīḍitā /
aho duḥkhamaho kṛcchramaho pāpamiti smaha // 21 //

prārudadbhṛśaduḥkhārtā vipākaṃ tasya vīkṣya sā /
pātāleṣu patatyeṣa vilapanbaḍavāmukhe // 22 //

tvatkṛte vinaśiṣyanti bhrātaraḥ suhṛdaśca me /
kinnu śakyaṃ mayā kartuṃ yattvamevamabhiplutaḥ // 23 //

na ca śreyo'bhijānīṣe kāmamevānuvartase / dhruvaṃ gatāyustvaṃ pāpa yadevaṃ kāmamohitaḥ /
akartavye hi māṃ pāpe niyunaṅkṣi narādhama // 24 //

api caitatpurā proktaṃ nipuṇairmanujottamaiḥ /
ekastu kurute pāpaṃ svajātistena hanyate // 25 //

gatastvaṃ dharmarājasya viṣayaṃ nātra saṃśayaḥ /
adūṣitamidaṃ sarvaṃ svajanaṃ ghātayiṣyasi // 26 //

etattu me duḥkhataraṃ yenāhaṃ bhrātṛsauhṛdāt /
viditārthā kariṣyāmi tuṣṭo bhava kulakṣaye // 27 //

gaccha śīghramitastvaṃ hi svameva bhavanaṃ śubham /
kiñcitkāryaṃ samuddiśya surāmannaṃ ca kāraya // 28 //

kṛte cānne surāyāṃ ca preṣayiṣyasi me punaḥ /
tāmahaṃ preṣayiṣyāmi madhvannārthaṃ tavāntikam // 29 //

tataḥ sampreṣitāmenāṃ vijane niravagrahām /
sāntvayethā yathānyāyaṃ yadi sāma sahiṣyati // 30 //

sadyaḥ kṛtamidaṃ sarvaṃ śeṣamatrānucintaya // 31 //
vaiśampāyana uvāca /

sudeṣṇayaivamuktastu kīcakaḥ kālacoditaḥ /
tvaramāṇaḥ pracakrāma svagṛhaṃ rājaveśmanaḥ // 32 //

āgamya ca gṛhaṃ ramyaṃ surāmannaṃ cakāra ha /
ajaiḍakaṃ ca sukṛtaṃ bahu coccāvacānmṛgān // 33 //

bhakṣāṃśca vividhākārānbahūṃścoccāvacāṃstadā /
kārayāmāsa kuśalairannapānaiḥ susaṃskṛtam // 34 //

tvarāvānkālapāśena kaṇṭhe baddhaḥ paśuryathā /
nāvabudhyata mūḍhātmā maraṇaṃ samupasthitam // 35 //

ānītāyāṃ surāyāṃ tu kṛte cānne susaṃskṛte /
kīcakaḥ punarāgamya sudeṣṇāṃ vākyamabravīt // 36 //

madhu māṃsaṃ ca bahudhā bhakṣyāśca bahudhā kṛtāḥ /
sudeṣṇe brūhi sairandhrīṃ yathā sā me gṛhaṃ vrajet // 37 //

kenacittvadya kāryeṇa tvara śīghraṃ mama priyam / ahaṃ hi śaraṇaṃ devaṃ pratipadye vṛṣadhvajam /
samāgamaṃ me sairandhryā maraṇaṃ vā diśeti vai // 38 /
vaiśampāyana uvāca /

sā tamāha viniḥśvasya pratigaccha svakaṃ gṛham /
eṣā'hamapi sairandhrīṃ surārthe tūrṇamādiśe // 39 //

evamuktastu pāpātmā kīcakastvaritaḥ punaḥ /
svagṛhaṃ prāviśattūrṇaṃ sairandhrīgatamānasaḥ // 40 //

kīcakaṃ tu gataṃ jñātvā tvaramāṇaṃ svakaṃ gṛham /
sairandhrīṃ tata āhūya sadeṣṇā vākyamabravīt // 41 //

gaccha sairandhri matprītyai kīcakasya niveśanam /
surāmānaya suśroṇi tṛṣitā'haṃ vilāsini // 42 //
vaiśampāyana uvāca /

sudeṣṇayaivamuktā sā niḥśvasantī nṛpātmajā /
abravīcchokasantaptā nāhaṃ tatra vrajāmi vaiḥ // 43 //

sūtaputro hi māṃ bhadre kāmātmā cābhimanyate . na gaccheyamahaṃ tasya rājaputri niveśanam /
tvameva bhadre jānāsi yathā sa nirapatrapaḥ // 44 //

samayaśca kṛto bhadre yathā prathamasangame /
tathā nivasamānāyāṃ yathā'haṃ nānyacāriṇī // 45 //

kīcakaśca sukeśānte mūḍho madanagarvitaḥ . sa māmiha gatāṃ dṛṣṭvā vyavasyati nirākṛtim /
kathaṃ nu vai tatra gatāṃ marṣayenmāmabāndhavām // 46 //

bahvyaḥ santi tava preṣyā rājaputri vaśānugāḥ /
anyāṃ preṣaya kaikeyi saṃrakṣyā'hamiha tvayā // 47 //

kīcakasyālayaṃ devi na yāmi bhayakampitā /
yadyadanyacca me karma karomi ca suduṣkaram // 48 //

evamuktā tu pāñcālyā daivayogena kaikayī /
tāṃ virāṭasya māhiṣī kruddhā bhūyo'nvaśāsata // 49 //

kīcakaṃ caiva gaccha tvaṃ balātkāre coditā /
nāsti me'nyā tvayā tulyā sā tvaṃ śīghrataraṃ vraja // 50 //

avaśyaṃ tveva gantavyaṃ kimarthaṃ māṃ vivakṣasi /
śīghraṃ gaccha tvarasveti matprītivaśamācara // 51 //

na hīdṛśo mama bhrātā kiṃ tvaṃ samabhiśaṅkase /
uktvā caināṃ balāccaiva viniyujya prabhutvataḥ // 52 //

bhājanaṃ pradadau cāsyai sapidhānaṃ hiraṇmayam /
yā sujātā sugandhā ca tāmānaya surāmiti // 53 //

sā śaṅkamānā rudatī vepantī drupadātmajā /
daivatebhyo namaskṛtvā śvaśurebhyastathā'bravīt // 54 //

yathā'hamanyaṃ pārthebhyo nābhijānāpi mānavam /
tena satyena māṃ dṛṣṭvā kīcako mā vaśaṃ nayet // 55 //

yathā'haṃ pāṇḍuputrebhyaḥ pañcabhyo nānyagāminī /
tena satyena māṃ dṛṣṭvā kīcako mā vaśaṃ nayet // 56 //