Mahabharata · Chapter 4.17

evamuktā'navadyāṅgī kīcakena durātmanā /
draupadī tamuvācedaṃ sairandhrīveṣadhāriṇī // 1 //

aprārthanīyāmihaṃ māṃ sūtaputrābhimanyase /
nihīnavarṇāṃ sairendhrīṃ bībhatsāṃ keśakāriṇīm // 2 //

paradārā'smi bhadraṃ te na yuktaṃ tava sāmpratam /
dayitāḥ prāṇināṃ dārā dharmaṃ samanucintaya // 3 //

paradāre na te buddhirjātu kāryā kathañcana /
vivarjanaṃ hyakāryāṇāmetatsupuruṣavratam // 4 //

mithyābhigṛdhno hi naraḥ pāpātmā mohamāsthitaḥ /
ayaśaḥ prāpnuyāddhoraṃ mahadvā prāpnuyādbhayam // 5 //
vaiśampāyana uvāca /

evamuktastu sairandhryā kīcakaḥ kāmamohitaḥ /
jānannapi sudurbuddhiḥ paradārābhimarśane // 6 //

doṣānbahūnprāṇaharānsarvalokavigarhitān /
provācedaṃ sudurbuddhirdraupadīmajitendriyaḥ // 7 //

nārhasyevaṃ varārohe pratyākhyātuṃ varānane /
māṃ manmathasamāviṣṭaṃ tvatkṛte cāruhāsini // 8 //

pratyākhyāya ca māṃ bhīru vaśagaṃ priyavādinam /
nūnaṃ tvamasitāpāṅgi paścāttāpaṃ kariṣyasi // 9 //

ahaṃ hi subhru rājyasya kṛtsnasyāsya sumadhyame /
prabhurvāsayitā caiva vīrye cāpratimaḥ kṣitau // 10 //

pṛthivyāṃ matsamo nāsti kaścidanyaḥ pumāniha /
rūpayauvanasaubhāgyairbhogaiścānuttamaiḥ śubhaiḥ // 11 //

sarvakāmasamṛddheṣu bhogeṣvanupameṣviha /
bhoktavyeṣu ca kalyāṇi kasmāddāsye ratā hyasi // 12 //

mayā dattamidaṃ rājyaṃ svāminyasi śubhānane /
bhajasva māṃ varārohe bhuṅkṣvaṃ bhogānanuttamān // 13 //

evamuktā tu sā sādhvī kīcakenāśubhaṃ vacaḥ /
kīcakaṃ pratyuvācedaṃ garhayantyasya tadvacaḥ // 14 //
sairandhryuvāca /

mā sūtaputra muhyasva mā'dya tyakṣyasva jīvitam /
jānīhi pañcabhirghorairnityaṃ māmabhirakṣitām // 15 //

na cāpyahaṃ tvayā labhyā gandharvāḥ patayo mama /
te tvāṃ nihanyuḥ kupitāḥ sādhvalaṃ mā vyanīnaśaḥ // 16 //

aśakyarūpaṃ puruṣairadhvānaṃ gantumicchasi // 17 //

yathā niścetano bālaḥ kūlasthaḥ kūlamuttaram /
tartumicchati mandātmā tathā tvaṃ kartumicchasi // 18 //

antarmahīṃ vā yadi vordhvamutpateḥ samudrapāraṃ yadi vā pradhāvasi /
tathāpi teṣāṃ na vimokṣamarhasi pramāthino devasutā hi khecarāḥ // 19 //

tvaṃ kālarātrīmiva kaścidāturaḥ kiṃ māṃ dṛḍhaṃ pārthayase'dya kīcaka /
kiṃ māturaṅke śayito yathā śiśuścandraṃ jighṛkṣuriva manyase hi mām // 20 //

teṣāṃ priyāṃ prārthayato na te bhuvi gatvā divaṃ vā śaraṇaṃ bhaviṣyati /
na vartate kīcaka te dṛśā śubhaṃ yā tena sañjīvanamarthayeta sā // 21 //