Mahabharata · Chapter 4.16

vasamāneṣu pārtheṣu matsyasya nagare tadā /
mahāratheṣu cchanneṣu māsā daśa samāyayuḥ // 1 //

yājñasenī sudeṣṇāṃ tu śuśrūṣantī viśāmpate /
āvasatparicārārhā suduḥkhaṃ janamejaya // 2 //

tathā carantī pāñcālī sudeṣṇāyā niveśane /
tā devīṃ topayāmāsa tathā cāntaḥpurastriyaḥ // 3 //

tasminvarṣe gataprāye kīcakastu mahābalaḥ /
senāpatirvirāṭasya dadarśa drupadātmajām // 4 //

tāṃ dṛṣṭvā devagarbhāyāṃ carantīṃ devatāmiva /
kīcakaḥ kāmayāmāsa kāmabāṇaprapīḍitaḥ // 5 //

sa tu kāmāgnisantaptaḥ sudeṣṇāmabhigamya vai /
prahasanniva senānīridaṃ vacanamabravīt // 6 //

neyaṃ mayā jātu pureha dṛṣṭā rājñī virāṭasya niveśane śubhā /
rūpeṇa conmādayatīva māṃ bhṛśaṃ gandhena jātā madireva bhāminī // 7 //

kā devarūpā hṛdayangamā śubhe hyācakṣva me kasya kutotra śobhane /
cittaṃ hi nirmathya karoti māṃ vaśe na cānyadatraupadhamasti me matam // 8 //

aho taveyaṃ paricārikā śubhā pratyagrarūpā pratibhāti māmiyam /
ayuktarūpaṃ hi karoti karma te praśāstu māṃ yacca mamāsti kiñcana // 9 //

prabhūtanāgāśvarathaṃ mahājanaṃ samṛddhiyuktaṃ bahupānayojanam /
manoharaṃ kāñcanacitrabhūṣaṇaṃ gṛhaṃ mahacchobhayatāmiyaṃ mama // 10 //

tataḥ sudeṣṇāmanumantrya kīcakastataḥ samabhyetya narādhipātmajām /
uvāca kṛṣṇāmabhisāntvayaṃstadā mṛgendrakanyāmiva jambuko vane // 11 //

kā tvaṃ kasyāsi kalyāṇi kuto vā tvaṃ varānane /
prāptā virāṭanagaraṃ tattvamācakṣva śobhane // 12 //

rūpamagryaṃ tathā kāntiḥ saukumāryamanuttamam /
kāntyā vibhāti vakraṃ te śaśāṅka iva nirmalaṃ // 13 //

netre suvipule subhru padmapatranibheśubhe /
vākyaṃ te cārusarvāṅgi parapuṣṭarutopamam // 14 //

evaṃrūpā mayā nārī kācidanyā mahītale /
na dṛṣṭapūrvā suśroṇi yādṛśī tvamanindite // 15 //

lakṣmīḥ padmālayā kā tvamatha bhūtiḥ sumadhyame /
hrīḥ śrīḥ kīrtiratho kāntirāsāṃ kā tvaṃ varānane // 16 //

atīva rūpiṇī kiṃ tvamanaṅgavihāriṇī /
atīva bhrājase subhru prabhevendoranuttamā // 17 //

api cekṣaṇapakṣmāṇāṃ sthitajyotsnopamaṃ śubham /
divyāṃśuraśmibhirvṛttaṃ divyakāntimanoramam // 18 //

nirīkṣya vakracandraṃ te lakṣmyā'nupamayā yutam /
kṛtsne jagati ko neha kāmasya vaśago bhavet // 19 //

hārālankārayogyau tu stanau cobhau śubhobhanau /
sujātau sahitau lakṣmyā pīnau vṛttau nirantarau // 20 //

kuḍmalāmburuhākārau tava subhru payodharau /
kāmapratodāviva māṃ tudataścāruhāsini // 21 //

valīvibhaṅgacaturaṃ stanabhāravināmitam /
karāgrasammitaṃ madhyaṃ tavedaṃ tanumadhyame // 22 //

dṛṣṭvaiva cārujaghanaṃ saritpulinasannibham /
kāmavyādhirasādhyo māmapyākrāmati bhāmini // 23 //

jajvāla cāgnimadano dāvāgniriva nirdayaḥ /
tvatsaṅgamābhisankalpavivṛddho māṃ dahatyayam // 24 //

ātmapradānavarṣeṇa sangamāmbhodhareṇa ca /
śamayasva varārohe jvalantaṃ manmathānalam // 25 //

maccittonmādanakarā manmathasya śarotkarāḥ / tvatsaṅgamāśāniśitāstīvrāḥ śaśinibhānane /
mahyaṃ vidārya hṛdayamidaṃ nirdayavegitāḥ // 26 //

praviṣṭā hyasitāpāṅgi pracaṇḍāścaṇḍadāruṇāḥ / atyunmādasamārambhāḥ prītyunmādakarā mama /
ātmapradānasambhogairmāmuddhartumihārhasi // 27 //

citramālyāmbaradharā sarvābharaṇabhūṣitā /
kāmaṃ prakāmaṃ seva tvaṃ mayā saha vilāsini // 28 //

nārhasīhāsukhaṃ vastuṃ sukhārhā sukhavarjitā /
prāpnuhyanuttamaṃ saukhyaṃ mattastvaṃ mattagāmini // 29 //

svādūnyamṛtakalpāni peyāni vividhāni ca /
pibamānā manojñāni ramamāṇā yathāsukham // 30 //

bhogopacārānvividhānsaubhāgyaṃ cāpyanuttamam /
pānaṃ piba mahābhāge bhogaiścānuttamaiḥ śubhaiḥ // 31 //

idaṃ hi rūpaṃ prathamaṃ tavānaghe nirarthakaṃ kevalamadya bhāmini /
adhāryamāṇā snagivottamā śubhā na śobhase sundari śobhanā satī // 32 //

tyajāmi dārānmama ye purātanā bhavantu dāsyastava cāruhāsini /
ahaṃ ca te sundari dāsavatsthitaḥ sadā bhaviṣye vaśago varānane // 33 //