Mahabharata · Chapter 4.12

athāparo'dṛśyata pāṇḍavaḥ prabhurvirāṭarāje turagānsamīkṣati /
tamāpatantaṃ dadṛśuḥ pṛthagjanāḥ pramuktamabhrādiva candramaṇḍalam // 1 //

sa vai hayānaikṣata tānitastataḥ samīkṣamāṇaṃ ca dadarśa matsyarāṭ /
dṛṣṭvā tathainaṃ sa kurūttamaṃ tamaḥ papraccha tānsarbasabhāsadastadā // 2 //

ko vā vijānāti purā'sya darśanaṃ yo'yaṃ yuvā'bhyeti hi māsikāṃ sabhām /
priyo hi me darśanatopi sammato bravītu kaścidyadi dṛṣṭavānimam // 3 //

ayaṃ hayānpaśyati māmakānmuhurdhruvaṃ hayajño bhavitā vicakṣaṇaḥ /
praveśyatāmeṣa samīpamāśu vai vibhāti vīro hi yathā'marastathā // 4 //

vitarkayatyeva hi matsyarājani tvarankurūṇāmṛṣabhaḥ sabhāmagāt /
tataḥ praṇamyopanataḥ kurūttamo virāṭarājānamuvāca pārthivam // 5 //

tavāgato'haṃ puramadya bhūpate jijīviṣurvetanabhojanārthikaḥ /
tavāśvabandhaḥ subhṛto bhavāmyahaṃ kuruṣva māmaśvapatiṃ yadīcchasi // 6 //
virāṭa uvāca /

dadāni yānāni dhanāni vetanaṃ na cāśvasūto bhavituṃ tvamarhasi /
kutosi kasyāmi kathaṃ tvamāgato bravīhi śilpaṃ tava vidyate ca yat // 7 //
nakula uvāca /

pañcānāṃ pāṇḍuputrāṇāṃ jyeṣṭho rājā yudhiṣṭhiraḥ /
tenāhamaśveṣu purā prakṛtaḥ śatrukarśana // 8 //

aśvānāṃ prakṛtiṃ vedmi vinayaṃ cāpi sarvaśaḥ /
duṣṭānāṃ pratipattiṃ ca kṛtsnaṃ caiva cikitsitam // 9 //

na kātaraṃ syānmama vājivāhanaṃ na me'sti duṣṭā baḍavā kuto hayaḥ /
jānaṃstu māmāha sa cāpi pāṇḍavo yudhiṣṭhiro granthikameva nāmataḥ // 10 //

mātaliriva devapaterdaśarathanṛpateḥ sumatra iva yantā /
sumaha iva jāmadagrestathaiva tava śikṣayāmyaśvān // 11 //

yudhiṣṭhirasya rājendra nararājasya śāsanāt /
śatasāhasrakoṭīnāmaśvānāmasmi rakṣitā // 12 //
virāṭa uvāca /

yadasti kiñcinmama vājivāhanaṃ tadastu sarvaṃ tvadadhīnamadya vai /
ye cāpi kecinmama vājiyodhāstvadāśrayāḥ sārathayaśca santu me // 13 //

idaṃ taveṣṭaṃ vihitaṃ suropama // .hi yatte prasamīkṣitaṃ varam /
// .'nurūpaṃ hayakarma dṛśyate vibhāti rājeva na karma vājinām // 14 //

yudhiṣṭhirasyaiva hi darśanena me samaṃ tavedaṃ priyadarśa darśanam /
kathaṃ nu bhṛtyaiḥ sa vinākṛto vane caratyanindyo ramate ca pāṇḍavaḥ // 15 //
vaiśampāyana uvāca /

tathā sa gandharvavaropamo yuvā virāṭarājñā muditena pūjitaḥ /
na caivamanye'pi viduḥ kathañcana priyābhirāmaṃ vicarantamantarā // 16 //