Mahabharata · Chapter 4.11

athāparo'dṛśyata varṇavānyuvā strīveṣadhārī samalankṛto bhṛśam /
pravālacitre pravimucya kuṇḍale ubhe ca kambū paripātuke tathā // 1 //

kṛṣṇe ca rakte ca nibadhya vāsasī śarīravāñśukrabṛhaspatiprabhaḥ /
bahūṃśca dīrghāṃśca vikīrya mūrdhajānmahābhujo mattagajendravikramaḥ // 2 //

klaibyena veṣeṇa na bhati bhāti ca grahābhipanno nabhasīva candramāḥ /
gatena corvī parikampayaṃstadā virāṭamāsādya sabhāsamīpataḥ // 3 //

taṃ prekṣya rājopagataṃ sabhātale vyājāpraticchannamamitramardanam /
virājamānaṃ surarājavarcasaṃ sutaṃ surendrasya gajendravikramam // 4 //

sarvānapṛcchacca samīpacāriṇaḥ kuto'yamāyāti na me purā śrutaḥ /
na cainamūcurviditaṃ narāstadā savismayaṃ vākyamidaṃ nṛpo'bravīt // 5 //
virāṭa uvāca /

gajendralīlo mṛgarājagāmī vṛṣekṣaṇo devasutogratejāḥ /
pīnāṃsabāhuḥ kanakāvadātaḥ ko'yaṃ naro me nagaraṃ praviṣṭaḥ // 6 //

kimeṣa devendrasutaḥ kimeṣa brahmātmajo vā kimayaṃ svayambhūḥ /
umāsuto vaiśravaṇātmajo vā prekṣyainamāsīditi me vitarkaḥ // 7 //
vaiśampāyana uvāca /

sabhāmatikramya sa vāsavopamo nirīkṣamāṇo bahubhiḥ sabhāgataiḥ /
sa tatra rājanamamitrahā'bravīdbṛhannalāhaṃ naradeva nartakī // 8 //

veṇīṃ prakuryāṃ rucire ca kuṇḍale grathe srajaḥ prāvaraṇāni saṃhare / snānaṃ careyaṃ vimṛje ca darpaṇaṃ viśeṣakeṣveva ca kauśalaṃ mama // 9 /

klībeṣu bāleṣu janeṣu nartane śikṣāpradāneṣu ca yogyatā mama /
karomi veṇīṣu ca puṣpapūrakaṃ na me striyaḥ karmaṇi kauśalādhikāḥ // 10 //

ityarjunastaṃ naradevamojasā vijñāpya tasthau vidhinā'tmanaḥ kriyām /
tamabravītprāṃśumudīkṣya vismito virāṭarājopasṛtaṃ mahāyaśāḥ // 11 //

nārhastu veṣo'yamanūrjitaste nāpuṃstvamarhaṃ naradevasiṃha /
tavaiva veṣaḥ śubhaveṣabhūṣaṇairvibhūṣito bhūtapateriva prabho // 12 //

vibhāti bhānoriva raśmimālino ghanāvaruddhe gagane ghanairiva /
dhanurhi manye tava śobhayedbhujau tathāhi pīnāvatimātramāyatau // 13 //

pragṛhya cāpaṃ tvanurūpamātmano rakṣasva deśaṃ puramadya susthiraḥ /
putreṇa tulyo bhava me bṛhannale vṛddhosmi vittaṃ pratipādayāmi te // 14 //

tvaṃ rakṣa me sarvamidaṃ puraṃ prabho na ṣaṇḍatāṃ kāñcana lakṣayāmi te /
praśādhi matsyāṃstarasā vivardhayandadāmi rājyaṃ tava satyavāgaham // 15 //
vaiśampāyana uvāca /

tasyāgrataḥ svāni dhanūṃṣi pārthivo bahūni dīrghāṇi ca varṇavanti ca /
dadau sa sajyāni balānvitāni jijñāsamānaḥ kimayaṃ kariṣyati // 16 //

tato'rjunaḥ klībataraṃ vaco'bravīnna me dhanurdhāritamīdṛśaṃ vibho /
na cāpi dṛṣṭaṃ dhanurīdṛśaṃ kvacinna mādṛśāḥ santi dhanurdharā bhuvi // 17 //

nṛtyāma gāyāmi ca vādayāmyahaṃ prānartane kauśalanaipuṇaṃ mama /
taduttarāyāḥ paridhatsva nartane bhavāmi devyā naradeva nartakī // 18 //
virāṭa uvāca /

dadāmi te taṃ hi varaṃ bṛhannale sutāṃ hi me nartaya yāśca tādṛśīḥ /
tato virāṭaḥ svayamāhvayatsutāṃ narādhipastāṃ ca sumadhyasundarīm // 19 //

uvāca caināṃ muditena cetasā bṛhannalā nāma sakhī bhavatviyam /
sugātri samprītisubaddhasauhṛdā tavāṅgane prāṇasamā ca nityadā // 20 //

prakāmabhakṣyābharaṇāmbarā śubhā caratviyaṃ sarvajaneṣvavāritā /
na duṣkulānāmiyamākṛtirbhavenna vṛttabhedī bhavatīdṛśo janaḥ // 21 //
vaiśampāyana uvāca /

sammantrya rājā vividhaiḥ svamantribhiḥ parīkṣya cainaṃ pramadābhirāśu vai /
apuṃstvamapyasya niśamya ca sthiraṃ tataḥ kumārīpuramutsasarja tam // 22 //

sa śikṣayāmāsa ca gītavadanaṃ sutāṃ virāṭasya dhanañjayaḥ prabhuḥ /
sakhīśca tasyāḥ paricārikāstathā priyaśca tasyāḥ sa babhūva pāṇḍavaḥ // 23 //

tathā sa tatraiva dhanañjayo'vasatpriyāṇi kurvantsaha tābhirātmavān /
tathā gataṃ tatra na jajhire janā bahiścarā vā'pyathavetare janāḥ // 24 //