Scripture Library

Mahabharata · Chapter 3.89

3.89.1

evaṃ sambhāṣamāṇe tu dhaumye kauravanandana /
lomaśaḥ sa mahātejā ṛṣistatrājagāma ha //

3.89.2

taṃ pāṇḍavāgrajo rājā sagaṇo brāhmaṇāśca te /
upātiṣṭhanmahābhāgaṃ divi śakramivāmarāḥ //

3.89.3

samabhyarcya yathānyāyaṃ dharmaputro yudhiṣṭhiraḥ /
papracchāgamane hetumaṭane ca prayojanam //

3.89.4

sa pṛṣṭaḥ pāṇḍuputreṇa prīyamāṇo mahāmanāḥ /
uvāca ślakṣṇayā vācā harṣayanniva pāṇḍavān //

3.89.5

sañcarannasmi kaunteya sarvāṃllokānyadṛcchayā /
gataḥ śakrasya bhavanaṃ tatrāpaśyaṃ sureśvaram //

3.89.6

tava ca bhrātaraṃ vīramapaśyaṃ savyasācinam /
śakrasyārdhāsanagataṃ tatra me vismayo mahān //

3.89.7

āsītpuruṣaśārdūla dṛṣṭvā pārthaṃ tathāgatam /
āha māṃ tatra deveśo gaccha pāṇḍusutānprati //

3.89.8

so'hamabhyāgataḥ kṣipraṃ didṛkṣastvāṃ sahānujam /
vacanātpuruhūtasya pārthas ca mahātmanaḥ //

3.89.9

ākhyāsye te priyaṃ tāta mahatpāṇḍavanandana /
bhrātṛbhiḥ sahito rājankṛṣṇayā caiva tacchṛṇu //

3.89.10

yattvayokto mahābāhurastrārthaṃ bharatarṣabha /
tadastramāptaṃ pārthena rudrādapratimaṃ vibho //

3.89.11

yattadbrahmaśiro nāma tapasā rudramāgamat /
amṛtādutthitaṃ raudraṃ tallabdhaṃ savyasācinā //

3.89.12

tatsamantraṃ sasaṃhāraṃ saprāyaścittamaṅgalam /
vajramastrāṇi cānyāni daṇḍādīni yudhiṣṭhira //

3.89.13

yamātkuberādvaruṇādindrācca kurunandana /
astrāṇyadhītavānpārtho divyānyamitavikramaḥ //

3.89.14

viśvāvasostu tanayādgītaṃ nṛtyaṃ ca sāma ca /
vāditraṃ ca yathānyāyaṃ pratyavindadyathāvidhi //

3.89.15

evaṃ kṛtāstraḥ kaunteyo gāndharvaṃ vedamātmavān /
sukhaṃ vasati bībhatsuranujasyānujastava //

3.89.16

yadarthaṃ māṃ suraśreṣṭha idaṃ vacanamabravīt /
tacca te kathayiṣyāmi yudhiṣṭhira nibodha me //

3.89.17

bhavānmanuṣyaloke'pi gamiṣyati na saṃśayaḥ /
brūyādyudhiṣṭhiraṃ tatravacanānme dvijottama //

3.89.18

āgamiṣyati te bhrātā kṛtāstraḥ kṣipramarjunaḥ /
surakāryaṃ mahatkṛtvā yadaśakyaṃ divaukasaiḥ //

3.89.19

tapasā'pi tvamātmānaṃ yojaya bhrātṛbhiḥ saha /
tapaso hi paraṃ nāsti tapasā vindate mahat //

3.89.20

ahaṃ ca karṇaṃ jānāmi yathāvadbharatarṣabha /
satyasandhaṃ mahotsāhaṃ mahāvīryaṃ mahābalam //

3.89.21

mahāhaveṣvapratimaṃ mahāyuddhaviśāradam /
mahādhanurdharaṃ vīraṃ mahāstraṃ varavarṇinam //

3.89.22

maheśvarasutaprakhyamādityatanayaṃ prabhum /
tathā'rjunamatiskandhaṃ sahajolvaṇapauruṇam //

3.89.23

na sa pārtasya sangrāme kalāmarhati ṣoḍaśīm //

3.89.24

yaccāpi te bhayaṃ karṇānmanasisthamarindama /
taccāpyapahariṣyāmi savyasācinyupāgate //

3.89.25

yacca te mānasaṃ vīra tīrthayātrāmimāṃ prati /
sa maharṣirlomaśaste kathayiṣyatyasaṃśayam //

3.89.26

yacca kiñcittapoyuktaṃ phalaṃ tīrtheṣu bhārata / brahmarṣireṣa brūyātte na tacchraddheyamanyathā //

Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0