Mahabharata · Chapter 3.88

udīcyāṃ rājaśārdūla diśi puṇyāni yāni vai /
tāni te kīrtayiṣyāmi puṇyānyāyatanāni ca //

śṛṇuṣvāvahito bhūtvā mama mantrayataḥ prabho /
kathāpratigraho vīra śraddhāṃ janayate śubhām //

sarasvatī mahāpuṇyā hradinī tīrthamālinī /
samudragā mahāvegā yamunā yatra pāṇḍava //

yatra puṇyataraṃ tīrthaṃ plakṣāvataraṇaṃ śubham /
yatrasārasvatairiṣṭvā gacchantyavabhṛthaṃ dvijāḥ //

puṇyaṃ cākhyāyate divyaṃ śivamagniśiro'nagha /
sahadevo'yajadyatraśamyākṣepeṇa bhārata //

etasminneva cārthe'sau indragītā yudhiṣṭhira /
gāthā carati loke'smingīyamānā dvijātibhiḥ //

agnayaḥ sahadevena ye citā yamunāmanu /
te tasya kuruśārdūla sahasraśatadakṣiṇāḥ //

tatraiva bharato rājā cakravartī mahāyaśāḥ /
viṃśatīṃ sapta cāṣṭau ca hayamedhānupāharat //

kāmakṛdyo dvijātīnāṃ śrutastāta yathā purā /
atyantamāśramaḥ puṇyaḥ śarabhaṅgasya viśrutaḥ //

sarasvatī nadī sadbhiḥ satataṃ pārtha pūjitā /
vālakhilyairmahārāja yatreṣṭamṛṣibhiḥ purā //

dṛṣadvatī mahāpuṇyā yatra rakhyātā yudhiṣṭhira / nyagrodhākhyastu pāñcālyaḥ pāñcālyodvipadāṃvara /
dālbhyaghoṣaśca dālbhyāś dharaṇīstho mahātmanaḥ //

kaunteyānantayaśasaḥ suvratasyāmitaujasaḥ /
āśramaḥ khyāyate puṇyastriṣu lokeṣu viśrutaḥ //

etāvarṇāvavarṇau ca viśrutau manujādhipa /
ījāte kratubhirmukhyaiḥ puṇyairbharatasattama //

sametya bahuśo devāḥ sendrāḥ savaruṇāḥ purā /
viśākhayūpe'tapyan tena puṇyatamaśca saḥ //

ṛṣirmahānmahābhāgo jamadagnirmahāyaśāḥ /
palāśakeṣu puṇyeṣu ramyeṣvayajata prabhuḥ //

yatrasarvāḥ saricchreṣṭāḥ sākṣāttamṛṣisattamam /
svaṃ svaṃ toyamupādāya parivāryopatasthire //

api cātra mahārāja svayaṃ viśvāvasurjagau /
imaṃ ślokaṃ tadā vīra prekṣya dīkṣāṃ mahātmanaḥ //

yajamānasya vai devāñjamadagnermahātmanaḥ /
āgamya sarito viprānmadhunā samatarpayan //

gandharvayakṣarakṣobirapsarobhiśca sevitam /
kirātakinnarāvāsaṃ śailaṃ śikhariṇāṃvaram //

bibheda tarasā gaṅgā gaṅgādvāraṃ yudhiṣṭhira /
puṇyaṃ tatkhyāyate rājanbrahmarṣigaṇasevitam //

sanatkumāraḥ kauravya puṇyaṃ kanakhalaṃ tathā /
parvataśca pururnāma yatrayātaḥ purūravāḥ //

bhṛguryatratapastepe maharṣigaṇasevite /
rājansa āśramaḥ khyāto bhṛgutundo mahāgiriḥ //

yaḥ sa bhūtaṃ bhaviṣyacca bhavac bharatarṣabha /
nārāyaṇaḥ prabhurviṣṇuḥ śāśvataḥ puruṣottamaḥ //

tasyātiyaśasaḥ puṇyāṃ viśālāṃ badarīmanu /
āśramaḥ khyāyate puṇyastriṣu lokeṣu viśrutaḥ //

uṣṇatoyavahā gaṅgā śītatoyavahā purā /
suvarṇasikatā rājanviśālāṃ badarīmanu //

ṛṣayo yatradevāśca mahābhāgā mahaujasaḥ /
prāpya nityaṃ namasyanti devaṃ nārāyaṇaṃ prabhum //

yatranārājaṇo devaḥ paramātmā sanātanaḥ /
tatra kṛtsnaṃ jagatsarvaṃ tīrthānyāyatanāni ca //

tatpuṇyaṃ paramaṃ brahma tattīrthaṃ ttapovanam /
tatparaṃ paramaṃ devaṃ bhūtānāṃ parameśvaram //

śāśvataṃ paramaṃ caiva dhātāraṃ paramaṃ padam /
yaṃ viditvāna śocanti vidvāṃsaḥ śāstradṛṣṭayaḥ //

tatra devarṣayaḥ siddhāḥ sarve caiva tapodhanāḥ /
ādidevo mahāyogī yatrāste madhusūdanaḥ //

puṇyānāmapi tatpuṇyamatra te saṃśayestu mā / etāni rājanpuṇyāni pṛthivyāṃ pṛthivīpate /
kīrtitāni naraśreṣṭha tīrthānyāyatanāni ca //

etāni vasubhiḥ sādhyairādityairmarudaśvibhiḥ /
ṛṣibhirdevakalpaiśca sevitāni mahātmabhiḥ //

carannetāni kaunteya sahito brāhmaṇarṣabhaiḥ /
bhrātṛbhiśca mahābhāgairutkaṇṭhāṃ vijayiṣyasi //