Mahabharata · Chapter 3.90

dhanañjayena cāpyuktaṃ yattacchṛṇu yudhiṣṭhira /
yudhiṣṭhiraṃ bhrātaraṃ me yojayerdharmyayā dhiyā //

tvaṃ hi dharmānparānvettha tapāṃsi ca tapodhana /
śrīmatāṃ cāpi jānāsi dharmaṃ rājñāṃ sanātanam //

sa bhavānparamaṃ veda rapāvanaṃ puruṣaṃ prati /
tena saṃyojayethāstvaṃ tīrthapuṇyena pāṇḍavān //

yathā tīrthāni gaccheta gāśca dadyātsa pārthivaḥ /
tathā sarvātmanā kāryamiti māmarjuno'bravīt //

bhavatā cānugupto'sau carettīrthāni sarvaśaḥ /
rakṣobhyo rakṣitavyaśca durgeṣu viṣameṣu ca //

dadhīca iva devendraṃ yathā cāpyaṅgirā ravim /
tathā rakṣasva kaunteyānrākṣasebhyo dvijottama //

yātudhānā hi bahavo rākṣasāḥ parvatopamāḥ /
tvayā'bhiguptānkaunteyānna vivarteyurantikam //

so'hamindrasya vacanānniyogādarjunasya ca /
rakṣamāṇo bhayebhyastvāṃ cariṣyāmi tvā saha //

dvistīrthāni mayā pūrvaṃ dṛṣṭāni kurunandana /
idaṃ tṛtīyaṃ drakṣyāmi tānyeva bhavatā saha //

iyaṃ rājarṣibhiryātā puṇyakṛdbhiryudhiṣṭhira /
manvādibhirmahārāja tīrthayātrā bhayāpahā //

nānṛjurnākṛtātmā ca nāvidyo na ca pāpakṛt /
snāti tīrtheṣu kauravya na ca vakramatirnaraḥ //

tvaṃ tu dharmamatirnityaṃ dharmajñaḥ satyasangaraḥ /
vimuktaḥ sarvapāpebhyo bhūya eva bhaviṣyasi //

yathā bhagīratho rājā rājānaśca gayādayaḥ /
yathā yayātiḥ kaunteya tathā tvamapi pāṇḍava //
yudhiṣṭhira uvāca /

na harṣātsamprapaśyāmi vākyasyāsyottaraṃ kvacit /
yanmāṃ smarati deveśaḥ kiṃ nāmābhyadhikaṃ tataḥ //

bhavatā sangamo yas bhrātā caiva dhanañjayaḥ /
vāsavaḥ smarate yas ko nāmābhyadhikastataḥ //

yacca māṃ bhagavānāha tīrthānāṃ gamanaṃ prati /
dhaumyasya vacanādeṣā buddhiḥ pūrvaṃ kṛtaiva me //

tadyadā manyase brahmangamanaṃ tīrtadarśane /
tadaiva gantāsmi tīrtānyeṣa me niścayaḥ paraḥ //
vaiśampāyana uvāca /

gamane kṛtabuddhiṃ taṃ pāṇḍavaṃ lomaśo'bravīt /
laghurbhava mahārāja laghuḥ svairaṃ gamiṣyasi //
yudhiṣṭhira uvāca /

bhikṣābhujo nivartantāṃ brāhmaṇā yatayaśca ye //

kṣuttṛḍadhvaśramāyāsaśītārtimasahiṣṇavaḥ /
te sarve vinivartantāṃ ye ca mṛṣṭabhujo dvijāḥ //

pakvānnalehyapānānāṃ māṃsānāṃ ca vikalpakāḥ / te'pi sarve nivartantāṃ ye ca sūdānuyāyinaḥ /
mayā yathocitā'jīvyauḥ saṃvibhaktāśca vṛttibhiḥ //

ye cāpyanugatāḥ paurā rājabhaktipuraḥsarāḥ / dhṛtarāṣṭraṃ mahārājamabhigacchantu te ca vai /
sa dāsyati yathākālamucitā yasya yā bhṛtiḥ //

sa cedyathocitāṃ vṛttiṃ na dadyānmanujeśvaraḥ /
asmatpriyahitārthāyapāñcālyo vaḥ pradāsyati //
vaiśampāyana uvāca /

tato bhūyiṣṭhaśaḥ paurā gurau bhāre samāhite /
viprāśca yatayo mukhyā jagmurnāgapuraṃ prati //

tānsarvāndharmarājasya premṇā rājā'mbikāsutaḥ /
pratijagrāha vidhivaddhanaiśca samatarpayat //

tataḥ kuntīsuto rājā laghubhirbrāhmaṇaiḥ saha / lomaśena ca suprītastrirātraṃ kāmyake'vasat //