મહાભારત · અધ્યાય 3.89

એવં સમ્ભાષમાણે તુ ધૌમ્યે કૌરવનન્દન ।
લોમશઃ સ મહાતેજા ઋષિસ્તત્રાજગામ હ ॥

તં પાણ્ડવાગ્રજો રાજા સગણો બ્રાહ્મણાશ્ચ તે ।
ઉપાતિષ્ઠન્મહાભાગં દિવિ શક્રમિવામરાઃ ॥

સમભ્યર્ચ્ય યથાન્યાયં ધર્મપુત્રો યુધિષ્ઠિરઃ ।
પપ્રચ્છાગમને હેતુમટને ચ પ્રયોજનમ્ ॥

સ પૃષ્ટઃ પાણ્ડુપુત્રેણ પ્રીયમાણો મહામનાઃ ।
ઉવાચ શ્લક્ષ્ણયા વાચા હર્ષયન્નિવ પાણ્ડવાન્ ॥

સઞ્ચરન્નસ્મિ કૌન્તેય સર્વાંલ્લોકાન્યદૃચ્છયા ।
ગતઃ શક્રસ્ય ભવનં તત્રાપશ્યં સુરેશ્વરમ્ ॥

તવ ચ ભ્રાતરં વીરમપશ્યં સવ્યસાચિનમ્ ।
શક્રસ્યાર્ધાસનગતં તત્ર મે વિસ્મયો મહાન્ ॥

આસીત્પુરુષશાર્દૂલ દૃષ્ટ્વા પાર્થં તથાગતમ્ ।
આહ માં તત્ર દેવેશો ગચ્છ પાણ્ડુસુતાન્પ્રતિ ॥

સોઽહમભ્યાગતઃ ક્ષિપ્રં દિદૃક્ષસ્ત્વાં સહાનુજમ્ ।
વચનાત્પુરુહૂતસ્ય પાર્થસ્ ચ મહાત્મનઃ ॥

આખ્યાસ્યે તે પ્રિયં તાત મહત્પાણ્ડવનન્દન ।
ભ્રાતૃભિઃ સહિતો રાજન્કૃષ્ણયા ચૈવ તચ્છૃણુ ॥

યત્ત્વયોક્તો મહાબાહુરસ્ત્રાર્થં ભરતર્ષભ ।
તદસ્ત્રમાપ્તં પાર્થેન રુદ્રાદપ્રતિમં વિભો ॥

યત્તદ્બ્રહ્મશિરો નામ તપસા રુદ્રમાગમત્ ।
અમૃતાદુત્થિતં રૌદ્રં તલ્લબ્ધં સવ્યસાચિના ॥

તત્સમન્ત્રં સસંહારં સપ્રાયશ્ચિત્તમઙ્ગલમ્ ।
વજ્રમસ્ત્રાણિ ચાન્યાનિ દણ્ડાદીનિ યુધિષ્ઠિર ॥

યમાત્કુબેરાદ્વરુણાદિન્દ્રાચ્ચ કુરુનન્દન ।
અસ્ત્રાણ્યધીતવાન્પાર્થો દિવ્યાન્યમિતવિક્રમઃ ॥

વિશ્વાવસોસ્તુ તનયાદ્ગીતં નૃત્યં ચ સામ ચ ।
વાદિત્રં ચ યથાન્યાયં પ્રત્યવિન્દદ્યથાવિધિ ॥

એવં કૃતાસ્ત્રઃ કૌન્તેયો ગાન્ધર્વં વેદમાત્મવાન્ ।
સુખં વસતિ બીભત્સુરનુજસ્યાનુજસ્તવ ॥

યદર્થં માં સુરશ્રેષ્ઠ ઇદં વચનમબ્રવીત્ ।
તચ્ચ તે કથયિષ્યામિ યુધિષ્ઠિર નિબોધ મે ॥

ભવાન્મનુષ્યલોકેઽપિ ગમિષ્યતિ ન સંશયઃ ।
બ્રૂયાદ્યુધિષ્ઠિરં તત્રવચનાન્મે દ્વિજોત્તમ ॥

આગમિષ્યતિ તે ભ્રાતા કૃતાસ્ત્રઃ ક્ષિપ્રમર્જુનઃ ।
સુરકાર્યં મહત્કૃત્વા યદશક્યં દિવૌકસૈઃ ॥

તપસાઽપિ ત્વમાત્માનં યોજય ભ્રાતૃભિઃ સહ ।
તપસો હિ પરં નાસ્તિ તપસા વિન્દતે મહત્ ॥

અહં ચ કર્ણં જાનામિ યથાવદ્ભરતર્ષભ ।
સત્યસન્ધં મહોત્સાહં મહાવીર્યં મહાબલમ્ ॥

મહાહવેષ્વપ્રતિમં મહાયુદ્ધવિશારદમ્ ।
મહાધનુર્ધરં વીરં મહાસ્ત્રં વરવર્ણિનમ્ ॥

મહેશ્વરસુતપ્રખ્યમાદિત્યતનયં પ્રભુમ્ ।
તથાઽર્જુનમતિસ્કન્ધં સહજોલ્વણપૌરુણમ્ ॥

ન સ પાર્તસ્ય સન્ગ્રામે કલામર્હતિ ષોડશીમ્ ॥

યચ્ચાપિ તે ભયં કર્ણાન્મનસિસ્થમરિન્દમ ।
તચ્ચાપ્યપહરિષ્યામિ સવ્યસાચિન્યુપાગતે ॥

યચ્ચ તે માનસં વીર તીર્થયાત્રામિમાં પ્રતિ ।
સ મહર્ષિર્લોમશસ્તે કથયિષ્યત્યસંશયમ્ ॥

યચ્ચ કિઞ્ચિત્તપોયુક્તં ફલં તીર્થેષુ ભારત । બ્રહ્મર્ષિરેષ બ્રૂયાત્તે ન તચ્છ્રદ્ધેયમન્યથા ॥