Mahabharata · Chapter 3.87

avantīṣu pratīcyāṃ vai kīrtayiṣyāmi te diśi /
yāni tatrapavitrāṇi puṇyānyāyatanāni ca //

priyaṅgvāmravaṇopetā vānīraphalamālinī /
pratyaksrotā nadī puṇyā narmadā tatra bhārata //

trailokye yāni tīrthāni puṇyānyāyatanāni ca /
saridvanāni śailendrā devāśca sapitāmahāḥ //

narmadāyāṃ kuruśreṣṭha sahasiddharṣicāraṇaiḥ /
snātumāyānti puṇyaudhaiḥ sadā vāriṣu bhārata //

niretaḥ śrūyate puṇyo yatra viśravaso muneḥ /
jajñe dhanapatiryatra kubero naravāhanaḥ //

vaiḍhūryaśikharo nāma puṇyo girivaraḥ śivaḥ /
nityapuṣpaphalāstatra pādapā haritacchadāḥ //

tasya śailasya śikhare saraḥ puṇyaṃ mahīpate /
phullapadmaṃ mahārāja devagandharvasevitam //

bahvāścaryaṃ mahārāja dṛśyate tatra parvate /
puṇye svargopame caiva devarṣigaṇasevite //

hradinī puṇyatīrthā ca rājarṣestatra vai sarit /
viścāmitreṇa tapasā nirmitā sarvapāvanī //

yasyāstīre satāṃ madhye yayātirnahuṣātmajaḥ /
papāta sa punarlokām̐llebhe dharmānsanātanān //

tatrapuṇyo hradaḥ khyāto mainākaścaiva parvataḥ /
bahumūlaphalopetastvamito nāma parvataḥ //

āśramaḥ kakṣasenasya puṇyastatrayudhiṣṭhiraḥ / cyavanasyāśramaścaiva vikhyātastatrapāṇḍava /
tatrālpenaiva siddhyanti mānavāstapasā vibho //

jambūmārgo mahārāja ṛṣīṇāṃ bhāvitātmanām /
āśrama śāmyatāṃ śreṣṭha mṛgadvijaniṣevitaḥ //

tataḥ puṇyatamā rājansatataṃ tāpasairyutā / ketumālā ca medhyā ca gaṅgādvāraṃ ca bhūmipa /
khyātaṃ ca saindhavāraṇyaṃ puṇyaṃ dvijaniṣevitam //

pitāmahasaraḥ puṇyaṃ puṣkaraṃ nāma nāmataḥ /
vaikhānasānāṃ siddhānāmṛṣīṇāmāśramaḥ priyaḥ //

apyatra saṃśrayārthāya prajāpatiratho jagau /
puṣkareṣu kuruśreṣṭha gāthāṃ sukṛtināṃvara //

manasā'pyabhikāmasya puṣkarāṇi manakhinaḥ / vipraṇaśyanti pāpāni nākapṛṣṭhe ca modate //