Mahabharata · Chapter 3.86

dakṣiṇasyāṃ tu puṇyāni śṛṇu tīrthāni bhārata /
vistareṇa yathābuddhi kīrtyamānāni tāni vai //

yasyāmākhyāyate puṇyā diśi godāvarī nadī /
bahvārāmā bahujalā tāpasācaritā śivā //

veṇā bhīmarathī caiva nadyau pāpabhayāpahe /
mṛgadvijasamākīrṇe tāpasālayabhūṣite //

rājarṣestas ca sarinnṛgasya bharatarṣabha /
ramyatīrthā bahujalā payoṣṇī dvijasevitā //

api cātra mahāyogī mārkaṇḍeyo mahāyaśāḥ /
anuvaṃśyāṃ jagau gāthāṃ nṛgasya dharaṇīpateḥ //

nṛgas yajamānasya pratyakṣamiti naḥ śrutam /
marutaḥ pariveṣṭāraḥ sadasyāśca divaukasaḥ //

payoṣṇyāṃ yajamānasya vārāhe tīrtha uttame / uddhṛtaṃ bhūtalasthaṃ vāvāyunā samudīritam /
payoṣṇyā harate toyaṃ pāpamāmaraṇāntikam //

svargāduttuṅgamamalaṃ viṣāṇaṃ yatra śūlinaḥ /
svamātmavihitaṃ dṛṣṭvā martyaḥ śivapuraṃ vrajet //

ekataḥ saritaḥ sarvā gaṅgādyāḥ saliloccayāḥ /
payoṣṇī caikataḥ puṇyā tīrthebhyo hi matā mama //

māṭharasya vanaṃ puṇyaṃ bahumūlaphalaṃ śivam /
yūpaśca bharataśreṣṭha varuṇasrotase girau //

praveṇyuttarapārsve tu puṇye kaṇvāśrame tathā /
tāpasānāmaraṇyāni kīrtitāni yathāśruti //

vedī śūrpārake tāta jamadagnermahātmanaḥ /
ramyā pāṣāṇatīrthā ca puraścandrā ca bhārata //

aśokatīrthaṃ tatraiva kaunte ya bahulāśramam /
agastyatīrthaṃ pāṇḍyeṣu vāruṇaṃ ca yudhiṣṭhira //

kumāryaḥ kathitāḥ puṇyāḥ pāṇḍyeṣveva nararṣabha /
tāmraparṇī tu kaunteya kīrtayiṣyāmi tāṃ śṛṇu //

yatra devaistapastaptaṃ mahadicchadbhirāśrame /
gokarṇamiti vikhyātaṃ triṣu lokeṣu bhārata //

śītatoyo bahujalaḥ puṇyastāta śivaśca saḥ /
hradaḥ paramaduṣprāpo mānuṣairakṛtātmabhiḥ //

tatra vṛkṣatṛṇādyaiśca sampannaḥ phalamūlavān /
āśramo'gastyaśiṣyasya puṇyo devasahe girau //

vaiḍūryaparvatastatra śrīmānmaṇimayaḥ śivaḥ /
agastyasyāśramaścaiva bahumūlaphalodakaḥ //

surāṣṭreṣvapi vakṣyāmi puṇyānyāyatanāni ca /
āśramānsaritaścaiva sarāṃsi ca narādhipa //

camasodbhedanaṃ viprāstatrāpi kathayantyuta /
prabhāsaṃ codadhau tīrthaṃ triṣu lokeṣu viśrutam //

tatra piṇḍārakaṃ nāma tāpasācaritaṃ śivam /
ujjayantaśca śikharī kṣipraṃ siddhikaro mahān //

tatra devarṣivīreṇa nāradenānukīrtitaḥ /
purāṇaḥ śrūyate ślokastaṃ nibodha yudhiṣṭhira //

puṇye girau surāṣṭreṣu mṛgapakṣiniṣevite /
ujjayante sma taptāṅgo nākapṛṣṭhe mahīyate //

eṣa nārāyaṇaḥ śrīmānkṣīrārṇavaniketanaḥ /
nāgaparyaṅkamutsṛjyahyāgato madhurāṃ purīm //

puṇyā dvāravatī tatrayatrāsau madhusūdanaḥ /
sākṣāddevaḥ purāṇosau sa hi dharmaḥ sanātanaḥ //

ye ca kavedavido viprā ye cādhyātmavido janāḥ /
te vadanti mahātmānaṃ kṛṣṇaṃ dharmaṃ sanātanam //

pavitrāṇāṃ hi govindaḥ pavitraṃ paramucyate / puṇyānāmapi puṇyosau maṅgālānāṃ ca maṅgalam /
trailokye puṇḍarīkākṣo devadevaḥ sanātanaḥ //

avyayātmā vyayātmā ca kṣetrajñaḥ parameśvaraḥ / āste hariracintyātmā tatraiva madhusūdanaḥ //