Mahabharata · Chapter 3.8
dhatarāṣṭra mahāprājña nibodha vacanaṃ mama /
vakṣyāmi tvāṃ kauravāṇāṃ sarveṣāṃ hitamuttamam //
na me priyaṃ mahābāho yadgatāḥ pāṇḍavā vanam /
nikṛttyā nikṛtāścaiva duryodhanapurogamaiḥ //
te smarantaḥ parikleśānvarṣe pūrṇe trayodaśe /
vimokṣyanti viṣaṃ kruddhāḥ kauraveyeṣu bhārata //
tadayaṃ kinnu pāpātmā tava putraḥ sumandadhīḥ /
pāṇḍavānnityasankruddho rājyahetorjighāṃsati //
vāryatāṃ sādhvayaṃ mūḍhaḥ śamaṃ gacchatu te sutaḥ /
vanasthāṃstānayaṃ hantumicchanprāṇānvimokṣyati //
yathā'ha viduraḥ prājño yathā bhīṣmo yathā vayam /
yathā kṛpaśca droṇaśca tathā sādhu vidhīyatām //
vigraho hi mahāprājña svajanena vigarhitaḥ /
adharmyamayaśasyaṃ ca mā rājanpratipadyathāḥ //
samīkṣā yādṛśī hmasya pāṇḍavānprati bhārata /
upekṣyamāṇā sā rājanmahāntamanayaṃ vrajet //
athavā'yaṃ sumandātmā vanaṃ gacchatu te sutaḥ /
pāṇḍavaiḥ sahito rājanneka evāsahāyavān //
tataḥ saṃsargajaḥ snehaḥ putrasya tava pāṇḍavaiḥ /
yadi syātkṛtakṛtyastvaṃ bhavethāḥ puraṣarṣabha //
athavā jāyamānasya yacchīlamanujāyate /
śrūyate tanmahārāja nāmṛtasyāpasarpati //
kathaṃ vā manyate bhīṣmo droṇo'tha viduropivā / bhavānvā'tra paraṃ kāryaṃ purā cārtho nivartate //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0