Mahabharata · Chapter 3.9

bhagavannāhamapyetadrocaye dyūtasambhavam /
manye tadvidhinā'kṛṣya kāritosmīti vai mune //

naitadrocayate bhīṣmo na droṇo viduro na ca /
gāndhāryā neṣyate dyūtaṃ tatra mohātpravartitam //

parityaktuṃ na śaknomi duryodhanamacetanam /
putrasnehena bhagavañjānannapi yatavrata //
vyāsa uvāca /

vaicitravīrya nṛpate satyamāha yathā bhavān /
dṛḍhaṃ vijhaḥ paraṃ putraṃ paraṃ putrānna vidyate //

indropyaśrunipātena surabhyā pratibodhitaḥ / anyaiḥ samṛddhairapyarthairna sutānamanyate param /

atra te vartayiṣyāmi gahadākhyānamuttamam /
surabhyāścaiva saṃvādamindrasya ca viśāmpate //

triviṣṭapagatā rājansurabhī prārudatkila /
gavāṃ mātā purā tāta tāmindro'nvakṛpāyata //
indra uvāca /

kimidaṃ rodiṣi śubhe kaccitkṣemaṃ divaukasām /
manuṣyeṣvathavā goṣu naitadalpaṃ bhaviṣyati //
surabhiruvāca /

vinipāto na vaḥ kaściddṛśyate tridaśādhipa /
ahaṃ tu putraṃ śocāmi tena rodimi kauśika //

paśyainaṃ karṣakaṃ kṣudraṃ durbalaṃ mama putrakam / pratodenābhinighnantaṃ lāṅgalena ca pīḍitam /
niṣīdamānaṃ sotkaṇṭhaṃ vadhyamānaṃ surādhipa //

enaṃ dṛṣṭvā bhṛśaṃ śrāntaṃ vadhyamānaṃ surādhipa / kṛpāviṣṭā'smi devendra manaścodvepate mama //

ekastatrabalopeto dhuramudvahate'dhikām / aparopyabalaprāṇaḥ kṛśo dhamanisantataḥ /
kṛcchrādudvahate bhāraṃ taṃ vai śocāmi vāsava //

vadhyamānaḥ pratodena tudyamānaḥ punaḥ punaḥ /
naiva śaknoti taṃ bhāramudvoḍhuṃ paśya vāsava //

tato'haṃ tasya śokārtā viraumi bhṛśaduḥkhitā /
aśrūṇyāvartayantī ca netrābhyāṃ karuṇāyatī //
śakra uvāca /

tava putrasahasreṣu pīḍyamāneṣu śobhane /
kiṃ kṛpāyitavatyatra putra eko nipīḍyate //
surabhiruvāca /

yadi putrasahasrāṇi sarvatrasamataiva me /
dīnasya tu sataḥ śakra putrasyābhyadhikākṛpā //
vyāsa uvāca /

tadindraḥ surabhervākyaṃ niśamya bhṛśavismitaḥ /
jīvitenāpi kauravya mene'bhyadhikamātmajam //

pravavarṣa ca tatraiva sahasā toyamulvaṇam /
karṣakasyācaranvighnaṃ bhagavānpākaśāsanaḥ //

tadyathā surabhiḥ prāha samamevāstu te tathā /
suteṣu rājansarveṣu hīneṣvabhyadhikā kṛpā //

yādṛśo me sutaḥ pāṇḍustādṛśo me'si putraka /
viduraśca mahāprājñaḥ snehādetadbravīmyaham //

cirāya tava putrāṇāṃ śatamekaśca bhārata /
pāṇḍauḥ pañcaiva lakṣyante te'pi mandāḥsuduḥkhitāḥ //

kathaṃ jīveyuratyantaṃ kathaṃ vardheyurityapi /
iti dīneṣu pārtheṣu mano me paritapyate //

yadi pārthiva kaukhyāñjīvamānānihecchasi / duryodhanastava sutaḥ śamaṃ gacchatu pāṇḍavaiḥ //