Mahabharata · Chapter 3.7

śrutvā ca viduraṃ prāptaṃ rājñā ca parisāntvitam /
dhṛtārāṣṭrātmajo rājā paryatapyata durmatiḥ //

sa saubaleyamānāyya karṇaduḥśāsanau tathā /
abravīdvacanaṃ rājā praviśyābuddhijaṃ tamaḥ //

eṣa pratyāgato mantrī dhṛtarāṣṭrasya sammataḥ /
viduraḥ pāṇḍuputrāṇāṃ suhṛdvidvānhite rataḥ //

yāvadasya punarbuddhiṃ viduro nāpakarṣati /
pāṇḍavānayane tāvanmantrayadhvaṃ hitaṃ mama //

atha paśyāmyahaṃ pārthānprāptāniha kathañcana /
punaḥ śoṣaṃ gamiṣyāmi nirasurniṣparigrahaḥ //

viṣamudbandhanaṃ caiva śastramagnipraveśanam /
kariṣye na hi tānṛddhānpunardraṣṭumihotsahe //
sukuniruvāca /

kiṃ bāliśamatiṃ rājannāsthitosi viśāmpate /
gatāste samayaṃ kṛtvā naitadevaṃ bhaviṣyati //

satyavākyeḥ svitāḥ sarve pāṇḍavā bharataṣabha /
pituste vacanaṃ tāta na grahīṣyanti karhiciti //

athavā te grahīṣyanti punareṣyanti vā puram /
nirasya samayaṃ sarve paṇo'smākaṃ bhaviṣyati //

sarve bhavāmo madhyasthā rājñaśchandānuvartinaḥ / chidraṃ bahu prapaśyantaḥ pāṇḍavānāṃ susaṃvṛtāḥ /
duḥśāsana uvāca /

evametanmahāprājña yathā vadasi mātula /
nityaṃ hi me kathayatastava buddhirvirocate //
karṇa uvāca /

kāmamīkṣāmahe sarve duryodhana tavepsitam /
aikamatyaṃ hi no rājansarveṣāmeva lakṣaye //

[nāgamiṣyanti te dhīrā akṛtvā kālasaṃvidam / āgamiṣyanti cenmohātpunardyūtena tāñjaya // ]
vaiśampāyana uvāca /

evamuktastu karṇena rājā duryodhanastadā /
nātihṛṣṭamanāḥ kṣipramabhavatsa parāṅmukhaḥ //

upalabhya tataḥ karṇo vivṛtya nayane śubhe /
roṣādduḥśāsanaṃ caiva saubalaṃ ca tameva ca //

uvāca paramakruddha udyamyātmānamātmanā /
atho mama mataṃ yattu tannibodhata bhūmipāḥ //

priyaṃ sarve kariṣyāmo rājñaḥ kiṃ karavāmahe /
na cāsya śaknumaḥ sthātuṃ priye sarve hyatandritāḥ //

vayaṃ tu śastrāṇyādāya rathānāsthāya daṃśitāḥ /
gacchāmaḥ sahitā hantuṃ pāṇḍavānvanagocarān //

teṣu sarveṣu śānteṣu gateṣvaviditāṃ gatim /
nirvivādā bhaviṣyanti dhārtarāṣṭrāstathā vayam //

yāvadeva paridyūnā yāvacchokaparāyaṇāḥ /
yāvanmitravihīnāśca tāvadgacchāma māciram //

tasyatadvacanaṃ śrutvā pūjayantaḥ punaḥ punaḥ /
prahṛṣṭamanasaḥ sarve pratyūcuḥ sūtajaṃ tadā //

evamuktvā susaṃrabdhā rathaiḥ sarve pṛthakpṛthak /
niryayuḥ pāṇḍavānhantuṃ sahitāḥ kṛtaniścayāḥ //

tānprasthitānparijñāya kṛṣṇadvaipāyanaḥ prabhuḥ /
ājagāma viśuddhātmā dṛṣṭvā divyena cakṣuṣā //

pratiṣidhyātha tānsarvānbhagavām̐llokapūjitaḥ / prajñācakṣuṣamāsīnamuvācābhyetya satvaram //