Mahabharata · Chapter 3.78

bhagavānkāmyakātpārthe gate me prapitāmahe /
pāṇḍavāḥ kimakurvaṃste tamṛte savyasācinam //

sa hi teṣāṃ maheṣvāso gatirāsīdanīkajit /
ādityānāṃ yathā viṣṇustathaiva pratibhāti me //

tenendrasamavīryeṇa sangrāmeṣvanivartinā /
vinābhūtā vane vīrāḥ kathamāsanpitāmahāḥ //
vaiśampāyana uvāca /

gate tu pāṇḍavetāta kāmyakātsavyasācini /
babhūvuḥ kauraveyāste duḥkhaśokaparāyaṇāḥ //

ākṣiptasūtrā maṇayaśchinnapakṣā ivāṇḍajāḥ /
aprītamanasaḥ sarve babhūvuratha pāṇḍavāḥ //

vanaṃ tu tadabhūttena hīnamakliṣṭakarmaṇā /
kubereṇa yathāhīnaṃ vanaṃ caitrarathaṃ tathā //

tamṛte te naravyāghrāḥ pāṇḍavā janamejaya /
mudamaprāpnuvanto vai kāmyake nyavasaṃstadā //

brāhmaṇārthe parākrāntāḥ śuddhairvāṇairmahārathāḥ /
nighnanto bharataśreṣṭha medhyānbahuvidhānmṛgān //

nityaṃhi puruṣavyāghrā vanyāhāramarindamāḥ /
pravisṛtya samāhṛtya brāhmaṇebhyo nyavedayan //

evaṃ te nyavasaṃstatrasotkaṇaaṭhāḥ puruṣarṣabhāḥ /
ahṛṣṭamanasaḥ sarvegate rājandhanañjaye //

atha viproṣitaṃ rājanpāñcālī madhyamaṃ patim /
smarantī pāṇḍavaśreṣṭhamidaṃ vacanamabravīt //

yo'rjunenārjunastulyo dvibāhurbahubāhunā /
tamṛte pāṇḍavaśreṣṭhaṃ vanaṃ na pratibhāti me //

śūnyāmiva prapaśyāmi tatratatra mahīmimām /
bahvāścaryamidaṃ cāpi vanaṃ kusumitadrumam //

na tathā ramaṇīyaṃ vai tamṛte savyasācinam /
nīlāmbudasamaprakhyaṃ mattamātaṅgagāminam //

tamṛte puṇḍarīkākṣaṃ kāmyakaṃ nātibhāti me / yasya vā dhanuṣo ghoṣaḥ śrūyate cāśanisvanaḥ /
na labhe śarma vai rājansmarantī savyasācinam //

tathā lālapyamānāṃ tāṃ niśāmya paravīrahā /
bhīmaseno mahārāja draupadīmidamabravīt //

manaḥprītikaraṃ bhadre yadbravīṣi sumadhyame /
tanma prīṇāti hṛdayamamṛtaprāśanopamam //

yasya dīrghau samau pīnau bhujau parighasannibhau /
maurvīkṛtakiṇau vṛttau khaṅgāyudhadhanurdharau //

niṣkāṅgadakṛtāpīḍau pañcaśīrṣāvivoragau /
tamṛte puruṣavyāghraṃ naṣṭasūryamivāmbaram //

yamāśritya mahābāhuṃ pāñcālāḥ kuravastathā /
surāṇāmapi yattānāṃ pṛtanāsu na bibhyati //

yasya bāhū samāśritya vayaṃ sarvemahātmanaḥ /
manyāmahe jitānājau parānprāptāṃ ca medinīm //

tamṛte phalgunaṃ vīraṃ na labhe kāmyake dhṛtim /
paśyāmi ca diśaḥ sarvāstimireṇāvṛtā iva //

tato'bravītsāśrukaṇṭho nakulaḥ pāṇḍunandanaḥ / yasmindivyāni karmāṇi kathayanti raṇājire /
devā api yudhāṃśreṣṭhaṃ tamṛtekā ratirvane //

udīcīṃ co diśaṃ gatvā jitvā yudhi mahābalān /
gandharvamukhyāñśataśo haryām̐llebe mahādyutiḥ //

rājñe tittirikalmāṣāñśrīmato'nilaraṃhasaḥ /
prādādbhātre priyaḥ premṇā rājasūye mahākratau //

tamṛtebhīmadhanvānaṃ bhīmādavarajaṃ vane /
kāmaye kāmyake vāsaṃ nedānīmamaropamam //
sahadeva uvāca /

yo dhanānina kanyāśca yudhi hitvā mahābalān / śataśo ghātayitvā'rīnpṛtanāmadhyagastadā /
ājahāra purā rājñe rājasūye mahākratau //

yaḥ sametānmṛdhe jitvāyādavānamitadyutiḥ /
subhadrāmājahāraiko vāsudevasya sammate //

yenārdharājyamācchidya drupadasya mahātmanaḥ /
ācāryadakṣiṇā dattā raṇe droṇaśyabhārata //

tasya jiṣṇorbṛsīṃ dṛṣṭvā sūnyatreva niveśane /
hṛdayaṃ me mahārāja na śāmyātrakadācana //

vinādasmādvivāsaṃ tu rocaye'hamarindama / na hi nastamṛte vīraṃ ramaṇīyamidaṃ vanam //