Mahabharata · Chapter 3.79

dhanañjayotsukāste tu vane tasminmahārathāḥ /
nyavasanta mahābhāgā draupadyā saha kṛṣṇayā //

dhanaṃ jayotsukānāṃ tu bhrātṝṇāṃ kṛṣṇayā saha /
śrutvā vākyāni vimanā dharmarājopyajāyata //

athāpaśyanmahātmānaṃ devarṣiṃ tatra nāradam /
dīpyamānaṃ śriyā brāhmyā dīptāgnisamatejasam //

tamāgatamabhiprekṣya bhrātṛbhiḥ saha dharmarāṭ /
pratyutthāya yathānyāyaṃ pūjāṃ cakre mahātmane //

sa taiḥ parivṛtaḥ śrīmānbhrātṛbhiḥ kurusattamaḥ /
vibabhāvatidīptaujā devairiva śatakratuḥ //

yathā ca vedānsāvitrī yājñasenī tathā patīn /
na jahau dharmataḥ pārthānmerumarkaprabhā yathā //

ardhyaṃ pādyamathānīya tvabhyavāyadacyutaḥ /
nāradastu mahātejāḥ svastyastvityabhyabhāṣata //

tato yudhiṣṭhiro rājā dṛṣṭvā devarṣisattamam /
yathārhaṃ pūjayāmāsa vidhivatkurunandanaḥ //

pratigṛhya ca tāṃ pūjāṃ nārado bhagavānṛṣiḥ /
āśvāsayaddharmasutaṃ yuktarūpamivānagha //

uvāca ca mahātmānaṃ dharmarājaṃ yudhiṣṭhiram /
brūhi dharmabhṛtāṃ śreṣṭha kenārthaḥ kiṃ dadāni te //

atha dharmasuto rājā praṇamya bhrātṛbhiḥ saha /
uvāca prāñjalirbhūtvā nāradaṃ devasammitam //

nvayi tuṣṭe mahābhāga sarvalokābhipūjite /
kṛtamityeva manye'haṃ prasādāttava suvrata //

yadi tvahamanugrāhyo bhrātṛbhiḥ sahito'nagha /
sandehaṃ me suniśreṣṭha tatvataśchettumarhasi //

pradakṣiṇāṃ yaḥ kurute pṛthivīṃ tīrthatatparaḥ /
kiṃ phalaṃ tasya kārtsnyena tadbhavānvaktumarhati //
nārada uvāca /

śṛṇu rājannavahito yathā bhīṣmeṇa dhīmatā /
pulastyasya sakāśādvai sarvametadupaśrutam //

purā bhāgīrathītīre bhīṣmo dharmabhṛtāṃvaraḥ /
pitryaṃ vrataṃ samāsthāya nyavasanmunibhiḥ saha //

śubhe deśe tathā rājanpuṇye devarṣisevite /
gaṅgādvāre mahābhāga devagandharvasevite //

sa pitṝṃstarpayāmāsa devāṃśca paramadyutiḥ /
ṛṣīṃśca tarpayāmāsa vidhidṛṣṭena karmaṇā //

kasya cittvatha kālasya japanneva mahāyaśāḥ /
dadarśādbhutasankāśaṃ pulastyamṛṣisattamam //

sa taṃ dṛṣṭvogratapasaṃ dīpyamānamiva śriyā /
praharṣamatulaṃ lebhe vismayaṃ paramaṃ yayau //

upasthitaṃ mahābhāgaṃ pūjayāmāsa bhārata /
bhīṣmo dharmabhṛtāṃ śreṣṭho vidhidṛṣṭena karmaṇā //

śirasā cāghamādāya śuciḥ prayatamānasaḥ /
nāma sankīrtayāmāsa tasminbrahmarṣisattame //

bhīṣmo'hamasmi bhadraṃ te dāso'smi tava suvrata /
tava sandarśanādeva mukto'haṃ sarvakilvapaiḥ //

raevamuktvā mahārāja bhīṣmo dharmabhṛtāṃvaraḥ /
vāgyataḥ prāñjalirbhūtvātūṣṇīmāsīdyudhiṣṭhira //

taṃ dṛṣṭvā niyamenātha svādhyāyāmnāyakarśitam /
bhīṣmaṃ kurukulaśreṣṭhaṃ muniḥ prītamanā'bhavat //

tataḥ sa madhureṇātha svareṇa sumahātapāḥ / uvāca vākyaṃ dharmajñaḥ pulastyaḥ prītamānasaḥ //