Mahabharata · Chapter 3.73

keśinyāstadvacaḥ śrutvā damayantī viśāmpate /
śaṅkamānā nalaṃ taṃ vai keśinīmidamabravīt //

gaccha keśini bhūyastvaṃ parīkṣāṃ kuru bāhuke /
abruvāṇā samīpasthā caritānyasya lakṣaya //

yadā ca kiñcitkuryātsa kāraṇaṃ tatra bhāmini /
tatrasañceṣṭamānasya saṃlakṣethā viceṣṭitam //

na cāsya pratibandhena deyo'gnirapi keśini / yācate na jalaṃ deyaṃ sakṛccātvaramāṇayā /
etatsarvaṃ samīkṣyatvaṃ caritaṃ me nivedaya //

nimittaṃ yattvayā dṛṣṭaṃ bāhuke daivamānuṣam /
yaccānyadapi paśyethāstaccākhyeyaṃ tvayā mama //

damayantyaivamuktā sā jagāmātha ca keśinī /
niśāmyātha hayajñasya liṅgāni punarāgamat //

sā tatsarvaṃ yathāvṛttaṃ damayantyai nyavedayat /
nimittaṃ yattayā dṛṣṭaṃ bāhuke divyamānuṣam //
keśinyuvāca /

dṛḍhaṃ śucyapadānosau na mayā mānuṣaḥ kvacit /
dṛṣṭapūrvaḥ śruto vā'pi damayanti tathāvidhaḥ //

hrasvamāsādya tu dvāraṃ nāsau vinamate kvacit / taṃ tu dṛṣṭvā yathāsaṅgamutsarpati yathāsukham /
sankaṭe'pyasya sumahadvivaraṃ jāyate'dhikam //

ṛtuparṇasya cārthāya bhojanīyamanekaśaḥ / ṛtuparṇasya cārthāya bhojanīyamanekaśaḥ /
preṣitaṃ tatrarājñā tu māṃsaṃ bahu ca pāśavam //

tasya prakṣālanārthāya kumbhāstatropakalpitāḥ /
te tenāvekṣitāḥ kumbhāḥ pūrṇā evābhavaṃstataḥ //

tataḥ prakṣālanaṃ kṛtvā samadhiśritya bāhukaḥ /
tṛṇamuṣṭiṃ samādāya savitustaṃ samādadhat //

atha prajvalitastatra sahasā havyavāhanaḥ /
tadadbhutatamaṃ dṛṣṭvā vismitā'mihāgatā //

anyacca tasminsumahadāścaryaṃ lakṣitaṃ mayā /
yadagnimapi saṃspṛśya naivāsau dahyate śubhe //

chandena codakaṃ tasya vahatyāvarjitaṃ drutam /
atīva cānyatsumahadāścaryaṃ dṛṣṭavatyaham //

yatsa puṣpāṇyupādāya hastābhyāṃ mamṛde śanaiḥ / mṛdyamānāni pāṇibhyāṃ tena puṣpāṇi nānyathā /
bhūya eva sugandhīni hṛpitāni bhavanti hi //

etānyadbhutakalpāni dṛṣṭvā'haṃ bhṛśavismitā /
ceṣṭitāni viśālākṣi bāhukasya samīpataḥ //
bṛhadaśva uvāca /

damayantī tu tacchrutvā puṇyaślokasya ceṣṭitam /
amanyata nalaṃ prāptaṃ karmaceṣṭābhisūcitam //

sā śaṅkamānā bhartāraṃ nalaṃ bāhukarūpiṇam /
keśinīṃ ślakṣṇayā vācā rudantī punarabravīt //

punargaccha pramattasya bāhukasyopasaṃskṛtam /
mahānasācchritaṃ māṃsamānayasveha bhāmini //

sā dṛṣṭvābāhuke vyagre tanmāṃsamapakṛṣya ca / atyuṣṇameva tvaritā tatkṣaṇātpriyakāriṇī /
damayantyai tataḥ prādātkeśinī kurunandana //

sā'śitā nalasiddhas māṃsasya bahuśaḥ purā /
prāśya matvā nalaṃ sūtaṃ prākrośadbhṛśaduḥkhitā //

vaiklavyaṃ paramaṃ gatvāprakṣālya ca mukhaṃ tataḥ /
mithunaṃ preṣayāmāsa keśinyā saha bhārat //

indrasenāṃ saha bhrātrā samabhijñāya bāhukaḥ /
abhidrutya tadā rājā pariṣvajyāṅkamānayat //

bāhukastu samāsādya sutau surasutopamau /
bhṛśaṃ duḥkhaparītātmā susvaraṃ praruroda ha //

naiṣadho darśayitvā tu vikāramasakṛttadā /
utsṛjya sahasā putrau keśinīmidamabravīt //

idaṃ ca madṛśaṃ bhadre mithunaṃ mama putrayoḥ /
ato dṛṣṭvaiva sahasā bāṣpamutsṛṣṭavānaham //

bahuśaḥ sampatantīṃ tvāṃ janaḥ śaṅketa doṣataḥ / vayañca deśātithayo gaccha bhadre yathāsukham //