Mahabharata · Chapter 3.68

atha dīrghasya kālasya parṇādo nāma vai dvijaḥ /
pratyetya nagaraṃ bhaimīmidaṃ vacanamabravīt //

naiṣadhaṃ mṛgayāṇena damayanti divāniśam /
ayodhyāṃ nagarīṃ gatvā bhāgasvarirupasthitaḥ //

śrāvitaśca mayā vākyaṃ tvadīyaṃ sa mahājane /
ṛtuparṇo mahābhāgo yathoktaṃ varavarṇini //

tacchrutvā nābravītkiñcidṛtuparṇo narādhipaḥ /
na ca pāriṣadaḥ kaścidbhāṣyamāṇo mayā'sakṛt //

anujñātaṃ tu māṃ rājñā vijane kaścidabravīt /
ṛtuparṇasya puruṣo bāhuko nāma nāmataḥ //

sūtastasya narendrasya virūpo hrasvabāhukaḥ /
śīghrayāneṣu kuśalo mṛṣṭakartā ca bhojane //

sa viniḥśvasya baṃhuśo ruditvā ca ṣunaḥpunaḥ /
kuśalaṃ caiva māṃ pṛṣṭvā paścādidamabhāṣata //

vaiṣamyamapi samprāptā gopāyanti kulastriyaḥ /
ātmānamātmanā satyo jitaḥ svargo na saṃśayaḥ //

rahitā bhartṛbhiścaiva na kupyanti kadācana / 3-68-9bprāṇāṃścāritrakavacāndhārayanti varastriyaḥ //

viṣamasthena mūḍhena paribhraṣṭasukhena ca /
yatsā tena parityaktā tatra na kroddhumarhati //

prāṇayātrāṃ pariprepsoḥ śakunairhṛtavāsasaḥ /
ādhibhirdahyamānasya śyāmā na kroddhumarhati //

satkṛtā'satkṛtā vā'pi patiṃ dṛṣṭvā tathāgatam /
bhraṣṭarājyaṃ śrityā hīnaṃ śyāmā na kroddhumarhati //

tasya tadvacanaṃ śrutvā tvarito'hamihāgataḥ /
śrutvā pramāṇaṃ bhavatī rājñaścaiva nivedayaḥ //

etacchrutvā'śrupūrṇākṣī parṇādasya viśāmpate /
damayantī raho'bhyetya mātaraṃ pratyabhāpata //

ayamarthau na saṃvedyo bhīme mātaḥ kadācana /
tvatsannidhau niyokṣye'haṃsudevaṃ dvijasattamam //

yathā na nṛpatirbhīmaḥ pratipadyeta me matam /
yathā tvayā prakartavyaṃ mama cetpriyamicchasi //

yathā cāhaṃ samānītā sudevenāśu bāndhavān /
tenaiva maṅgalenādya sudevo yātu mā ciram //

samānetuṃ nalaṃ mātarayodhyāṃ nagarīmitaḥ /
ṛtuparṇasya nagare nivasantamarindamam //

viśrāntaṃ tu tataḥ paścātparṇādaṃ dvijasattamam /
arcayāmāsa vaidarbhī dhanenātīva bhāminī //

lavāca cainaṃ mahatā sampūjya draviṇena vai / nale cehāgate vipra bhūyo dāsyābhi te vasu //

tvayā hi me bahukṛtaṃyadanyo na kariṣyati /
yadbhartrā'haṃ sameṣyāmi śīghrameva dvijottama //

sa evamukto'thāśvāsya āśīrvādaiḥ sumaṅgalaiḥ /
gṛhānupayayau cāpi kṛtārthaḥ sumahāmanāḥ //

tataḥ sudevamānāyya damayantī yudhiṣṭhira /
abravītsannidau māturduḥkhaśokasamanvitā //

gatvā sudeva nagarīmayodhyāvāsinaṃ nṛpam /
ṛtuparṇaṃ vaco brūhi patimanyaṃ cikīrṣatī //

āsthāsyati punarbhaimī damayantī svayaṃvaram /
tatra gacchanti rājāno rājaputrāśca sarvaśaḥ //

tathā ca gaṇitaḥ kālaḥ śvobhūte sa bhaviṣyati /
yadi sambhāvinīyaṃ te gaccha śīghramarindama //

sūryodaye dvatīyaṃ sā bhartāraṃ varayiṣyati /
na hi sa jñāyate vīro nalo jīvanmṛtopi vā //

evaṃ tathā yathokto vai gatvā rājānamabravīt / ṛtuparṇaṃ mahārāja sudevo brāhmaṇastadā //