Mahabharata · Chapter 3.63

utsṛjya damayantīṃ tu nalo rājā viśāmpate /
dadarśa dāvaṃ dahyantaṃ mahāntaṃ gahane vane //

tatra suśrāva śabdaṃvai madhye bhūtasya kasyacit /
abhidhāva naletyuccaiḥ puṇyaśloketi cāsakṛt //

mā bhairiti nalaścoktvā madhyamagneḥ praviśya tam /
dadraśa nāgarājānaṃ śayānaṃ kuṇḍalīkṛtam //

sa nāgaḥ prañjalirbhūtvā vepamāno nalaṃ tadā /
uvāca māṃ viddhirājannāgaṃ karkoṭakaṃ nṛpa //

mayā pralabdho brahmarṣiranāgāḥ sumahātapāḥ /
tena manyuparītena śaptosmi manujādhipa //

tiṣṭha tvaṃ sthāvara iva yāvadeti nalaḥ kvacit /
ito netāsi tatsa tvaṃ śāpānmokṣyasi matkṛtāt //

tasya śāpānna śaknomi padādvicalituṃ padam /
upadekṣyāmi te śreyastrātumarhati māṃ bhavān //

sakhā ca te bhaviṣyāmi matsamo nāsti pannagaḥ /
laghuśca te bhaviṣyāmi śīghramādāya gaccha mām //

evamuktvā sa nāgendro babhūvāṅguṣṭhamātrakaḥ /
daṃ gṛhītvā nalaḥ prāyāddeśaṃ dāvavivarjitam //

ākāśadeśamāsādya vimuktaṃ kṛṣṇavartmanā /
utsraṣṭukāmaṃ taṃ nāgaḥ punaḥ karkoṭako'bravīt //

padāni gaṇayangaccha svāni naiṣadha kānicit /
tatrate'haṃ mahābāho śreyo dhāsyāmi yatparam //

tataḥ saṃkhyātumārabdhamadaśaddaśame pade /
tasya daṣṭasya tadrūpaṃ kṣipramantaradhīyata //

sa dṛṣṭvā vismitastasthāvātmānaṃ vikṛtaṃ nalaḥ /
svarūpadhāriṇaṃ nāgaṃ dadarśa sa mahīpatiḥ //

tataḥ karkoṭako nāgaḥ sāntvayannalamabravīt /
mayā te'ntarhitaṃ rūpaṃ na tvāṃ vidyurjanā iti //

yatkṛte cāsi nikṛto duḥkhena mahatā nala /
viṣeṇa sa madīyena tvayi duḥkhaṃ nivatsyati //

viṣeṇa saṃvṛtairgātrairyāvattvāṃ na vimokṣyati /
tāvattu tvāṃ mahārāja kleśe'sminsa niyokṣyati //

anāgā yena nikṛtastvamanarho janādhipa /
krodhādasūyayitvā taṃ rakṣā me bhavataḥ kṛtā //

na te bhayaṃ naravyāghra daṃṣṭribhyaḥ śatrutopi vā /
brahmavittvaṃ ca bhavitā matprasādānnarādhipa //

rājanviṣanimittā ca na te pīḍā bhaviṣyati /
sangrāmeṣu na rājendraśaśvajjayamavāpsyasi //

gaccha rājannitaḥ sūto bāhuko'hamiti bruvan /
samīpamṛtuparṇasya sa hi vedākṣanaipuṇam //

ayodhyāṃ nagarīṃ ramyāmadya vai niṣadheśvara /
sa te'kṣahṛdayaṃ dātā rājā'śvahṛdayena vai //

ikṣvākukulajaḥ śrīmānmitraṃ caiva bhaviṣyati /
bhaviṣyasi yadā'kṣajñaḥ śreyasā yokṣyase tadā //

saṃyokṣyase svadāraistvaṃ mā sma śoke manaḥ kṛthāḥ /
rājyena tanayābhyāṃ ca satyametadbravīmi te //

svaṃ rūpaṃ ca yadā draṣṭumicchethāstvaṃ narādhipa /
saṃsmartavyastadā te'haṃvāsaścadaṃ vivāsayeḥ //

anena vāsasācchannaḥ svaṃ rūpaṃ pratipatsyase /
ityuktvā pradadau tasmai divyaṃ vāsoyugaṃ tadā //

evaṃ nalaṃ ca sandiśya vāso dattāva ca kaurava / nāgarājastato rājaṃstatraivāntaradhīyata //