Mahabharata · Chapter 3.64

tasminnantarhite nāge prayayau naiṣadho nalaḥ /
ṛtuparṇasya nagaraṃ prāviśaddaśame'hani //

sa rājānamupātiṣṭhadbāhuko'hamiti bruvan /
aśvānāṃ vāhane yuktaḥ pṛthivyāṃ nāsti matsamaḥ //

arthakṛcchreṣu caivāhaṃ praṣṭavyo naipuṇeṣu ca /
annasaṃskāramapi ca jānāmyanyairviśeṣataḥ //

yāni śilpāni loke'sminyaccaivānyatsuduṣkaram /
sarvaṃ yatiṣye tatkartumṛtuparṇa bharasva mām //

ityuktaḥ sa nalenātha ṛtuparṇo narādhipaḥ /
uvāca suprītamanāstaṃ prekṣya ca mahīpate //

vasabāhuka bhadraṃ te sarvametatkariṣyasi /
śīghrayāne sadā buddhirdhriyate me viśeṣataḥ //

sa tvamātiṣṭha yogaṃ taṃ yena śīdhrāṃ hayā mama /
bhaveyuraśvādhyakṣosi vetanaṃ te śataṃśatam //

tvāmupasthāsyataścaiva nityaṃ vārṣṇeyajīvalau /
etābhyāṃ raṃsyase sārdhaṃ vasa vai mayi bāhuka //
bṛhadaśva uvāca /

evamukto nalastena nyavasattatrapūjitaḥ /
ṛtuparṇasya nagare sahavārṣṇeyajīvalaḥ //

sa vai tatrāvasadrājā vaidarbhīmanucintayan /
sāyaṃsāyaṃ sadā cemaṃ ślokamekaṃ jagāda ha //

kva nu sā kṣutpipāsārtā śrāntā śete tapasvinī /
smarantī tasya mandasya kaṃ vā'sādyopatiṣṭhati //

evaṃ bruvantaṃ rājānaṃ niśāyāṃ jīvalo'bravīt / kāmenāṃ śocase nityaṃ śrotumicchāmi bāhuka /
āyuṣmankasya vā nārī yāmevamanuśocasi //

tamuvāca nalo rājā mandaprajñasya kasyacit /
āsīdbahumatā nārī tasyā dṛḍhataraśca saḥ //

sa vai kenacidarthena tayā mando vyayujyata /
viprayuktaḥ sa mandātmā bhramatyasukhapīḍitaḥ //

dahyamānaḥ sa śokena divārātramatandritaḥ /
niśākāle smaraṃstasyāḥ ślokamekaṃ sma gāyati //

sa vibhramanmahīṃ sarvāṃ kvacidāsādya kiñcana /
vasatyanarhastadduḥkhaṃ bhūya evānusaṃsmaran //

sā tu taṃ puruṣaṃ nārī kṛcche'pyanugatā vane /
tyaktā tenālpabhāgyena duṣkaraṃ yadi jīvati //

ekā bālā'nabhijñā ca mārgamāṇā'tathocitā /
kṣutpipāsāparītāṅgī duṣkaraṃ yadi jīvati //

śvāpadācarite nityaṃ vane mahati dāruṇe /
tyaktā tenālpabhāgyena mandaprajñena māriṣa //

ityevaṃ naiṣadho rājā damayantīmanusmaran / ajñātavāsaṃ nyavasadrājñastasya naveśane //