Mahabharata · Chapter 3.59

ityuktaḥ sa tadā devyā nalo vacanamabravīt / yathā rājyantava pitustathā mama nasaṃśayaḥ /
na tu tatra gamiṣyāmi viṣamasthaḥ kathañcana //

kathaṃ samṛddho gatvā'haṃ tava harṣavivardhanaḥ /
paridyūno gamiṣyāmi tava śokavivardhanaḥ //

iti bruvannalo rājā damayantīṃ punaḥ punaḥ /
sānkhayāmāsa kalyāṇīṃ vāsasordhena saṃvṛtām //

tāvekavastrasaṃvītāvaṭamānāvitastataḥ /
kṣutpipāsāpariśrāntau sabhāṃ kāñcidupeyatuḥ //

tāṃ sabhāmupasamprāpya tadā sa niṣadhādhipaḥ /
vaidarbhyā sahito rājā niṣasāda mahītale //

sa vai vivastro malino vivarṇaḥ pāṃsuguṇṭhitaḥ /
damayantyā saha śrāntaḥ suṣvāpa dharaṇītale //

tataḥ svavasanasyāntaṃ damayantī viśāmpate / bhūmāvāstīrya suṣvāpa patimāliṅgya śobhanā //

damayanatyapi kalyāṇī nidrayā'pahṛtā tataḥ /
sahasā duḥkhamāsādya sukumārī tapasvinī //

suptāyāṃ damayantyāṃ tu nalo rājā viśāmpate /
śokonmathitacittaḥ sanna sma śete yathā purā //

sa tadrājyāpaharaṇaṃ suhṛttyāgaṃ ca sarvaśaḥ /
vane ca taṃ paridhvaṃsaṃ prekṣya cintāmupeyivān //

kiṃ nu me syādidaṃ kṛtvā kinnu me syādakurvataḥ /
kinnu me maraṇaṃ śreyaḥ parityāgo janasya vā //

māmiyaṃ hyanuraktaivaṃ duḥkhamāpnoti matkṛte /
madvihīnā tviyaṃ gacchetkadācitsvajanaṃ prati //

mayā niḥsaṃśayaṃ dukhamiyaṃ prāpsyatyanuvratā /
utsargesaṃśayaḥ syāttu vindetāpi sukhaṃ kvacit //
bṛhadaśca uvāca /

sa viniścitya bahudhā vicārya ca punaḥpunaḥ /
utsarge'manyata śreyo damayantyā narādhipa //

na caiṣā tejasā śakyā kaiściddharṣayituṃ pathi /
yaśasvinī mahābhāgā madbhakteyaṃ pativratā //

evaṃ tas tadā buddhirdamayantyāṃ nyavartata /
kalinā duṣṭabhāvena damayantyā visarjane //

so'vastratāmātmanaśca tasyāścāpyekavastratām /
cintayitvā'dhyagādrājā vastrārdhasyāvakartanam //

kathaṃ vāso vikarteyaṃ na ca buddhyeta me priyā /
vicintyaivaṃ nalo rājā sabhāṃ paryacarattadā //

paridhāvannatha nala itaścetaśca bhārata /
āsasāda sabhoddeśe vikośaṃ svaṅgamuttamam //

tenārdhaṃ vāsasaśchittvā nivas ca parantapaḥ /
suptāmutsṛjya vaidarbhīṃ prādravadgatacetanām //

tato nibaddhahṛdayaḥ punarāgam tāṃ sabhām /
damayantīṃ tadā dṛṣṭvā ruroda niṣadhādhipaḥ //

yāṃ na vāyurna cādityaḥ purā paśyati me priyām /
seyamadya sabhāmadhye śete bhūmāvanāthavat //

iyaṃ vastrāvakartena saṃvītā cāruhāsinī /
unmatteva mayā hīnā kathaṃ buddhvā bhaviṣyati //

kathamekā satī bhamī mayā virahitā śubhā /
cariṣyati vane ghore mṛgavyālaniṣevite //

ādityā vasavo rudrā aśvinau samarudgaṇau /
rakṣantu tvāṃ mahābhāge dharmeṇāsi samāvṛtā //

evamuktvā priyāṃ bhāryāṃ rūpeṇāpratimāṃ bhuṣi /
kalinā'pahṛtajñāno nalaḥ prātipaṣṭhadudyataḥ //

gatvāgatvā nalo rājā punareti sabhāṃ muhuḥ /
ākṛṣyamāṇaḥ kalinā sauhṛdenāvakṛṣyate //

dvidheva hṛdayaṃ tasya duḥkhitasyābhavattadā /
doleva muhurāyāti yāti caiva muhurmuhuḥ //

avakṛṣṭastu kalinā mohitaḥ prādravannalaḥ /
suptāmutsṛjya tāṃ bhāryāṃ vilapya karuṇaṃ bahu //

naṣṭātmā kalinā'viṣṭastattadvigaṇayanmuhuḥ / jagāmaikāṃ vane śūnye bhāryāmutsṛjya mohitaḥ //