Mahabharata · Chapter 3.57

damayantī tato dṛṣṭvā puṇyaślokaṃ narādhipam /
unmattavadanunmattā devane kṛtacetasam //

bhayaśokasamāviṣṭā rājanbhīmasutā tataḥ /
cintayāmāsa tatkāryaṃ sumahatpārthivaṃ prati //

sā śaṅkamānā tatpāpaṃ cikīrṣantī ca tatpriyam /
nalaṃ ca hṛtasarvasvamupalabhyedamabravīt //

bṛhatsenāmatiyaśāṃ tāṃ dhātrīṃ paricārikām /
hitāṃ sarvārthakuśalāmanuraktāṃ subhāṣitām //

bṛhansene vrajāmātyānānāyya nalaṃśāsanāt /
ācakṣva yaddhṛtaṃ dravyamavaśiṣṭaṃ ca yadvasu //

ityevaṃ sā samādiṣṭā bṛhatsenā nareśvara / uvāca devyā vacanaṃ mantriṇāṃ sā samīpata //

tataste mantriṇaḥ sarve vijñāya nalaśāsanam /
api no bhāgadheyaṃ syādityuktvā punarāvrajan //

tāstu sarvāḥ prakṛtayo dvitīyaṃ samupasthitāḥ /
nyavedayadbhīmasutā na ca tatpratyanandata //

vākyamapratinandantaṃ bhartāramabhivīkṣya sā /
damayantī punarveśma vrīḍitā praviveśa ha //

niśāmya satataṃ cākṣānpuṇyaślokaparāṅyukhān /
nalaṃ ca hṛtasarvasvaṃ dhātrīṃ punaruvāca ha //

bṛhatsene punargaccha vārṣṇeyaṃ nalaśāsanāt /
sūtamānaya kalyāṇi mahatkāryamupasthitam //

bṛhatsenā tu sā śrutvā damayantyāḥ prabhāpitam /
vārṣṇeyamānayāmāsa puruṣairāptakāribhiḥ //

vārṣṇeyaṃ tu tato bhaimī sāntvayacchlakṣṇayā girā /
uvāca deśakālajñā prāptakālamaninditā //

jānaṣe tvaṃ yathā rājā samyagvṛttaḥ sadā tvayi /
tasya tvaṃ vipamasthasya sāhāyyaṃ kartumarhasi //

yathāyathā hi nṛpatiḥ puṣkareṇaiva jīyate /
tathātathā'sya vai dyūte rāgo bhūyo'bhivardhate //

yathā ca puṣkarasyākṣāḥ patanti vaśavartinaḥ /
tathā viparyayaścāpi nalasyākṣeṣu dṛśyate //

suhṛtsvajanavākyāni yathā'yaṃ na śṛṇoti ca /
mamāpi ca tathā vākyaṃ nābhinandati naiṣadha //

yathā rājñaḥ pradīptānāṃ bhāgyānāmadya sārathe /
nūnaṃ manye na śeṣosti naiṣadhasya mahātmanaḥ //

yattu me vacanaṃ rājā nābhinandati mohitaḥ / śaraṇaṃ tvāṃ prapannā'smi sārathe kuru madvacaḥ /
na hi me śudhte bhāvo vināśaṃ prati sārathe //

nalasya dayitānaśvānyojayitvā manojavān /
rathamāropya mithunaṃ kuṇḍinaṃ yāturmahasi //

mama jñātiṣu nikṣipya dārakau syandanaṃ tathā /
aśvāṃścemānyathākāmaṃ vasa vā'nyatra gacchavā //

damayantyāstu tadvākyaṃ vārṇyeyo nalasārathiḥ /
nyavedayadaśeṣeṇa nalāmātyeṣu mukhyaśaḥ //

taiḥ sametya viniścitya so'nujñāto mahīpate /
yayau mithunamāropya vidarbhāṃstena vāhinā //

hayāṃstatra vinikṣipya sūto rathavaraṃ ca tam /
indrasenāṃ ca tāṃ kanyāmindrasenaṃ ca bālakam //

āmantrya bhīmaṃ rājānamārtaḥ śocannalaṃ nṛpam / kva nu yāsyāmi manasā cintayāno muhurmuhuḥ /
aṭamānastato'yodhyāṃ jagāma nagarīṃ tadā //

ṛtuparṇaṃ sa rājānamupatasthe suduḥkhitaḥ / bhṛtiṃ ca sa dadau cāsya sārathyena niyojitaḥ //