Mahabharata · Chapter 3.56

evaṃ sa samayaṃ kṛtvā dvāpareṇa kaliḥ saha /
ājagāma tatastatra yatrarājā sa naiṣadhaḥ //

sa nityamantaraprekṣī niṣadheṣvavasacciram /
athāsya dvādaśe varṣe dadarśa kalirantaram //

kṛtvā mūtramupaspṛśya sandhyāmanvāsta naiṣadhaḥ /
akṛtvā pādayoḥ śaucaṃ tatrainaṃ kalirāviśat //

sa samāviśya ca nalaṃ samīpaṃ puṣkarasya ca /
gatvā puṣkaramāhedamehi dīvya nalena vai //

akṣadyūte nalaṃ jetā bhavānhi sahito mayā /
niṣadhānpratipadyasva jitvā rājyaṃ nalaṃ nṛpam //

evamuktastu kalinā puṣkaro nalamabhyayāt /
kaliścaiva vṛṣo bhūtvā taṃ vai puṣkaramanvayāt //

āsādya tu nalaṃ vīraṃ puṣkaraḥ paravīrahā /
dīvyāvetyabravīddhātā vṛṣeṇeti muhurmuhuḥ //

na cakṣame tato rājā samāhvānaṃ mahāmanāḥ /
vaidarbhyāḥ prekṣamāṇāyāḥ prāptakālamamanyata //

tataḥ sa rājñā sahasā devituṃ sampracakrame //

bhrātrā devābhibhūtena daivāviṣṭo janādhipaḥ / hiraṇyasya suvarṇasya yānayugyas vāsasām /
āviṣṭaḥ kalinā dyūte jīyate sma nalastadā //

tamakṣamadasammattaṃ suhṛdāṃ na tu kaścana /
nivāraṇe'bhavacchakto dīvyamānamarindamam //

tataḥ paurajanāḥ sarve mantribhiḥ saha bhārata /
rājānaṃ draṣṭumāgacchannivārayitumāturam //

tataḥ sūta upāgamya damayantyai nyavedayat /
eṣa paurajano devi dvāri tiṣṭhati kāryavān //

nivedyatāṃ naiṣadhāya sarvāḥ prakṛtayaḥ sthitāḥ /
amṛṣyamāṇā vyasanaṃ rājño dharmārthadarśinaḥ //

tataḥ sā bāṣpakalayā vācā dukhena karśitā /
uvāca naiṣadhaṃ bhaimī śokopahatacetanā //

rājanpaurajano dvāri tvāṃ didṛkṣuravasthitaḥ /
vṛddhairbrāhmaṇamukhyaiśca vaṇigbhiśca samanvitaḥ //

āgataṃ sahitaṃ rājaṃstvatprasādāvalambanam / taṃ draṣṭumarhasītyevaṃ punaḥ punarabhāṣata //

tāṃ tathā rucirāpāṅgīṃ vilapantīṃ tathāvidhām /
āviṣṭaḥ kalinā rājā nābhyabhāṣata kiñcana //

tataste mantriṇaḥ sarve te caiva puravāsinaḥ /
nāyamastīti duḥkhārtā vrīḍitā jagmurālayān //

tathā tadabhavaddyūtaṃ puṣkarasya nalasya ca / yudhiṣṭhira bahūnmāsānpuṇyaślokastvajīyata //