Mahabharata · Chapter 3.55

vṛte tu naiṣadhe bhaimyā lokapālā mahaujasaḥ /
yānto dadṛśurāyāntaṃ dvāparaṃ kalinā saha //

athābravītkaliṃ śakraḥ samprekṣya balavṛtrahā /
dvāpareṇa sahāyena kale brūhi kva yāsyasi //

tato'bravītkaliḥ śakraṃ damayantyāḥ svayaṃvaram /
gatvā hi varayiṣye tāṃ mano hi mama tāṃ gatam //

tamabravītprahasyendro nirvṛttaḥ sa svayaṃvaraḥ /
vṛtastayā nalo rājā patirasmatsamīpataḥ //

evamuktastu śakreṇa kaliḥ kopasamanvitaḥ /
devānāmantrya tānsarvānuvācedaṃ vacastadā //

devānāṃ mānuṣaṃ madhye yatsā patimavindata /
nanu tasyā bhavennyāyyaṃ vipulaṃ daṇḍadhāraṇam //

evamukte tu kalinā pratyūcuste divaukasaḥ /
asmābhiḥ sabhanujñāte damayantyā nalo vṛtaḥ //

kā hi sarvaguṇopetaṃ nāśrayeta nalaṃ nṛpam /
yo veda dharmānakhilānyathāvaccaritavrataḥ //

yo'dhīte caturo vedānsarvānākhyānapañcamān /
ahiṃsānirato yaśca satyavādī dṛḍhavrataḥ //

yasmindākṣyaṃ dhṛtirjñānaṃ tapaḥ śaucaṃ damaḥ śamaḥ /
dhruvāṇi puruṣavyāghre lokapālasame nṛpe //

evaṃrūpaṃ nalaṃ yo vai kāmayecchapituṃ kale /
ātmānaṃ sa śapenmūḍho hanyādātmānamātmanā //

evanguṇaṃ nalaṃ yo vai kāmayecchapituṃ kale /
kṛcchre sa narake mañjedagādhe vipule hrade //

evamuktvā kaliṃ devā dvāparaṃ ca divaṃ yayuḥ /
tato gateṣu deveṣu kalirdvāparamabravīt //

saṃyantuṃ notsahe kopaṃ nale vatsyāmi dvāpara /
bhraṃśayiṣyāmi taṃ rājyānna bhaimyā saha raṃsyate //

tvamapyakṣānsamāviśya sāhāyyaṃ kartumarhasi / mama priyakṛte hyasmankṛtavāṃśca bhaviṣyasi //