મહાભારત · અધ્યાય 3.56

એવં સ સમયં કૃત્વા દ્વાપરેણ કલિઃ સહ ।
આજગામ તતસ્તત્ર યત્રરાજા સ નૈષધઃ ॥

સ નિત્યમન્તરપ્રેક્ષી નિષધેષ્વવસચ્ચિરમ્ ।
અથાસ્ય દ્વાદશે વર્ષે દદર્શ કલિરન્તરમ્ ॥

કૃત્વા મૂત્રમુપસ્પૃશ્ય સન્ધ્યામન્વાસ્ત નૈષધઃ ।
અકૃત્વા પાદયોઃ શૌચં તત્રૈનં કલિરાવિશત્ ॥

સ સમાવિશ્ય ચ નલં સમીપં પુષ્કરસ્ય ચ ।
ગત્વા પુષ્કરમાહેદમેહિ દીવ્ય નલેન વૈ ॥

અક્ષદ્યૂતે નલં જેતા ભવાન્હિ સહિતો મયા ।
નિષધાન્પ્રતિપદ્યસ્વ જિત્વા રાજ્યં નલં નૃપમ્ ॥

એવમુક્તસ્તુ કલિના પુષ્કરો નલમભ્યયાત્ ।
કલિશ્ચૈવ વૃષો ભૂત્વા તં વૈ પુષ્કરમન્વયાત્ ॥

આસાદ્ય તુ નલં વીરં પુષ્કરઃ પરવીરહા ।
દીવ્યાવેત્યબ્રવીદ્ધાતા વૃષેણેતિ મુહુર્મુહુઃ ॥

ન ચક્ષમે તતો રાજા સમાહ્વાનં મહામનાઃ ।
વૈદર્ભ્યાઃ પ્રેક્ષમાણાયાઃ પ્રાપ્તકાલમમન્યત ॥

તતઃ સ રાજ્ઞા સહસા દેવિતું સમ્પ્રચક્રમે ॥

ભ્રાત્રા દેવાભિભૂતેન દૈવાવિષ્ટો જનાધિપઃ । હિરણ્યસ્ય સુવર્ણસ્ય યાનયુગ્યસ્ વાસસામ્ ।
આવિષ્ટઃ કલિના દ્યૂતે જીયતે સ્મ નલસ્તદા ॥

તમક્ષમદસમ્મત્તં સુહૃદાં ન તુ કશ્ચન ।
નિવારણેઽભવચ્છક્તો દીવ્યમાનમરિન્દમમ્ ॥

તતઃ પૌરજનાઃ સર્વે મન્ત્રિભિઃ સહ ભારત ।
રાજાનં દ્રષ્ટુમાગચ્છન્નિવારયિતુમાતુરમ્ ॥

તતઃ સૂત ઉપાગમ્ય દમયન્ત્યૈ ન્યવેદયત્ ।
એષ પૌરજનો દેવિ દ્વારિ તિષ્ઠતિ કાર્યવાન્ ॥

નિવેદ્યતાં નૈષધાય સર્વાઃ પ્રકૃતયઃ સ્થિતાઃ ।
અમૃષ્યમાણા વ્યસનં રાજ્ઞો ધર્માર્થદર્શિનઃ ॥

તતઃ સા બાષ્પકલયા વાચા દુખેન કર્શિતા ।
ઉવાચ નૈષધં ભૈમી શોકોપહતચેતના ॥

રાજન્પૌરજનો દ્વારિ ત્વાં દિદૃક્ષુરવસ્થિતઃ ।
વૃદ્ધૈર્બ્રાહ્મણમુખ્યૈશ્ચ વણિગ્ભિશ્ચ સમન્વિતઃ ॥

આગતં સહિતં રાજંસ્ત્વત્પ્રસાદાવલમ્બનમ્ । તં દ્રષ્ટુમર્હસીત્યેવં પુનઃ પુનરભાષત ॥

તાં તથા રુચિરાપાઙ્ગીં વિલપન્તીં તથાવિધામ્ ।
આવિષ્ટઃ કલિના રાજા નાભ્યભાષત કિઞ્ચન ॥

તતસ્તે મન્ત્રિણઃ સર્વે તે ચૈવ પુરવાસિનઃ ।
નાયમસ્તીતિ દુઃખાર્તા વ્રીડિતા જગ્મુરાલયાન્ ॥

તથા તદભવદ્દ્યૂતં પુષ્કરસ્ય નલસ્ય ચ । યુધિષ્ઠિર બહૂન્માસાન્પુણ્યશ્લોકસ્ત્વજીયત ॥