Mahabharata · Chapter 3.53

sā namaskṛtya devebhyaḥ prahasya nalamabravīt /
praṇayasva yathāśraddhaṃ rājankiṃ karavāṇi te //

ahaṃ caiva hi yaccānyanmamāsti vasu kiñcanā /
tatsarvaṃ tava visrabdhaṃ kuru praṇayamīśvara //

haṃsānāṃ vacanaṃ yattu tanmāṃ dahati pārthiva /
tvatkṛte hi mayā vīra rājānaḥ sannipātitāḥ //

yadi tvaṃ bhajamānāṃ māṃ pratyākhyāsyasi mānada /
viṣamagniṃ jalaṃ rajjumāsthāsye tava kāraṇāt //

evamuktastu vaidarbhyā nalastāṃ pratyuvāca ha /
tiṣṭhatsu lokapāleṣu kathaṃ mānuṣamicchasi //

yeṣāmahaṃ lokakṛtāmīśvarāṇāṃ mahātmanām /
na pādarajasā tulyo manaste teṣu vartatām //

vipriyaṃ hyācaranmartyo devānāṃ mṛtyucchati /
trāhi māmanavadyāṅgi varayasva surottamān //

virajāṃsi ca vāsāṃsi divyāścitrāḥ srajastathā /
bhūṣaṇāni tu divyāni devānprāpya tu bhuṅkṣva vai //

ya imāṃ pṛthivīṃ kṛtsnāṃ sankṣipya grasate punaḥ /
hutāśamīśaṃ devānāṃ kā taṃ na varayetpatim //

yas daṇḍabhayātsarve bhūtagrāmāḥ samāgatāḥ /
dharmamevānurudhyanti kā taṃ na varayetpatim //

dharmātmānaṃ mahātmānaṃ daityadānavamardanam /
mahendraṃ sarvadevānāṃ kā taṃ na varayetpatim //

kriyatāmaviśaṅkena manasā yadi manyase /
varuṇaṃ lokapālānāṃ suhṛdvākyamidaṃ śṛṇu //

naiṣadhenaivamuktā sā damayantī baco'bravīt /
samāplutābhyāṃ netrābhyāṃ śokajenātha vāriṇā //

devebhyo'haṃ namaskṛt yasarvebhyaḥ pṛthivīpate /
vṛṇe tvāmeva bhartāraṃ satyametadbravīmi te //

tāmuvāca tato rājā veṣamānāṃ kṛtāñjalim /
dautyenāgatya kalyāṇi notsahe svārthamīpsitaṃ //

kathaṃ hyahaṃ pratiśrutya devatānāṃ viśeṣataḥ /
parārthe yatnamārabhya kathaṃ svārthamihotsahe //

eṣa dharmo yadi svārtho mamāpi bhavitā tataḥ /
evaṃ svārthaṃ kariṣyāmi tathā bhadre vidhīyatām //

tato bāṣpākulāṃvācaṃ damayantī śucismitā /
pratyāharantī śanakairnalaṃ rājānamabravīt //

astyupāyo mayā dṛṣṭo nirapāyo nareśvara /
yena doṣo na bhavitā tava rājankathañcana //

tvaṃ caiva hi naraśreṣṭha devāścendrapurogamāḥ /
āyāntu sahitāḥ sarve mama yatra svayaṃvaraḥ //

tato'haṃ lokapālānāṃ sannidhau tvāṃ nareśvara /
varayiṣye naravyāghra naivaṃ doṣo bhaviṣyati //

evamuktastu vaidarbhyā nalo rājā viśampate /
ājagāma punastatra yatra devāḥ samāgatāḥ //

tamapaśyaṃstathā'yāntaṃ lokapālā maheśvarāḥ /
dṛṣṭvā cainaṃ tato'pṛcchanvṛttāntaṃ sarvameva tam //

kacciddṛṣṭā tvayā rājandamayantī śucismitā /
kimabravīcca naḥ sarvānvada bhūmipate'nagha //
nala uvāca /

bhavadbhirahamādiṣṭo damayantyā niveśanam /
praviṣṭaḥ sumahākakṣyaṃ daṇḍibhiḥ sthavirairvṛtam //

praviśantaṃ ca māṃ tatra na kaściddṛṣṭavānnaraḥ /
ṛte tāṃ pārtivasutāṃ bhavatāmeva tejasā //

sakhyaścāsyā mayā dṛṣṭāstābhiścāpyupalakṣitaḥ /
vismitāścābhavansarvā dṛṣṭvā māṃ vibudheśvarāḥ //

varṇyamāneṣu ca mayā bhavatsu rucirānanāṃ /
māmeva gatasankalpā vṛṇīte sā surottamāḥ //

abravīccaiva māṃ bālā āyāntu sahitāḥ surāḥ /
tvayā saha naravyāghra mama yatrasvayaṃvaraḥ //

teṣāmahaṃ sannidhau tvāṃ varayiṣyāmi naiṣadha /
evaṃ tava mahābāho doṣo na bhaviteti ha //

etāvadeva vibudhā yathāvṛttamupāhṛtam / mayā śeṣe pramāṇaṃ tu bhavantastridaśeśvarāḥ //