Mahabharata · Chapter 3.54

atha kāle śubhe prāpte tathau puṇye kṣaṇe tathā /
ājuhāva mahīpālānbhīmo rājā svayaṃvare //

tacchrutvā pṛthivīpālāḥ sarve hṛcchayapīḍitāḥ /
tvaritāḥ samapājagmurdamayantīmabhīpsavaḥ //

kanakastambharuciraṃ toraṇena virājitam /
viviśuste nṛpā raṅgaṃ mahāsiṃha ivācalam //

tatrāsaneṣu vividheṣvāsīnāḥ pṛthivīkṣitaḥ /
surabhisragdharāḥ sarve pramṛṣṭamaṇikuṇḍalāḥ //

sampūrṇāṃ puruṣavyāghrairvyāghrairgiriguhāmiva /
praviveśa nalo devaiḥ puṇyaśloko narādhipa //

tatra sma pīnā dṛśyante bāhavaḥ parighopamāḥ /
ākāravarṇasuślakṣṇāḥ pañcaśīrṣā ivoragāḥ //

sukeśāntāni cārūṇi sunāsāni śubhāni ca /
mukhāni rājñāṃ śobhante nakṣatrāṇi yathā divi //

damayantī tato raṅgaṃ praviveśa śubhānanā /
muṣṇantī prabhayā rājñāṃ cakṣūṣi ca manāṃsi ca //

tasyā gātreṣu patitā teṣāṃ dṛṣṭirmahātmanām /
tatratatraiva saktā'bhūnna cacāla ca paśyatām //

tataḥ sankīrtyamāneṣu rājñāṃ nāmasu bhārata /
dadarśa bhaimī puruṣānpañca tulyākṛtīniha //

tānsamīkṣya tataḥ sarvānnirviśeṣākṛtīnsthitān /
sandehādatha vedarbhī nābhyajānānnalaṃ nṛpam //

nirviśeṣavayoveṣarūpāṇāṃ tatra sā śubhā / yaṃyaṃ hi dadṛśe teṣāṃ tantaṃ mene nalaṃ nṛpam /
sācintayantī buddhyā'tha tarkayāmāsa bhāminī //

kathaṃ nu devāñjānīyāṃ kathaṃ vidyāṃ nalaṃ nṛpam /
evaṃ sañcintayantī sā vaidarbhī bhṛśaduḥkhitā //

śrutāni devaliṅgāni tarkayāmāsa bhārata /
devānāṃ yāni liṅgāni sthavirebhyaḥ śrutāni me //

tānīha tiṣṭhatāṃ bhūmāvekasyāpi na lakṣaye /
evaṃ vicintya bahudhā vicārya ca punaḥ punaḥ //

śaraṇaṃ prati devānāṃ prāptakālamamanyata /
vācā ca manasā caiva namaskāraṃ prayujya sā //

devebhyaḥ prāñjalirbhūtvā vepamānedamabravīt / haṃsānāṃ vacanaṃ śrutvā yathā me naiṣadho vṛtaḥ /
patitve tena satyena devāstaṃ pradiśantu me //

manasā vacasā caiva yathā nāticarāmyaham /
tena satyena vibudhāstameva pradiśantu me //

yathā devaiḥ sa me bhartā vihito niṣadhādhiṣaḥ /
tena satyena me devāstameva pradiśantu me //

yathedaṃ vratamārabdhaṃ nalasyārādhane mayā /
tena satyena me devāstameva pradiśantu me //

svaṃ caiva rūpaṃ puṣyantu lokapālā maheśvarāḥ /
yathā'hamabhijānīyāṃ puṇyaślokaṃ narādhipam //

niśamya damayantyāstatkaruṇaṃ pratidevitam /
niścayamparamaṃ tathyamanurāgaṃ ca naiṣadhe //

manoviśuddhiṃ buddhiṃ ca bhaktiṃ rāgaṃ ca naiṣadhe /
yathoktaṃ cakrire devāḥ sāmarthyaṃ liṅgadhāraṇe //

sā'paśyadvibudhānsarvānasvedānstabdhalocanān /
amlānasragrajohīnānsthitānaspṛśataḥ kṣitim //

chāyādvitīyo mlānasragrajaḥsvedasamanvitaḥ /
bhūmiṣṭho naiṣadhaścaiva nimeṣeṇa ca sūcitaḥ //

sā samīkṣya tu tāndevānpuṇyaślokaṃ ca bhārata /
naiṣadhaṃ varayāmāsa bhaimī dharmeṇa pāṇḍava //

vilajjamānā vastrāntaṃ jagrāhāyatalocanā /
skandhadeśe'sṛjattasya srajaṃ paramaśobhanām //

varayāmāsa caivainaṃ patitve varavarṇinī /
tato hāheti sahasā muktaḥ śabdo narādhipaiḥ //

devairmaharṣibhistatra sādhusādhviti bhārata /
vismitairīritaḥ śabdaḥ praśaṃsadbhirnalaṃ nṛpam //

damayantīṃ tu kauravya vīrasenasuto nṛpaḥ /
āśvāsayadvarārohāṃ prahṛṣṭenāntarātmanā //

yattvaṃ bhajasi kalyāṇi pumāṃsaṃ devasannidhau /
tasmānmāṃ viddhi bhartārametatte vacane ratam //

yāvacca me dhariṣyanti prāṇā dehe śucismite /
tāvattvayi bhaviṣyāmi satyametadbravīmi te //

damayantī tathā vāgbhirabhinandya kṛtāñjaliḥ //

tau parasparataḥ prītau dṛṣṭvā tvagnipurogamān /
tāneva śaraṇaṃ devāñjagmaturmanasā tadā //

vṛte tu naiṣadhe bhaimyā lokapālā mahaujasaḥ /
prahṛṣṭamanasaḥ sarve nalāyāṣṭau varāndaduḥ //

pratyakṣadarśanaṃ yajñe gatiṃ cānuttamāṃ śubhām /
naiṣadhāya dadau śakraḥ prīyamāṇaḥ śacīpatiḥ //

agnirātmabhavaṃ prādādyatra vāñchati naiṣadhaḥ /
lokānātmaprabhāṃścaiva dadau tasmai hutāśanaḥ //

yamastvannarasaṃ prādāddharme ca paramāṃ sthitim /
apāmpatirapāṃ bhāvaṃ yatravāñchati naipadhaḥ //
srajaścottamagandhāḍhyāḥ sarveca mithunaṃ daduḥ

varānevaṃ pradāyāsya devāste tridivaṃ gatāḥ / etatsarvaṃ nalo'paśyaddamayantī ca bhārata /
yathā svapnaṃ mahārāja tathaiva dadṛśurjanāḥ //

tataḥ svayavaraṃ cakre bhīmo rājā'timānuṣam /
samāgateṣu sarveṣu bhūpālesu viśāmpate //

damayantyapi taddṛṣṭvārājamaṇḍalamṛddhimat /
anvīkṣyanaiṣadhaṃ vavre bhaimī dharmeṇa bhārata //

vṛte ca naiṣadhe bhaimyā nivṛtte ca svayaṃvare /
sarva eva mahīpālāḥ pratijagmuryathāgatam //

pārthivāścānubhūyāsya vivāhaṃ vismayānvitāḥ /
damayantyāśca muditāḥ pratijagmuryathāgatam //

gateṣu pārthivendreṣu bhīmaḥ prīto mahāmanāḥ /
vivāhaṃ kārayāmāsa damayantyā nalasya ca //

uṣya tatra tathākāmaṃ naiṣadho dvipadāṃvaraḥ / bhīmena samanujñāto jagāma nagaraṃ svakam /
avāpya nārīratnaṃ tu puṇyaślokopi pārthivaḥ //

reme saha tayā rājañchacyeva balavṛtrahā /
atīva mudito rājā bhrājamānoṃśumāniva //

arañjayatprajā vīro dharmeṇa paripālayan / īje cāpyaśvamedhena yayātiriva nāhuṣaḥ /
anyaiśca bahubhirdhīmānkratubhiścāptadakṣiṇaiḥ //

pugaśca ramaṇīyeṣu vaneṣūpavaneṣu ca /
damayantyā saha nalo vijahārāmaropamaḥ //

janayāmāsa ca tato damayantyāṃ mahāmanāḥ /
indrasenaṃ sutaṃ cāpi indrasenāṃ cakanyakām //

evaṃ sa yajamānaśca viharaṃśca narādhipaḥ / rarakṣa vasusampūrṇāṃ vasudhāṃ vasudhādhipaḥ //