Mahabharata · Chapter 3.36

bhīmasenavacaḥ śrutvā kuntīputro yudhiṣṭhiraḥ /
niḥśvasya puruṣavyāghraḥ sampradadhyau parantapaḥ //

śrutā me rājadharmāśca varṇānāṃ ca pṛthakpṛthak /
āyatyāṃ ca tadātve ca yaḥ paśyati sa paśyati //

dharmasya jānamāno'haṃ gatimagryāṃ sudurvidām /
kathaṃ balātkariṣyāmi meroriva vivartanam //

sa muhūrtamiva dhyātvā viniścityetikṛtyatām /
bhīmasenamida vākyamapadāntaramabravīt //

evametanmahābāho yathā vadasi bhārata /
idamanyatsamādatsva vākyaṃ me vākyakovida //

mahāpāpāni karmāṇi yāni kevalasāhasāt /
ārabhyante bhīmasena vyathante tāni bhārata //

sumantrite suvikrānte sukṛtesuvicārite /
siddhyantyarthā mahābāho daivaṃ cātra pradakṣiṇam //

yattu kevalacāpalyādbaladarpotthitaḥ svayam /
ārabdhavyamidaṃ kāryaṃ manyase śṛṇu tatrame //

bhūriśravāḥ śalaścaiva jalasandhaśca vīryavān /
bhīṣmo droṇaśca karṇaśac droṇaputraśca vīryavān //

dhārtarāṣṭrā durādharṣā duryodhanapurogamāḥ /
sarva eva kṛtāśastrāśca satataṃ cātatāyinaḥ //

rājānaḥ pārthivāścaiva ye'smābhirupatāpitāḥ /
te śritāḥ kauravaṃ pakṣaṃ jātasnehāśca sāmpratam //

duryodhanahite yuktā na tathā'smāsu bhārata /
pūrṇakośā balopetāḥ prayatiṣyanti rakṣaṇe //

sarve kauravasainyas saputrāmātyasainikāḥ /
saṃvibhaktā hi mātrābhirbhogairapi ca sarvaśaḥ //

duryodhanena te vīrā mānitāśca viśeṣataḥ /
prāṇāṃstyakṣyanti sangrāme iti me niścitā matiḥ //

samā yadyapi bhīṣmasya vṛttirasmāsu teṣu ca /
droṇas ca mahābāho kṛṣasya ca mahātmanaḥ //

avaśyaṃ rājapiṇḍastairnirveśya iti me matiḥ /
tasmāttyakṣyanti sangrāme prāṇānapi sudustyajān //

sarvedivyāstravidvāṃsaḥ sarve dharmaparāyaṇāḥ /
ajeyāśceti me buddhirapi devaiḥ savāsavaiḥ //

amarṣī nityasaṃrabdhastatra karṇo mahārathaḥ /
sarvāstravidanādhṛṣyo hyabhedyakavacāvṛtaḥ //

anirjityaraṇe sarvānetānpuruṣasattamān /
aśakyo hyasahāyena hantuṃ duryodhanastvayā //

na nidrāmadhigacchāmi cintayāno vṛkodara /
atisarvāndhanurgrāhānsūtaputrasya lāghavam //
vaiśampāyana uvāca /

etadvacanamājñāya bhīmaseno'tyamarṣaṇaḥ /
babhūva śāntisaṃyukto gurorvacanavāritaḥ //

tayoḥ saṃvadatorevaṃ tadā pāṇḍavayordvayoḥ /
ājagāma mahāyogī vyāsaḥ satyavatīsutaḥ //

so'bhigamya yathānyāyaṃ pāṇḍavaiḥ pratipūjitaḥ /
yudhiṣṭhiramidaṃ vākyamuvāca vadatāṃvaraḥ //

yudhiṣṭhira mahābāho vedmi te hṛdayasthitam /
manīṣayā tata kṣipramāgatosmi nararṣabha //

bhīṣmāddroṇātkṛpātkarṇāddroṇaputrācca bhārata /
duryodhanānnṛpasutāttathā duḥśāsanādapi //

tte bhayamamitraghna hṛdi samparivartate /
tatte'haṃ nāśayiṣyāmi vidhidṛṣṭena hetunā //

tacchrutvā dhṛtimāsthāya karmaṇā pratipādaya /
pratipādya tu rājendra tataḥ kṣipraṃ jvaraṃ jahi //

tata ekāntamānāyya pārāśaryo yudhiṣṭhiram /
abravīdupapannārthamidaṃ vākyaviśāradaḥ //

śreyasaste'paraḥ kālaḥ prāpto bharatasattama /
yenābhibhavitā śatrūnraṇe pārtho dhanurdharaḥ //

gṛhāṇemāṃ mayā proktāṃ siddhiṃ mūrtimartāmiva /
vidyāṃ pratismṛtiṃ nāma prapannāya bravīmi te //

yāmavāpyamahābāhurarjunaḥ sādhayiṣyati /
astrahetormahendraṃ ca rudraṃ caivābhigacchatu //

varuṇaṃ ca kuberaṃ ca dharmarājaṃ ca pāṇḍava /
śakto hyeṣa surāndraṣṭuṃ tapasā vikrameṇa ca //

ṛṣireṣa mehātejā nārāyaṇasahāyavān /
purāṇaḥ śāsvato devastvajeyo jiṣṇuracyutaḥ //

astrāṇīnadrācca rudrācca lokapālebhya eva ca /
samādāya mahābāhurmahatkarma kariṣyati //

vanādasmācca kaunteya vanamanyadvicintyatām /
nivāsārthāya yadyuktaṃ bhavedvaḥ pṛthivīpate //

ekatraciravāso hi na prītijanano bhavet /
tāpasānāṃ ca śāntānāṃ bhavedudvegakārakaḥ //

mṛgāṇāmuparodhaśca vīrudoṣadhisankṣayaḥ /
bibharṣi ca bahūnviprānvedavedāṅgapāragān //
vaiśampāyana uvāca /

evamuktvā prapannāya śucaye bhagavānprabhuḥ /
provāca yogatattvajño yogavidyāmanuttamām //

dharmarājāya dhīmānsa vyāsaḥ satyavatīsutaḥ /
anujñāya ca kaunteyaṃ tatraivāntaradhīyata //

yudhiṣṭhirastu dharmātmā tadbrahma manasā yataḥ /
dhārayāmāsa medhāvī kālekāle sadā'bhyasan //

sa vyāsavākyamudito vanāddvaitavanāttataḥ /
yayau sarasvatīkūle kāmyakaṃ nāma kānanam //

tamanvayurmahārāja śikṣākṣaraviśāradāḥ /
brāhmaṇāstapasā yuktā devendramṛṣayo yathā //

tataḥ kāmyakamāsādya punaste bharatarṣabha /
nyaviśanta mahātmānaḥ sāmānyāḥ sapadānugāḥ //

tatrate nyavasanrājankañcitkālaṃ manasvinaḥ /
dhanurvedaparā vīrā gṛṇānā vedamuttamam //

caranto mṛgayāṃ nityaṃ śuddhairbāṇairmṛgārthinaḥ / pitṛdaivataviprebhyo nirvapanto yathāvidhi //