Mahabharata · Chapter 3.35

sandhiṃ kṛtvaiva kālena hyantakena patatriṇā /
anantenāprameyeṇa srotasā sarvahāriṇā //

pratyakṣaṃ manyase kālaṃ martyaḥ sankālabandhanaḥ /
phenadharmā mahārāja phaladharmā tathaiva ca //

nimeṣādapi kaunteya yasyāyurapacīyate /
sūcyevāñjanacūrṇāni kimiti pratipālayet //

yo nūnamamitāyuḥ syādathavā'yuḥpramāṇavit /
sa kālaṃ vai pratīkṣeta sarvapratyakṣadarśivān //

pratīkṣyamāṇaḥ kālo naḥ samā rājaṃstrayodaśa /
āyuṣopacayaṃ kṛtvā maraṇāyopaneṣyati //

śarīriṇāṃ hi maraṇaṃ śarīre nityamāśritam /
prāgeva maraṇāttasmādrājyāyaiva ghaṭāmahe //

yo na yāti prasaṃkhyānamaspaṣṭo bhūmivardhanaḥ /
ayātayitvā vairāṇi so'vasīdati gauriva //

yo na yātayate vairamalpasatvodyamaḥ pumān /
aphalaṃ janma tasyāhaṃ manye durjātajīvinaḥ //

hairaṇyau bhavato bāhū śrutirbhavati pārthivī /
hatvā dviṣantaṃ sangrāme bhuṅkṣva bāhujitaṃ vasu //

hatvā vai puruṣo rājannikartāramarindam /
ahnāya narakaṃ gacchetsvargeṇāsya sa sammitaḥ //

amarṣajo hi santāpaḥ pāvakāddīptimattaraḥ /
yenāhamabhisantapto na naktaṃ na divā śaye //

ayaṃ ca pārtho bībhatsurvariṣṭho jyāvikarṣaṇe /
āste paramasantapto nūnaṃ siṃha ivāśaye //

yo'yameko nudetsarvāṃlloke rājandhanurbhṛtaḥ /
soyamātmajamūṣmāṇaṃ grahāhastīva yacchati //

nakulaḥ sahadevaśca vṛddhā mātā ca vīrasūḥ /
tavaiva priyamicchanta āsate jaḍamūkavat //

sarve te'priyamicchanti bāndhavāḥ saha sṛñjayaiḥ /
ahamekaśca santapto mātā ca pratibindhyataḥ //

priyameva tu sarveṣāṃ yadbravīmyuta kiñcana /
sarve hi vyasanaṃ prāptāḥ sarve yuddhābhinandinaḥ //

nātaḥ pāpīyasī kācidāpadrājanbhaviṣyati /
yanno nīcairalpabalai rājyamācchidya bhujyate //

śīladoṣāddhṛṇāviṣṭa ānṛśaṃsyātparantapa /
kleśāṃstitikṣase rājannānyaḥ kaścitpraśaṃsati //

śrotriyasyeva te rājanmandakasyāvipaścitaḥ /
anuvākahatā buddhirnaiṣā tattvārthadarśinī //

ghṛṇī brāhmaṇarūposi kathaṃ kṣatreṣvajāyathāḥ /
asyāṃ hi yonau jāyante prāyaśaḥ krūrabuddhayaḥ //

aśrauṣīstvaṃ rājadharmānyathā vai manurabravīt /
krūrānnikṛtisampannānvihitānaśamātmakān //

dhārtarāṣṭrānmahārāja kṣamase kiṃ durātmanaḥ /
kartavye puruṣavyāghra kimāsse pīṭhasarpavat //

buddhyā vīryeṇa saṃyuktaḥ śrutenābhijanena ca / tṛṇānāṃ muṣṭinaikena himavantaṃ ca parvatam /
channamicchasi kaunteya yo'smānsaṃvartumicchasi //

ajñātacaryāgūḍhena pṛthivyāṃ viśrutena ca /
divīva pārtha sūryeṇa na śakyā'carituṃ tvayā //

bṛhatsāla ivānūpe śākhāpuṣpapalāvān /
hastī śveta ivājñātaḥ kathaṃ jiṣṇuścariṣti //

imau ca siṃhasankāśau bhrātarau sahitau śiśū /
nakulaḥ sahadevaśca kathaṃ pārtha cariṣyataḥ //

puṇyakīrtī rājaputrī draupadī vīrasūriyam /
viśrutā kathamajñātā kṛṣṇā pārtha cariṣyati //

māṃ cāpi rājañjānanti hyākumāramimāḥ prajāḥ /
ajñātacaryāṃ paśyanti meroriva nigūhanam //

tathaiva bahavro'smābhī rāṣṭrebhyo vipravāsitāḥ /
rājāno rājaputrāśca dhārtarāṣṭramanuvratāḥ //

na hi te'pyupaśāmyanti nikṛtā vā nirākṛtāḥ /
avaśyaṃ tairnikartavyamasmākaṃ tatpriyaiṣibhiḥ //

te'pyasmāsu prayuñjīranpracchannānsubahūṃścarān /
ācakṣīraṃśca no jñātvā tataḥ syātsumahadbhayam //

asmābhiruṣitāḥ samyagvane māsāstrayodaśa /
parimāṇaena tānpaśya tāvataḥ parivatsarān //

asti māsaḥ pratinidhiryathā prāhurmanīṣiṇaḥ /
pūtikāniva somasya tathedaṃ kriyatāmiti //

athavā'naḍuhe rājansādhane sādhuvāhine /
sauhityadānādetasmādenasaḥ pratimucyate //

tasmācchatruvadhe rājankriyatāṃ niścayastvayā / kṣatriyasya hi sarvasya nānyo dharmosti saṃyugāt //