Mahabharata · Chapter 3.311

devarājamanuprāptaṃ brāhmaṇacchadmanā'vṛtam /
dṛṣṭvāsvāgatamityāha na bubodhāsya mānasam //

hiraṇyakaṇṭhīḥ pramadā grāmānvā bahugokulān /
kiṃ dadānīti taṃ vipramuvācādhirathistataḥ //
brāhmaṇa uvāca /

hiraṇyakaṇṭhyaḥ pramadā yaccānyatprītivardhanam /
nāha dattamihecchāmi tadarthibhyaḥ pradīyatām //

yadetatsahajaṃ varma kuṇḍale ca tavānagha /
etadutkṛtya me dehi yadi satyavrato bhavān //

etadicchāmyahaṃ bhikṣāṃ tvayā dattāṃ parantapa /
eṣa me sarvalābhānāṃ lābhaḥ paramako mataḥ //
karṇa uvāca /

avaniṃ pramadā gāśca nirvāpaṃ bahuvārṣikam /
tatte vipra pradāsyāmi na tu varma sakuṇḍalam //
vaiśampāyana uvāca /

evaṃ bahuvidhairvākyairvāryamāṇaḥ sa tu dvijaḥ /
rakarṇena bharataśreṣṭha nānyaṃ varamayācata //

sāntvitaśca yathāśakti pūjitaśca yathāvidhi /
na cānyaṃ sa dvijaśreṣṭhaḥ kāmayāmāsa vai varam //

yadā nānya pravṛṇute varaṃ vai dvijasattamaḥ / vinā's sahajaṃ varma kuṇḍale ca viśāmpate /
tadainamabravīdbhūyo rādheyaḥ prahasanniva //

sahajaṃ varma me vipra kuṇḍale cāmṛtodbhave /
tenāvadhyosmi lokeṣu tato naitajjahāmyaham //

viśālaṃ pṛthivīrājyaṃ kṣemaṃ nihatakaṇṭakam /
pratigṛhṇīṣva mattastvaṃ sādhu brāhmaṇapuṅgava //

kuṇḍalābhyāṃ vimukto'haṃvarmaṇā sahajena ca /
damanīyo bhaviṣyāmi śatrūṇāṃ dvijasattama //
vaiśampāyana uvāca /

yadanyaṃ na varaṃ vavre bhagavānpākaśāsanaḥ /
tataḥ prahas karṇastaṃ punarityabravīdvacaḥ //

vidito devadeveśa prāgevāsi mama prabho /
na tu nyāyyaṃ mayā dātuṃ tava śakra vṛthā varam //

tvaṃ hi deveśvaraḥ sākṣāttvayā deyo varo mama /
anyeṣāṃ caiva bhūtānāmīśvaro hyasi bhūtakṛt //

yadi dāsyāmi te deva kuṇḍale kavacaṃ tathā /
vadhyatāmupayāsyāmi tvaṃ ca śakrāvahāsyatām //

tasmādvinimayaṃ kṛtvā kuṇḍalevarma cottamam /
harasva śakrakāmaṃ me na dadyāmahamanyathā //
śakra uvāca /

vidito'haṃ raveḥ pūrvamāyāneva tavāntikam /
tena te sarvamākhyātamevametanna saṃśayaḥ //

kāmamastu tathā tāta tava karṇa yathecchasi /
varjayitvā tu me vajraṃ pravṛṇīṣva yathecchasi //
vaiśampāyana uvāca /

tataḥ karṇaḥ prahṛṣṭastu upasangamya vāsavam /
amoghāṃ śaktimabhyetya vavre sampūrṇamānasaḥ //
kraṇa uvāca /

varmaṇā kuṇḍalābhyāṃ ca śaktiṃ me dehi vāsava /
amoghāṃ śatrusaṅghānāṃ ghātinīṃ pṛthanāmukhe //

tataḥ sañcintya manasā muhūrtamiva vāsavaḥ /
śaktyarthaṃ pṛthivīpāla karṇaṃ vākyamathābravīt //

kuṇḍale me prayacchasva varma caiva śarīrajam /
gṛhāṇa karṇa śaktiṃ tvamanena samayena ca //

amoghā hanti śataśaḥ śatrūnmama karacyutā /
punaśca pāṇimabhyeti mama daityānvinighnataḥ //

seyaṃ tava karaprāptā hatvairakaṃ ripumūrjitam /
garjantaṃ pratapantaṃ ca māmevaiṣyati sūtaja //
karṇa uvāca /

ekamevāhamicchāmi ripuṃ hantuṃ mahāhave /
garjantampratapantaṃ ca yato mama bhayaṃ bhavet //
indra uvāca /

ekaṃ haniṣyasi ripuṃ garjantaṃ balinaṃ raṇe /
tvaṃ tu yaṃ prārthayasyekaṃ rakṣyate sa mahātmanā //

yamāhurvedavidvāṃso varāhamaparājitam /
nārāyaṇamacintyaṃ ca tena kṛṣṇena rakṣyate //
karṇa uvāca /

evametadyathā'ttha tvaṃ dānavānāṃ niṣūdana /
vadhiṣyāmi raṇe śatruṃ yo me sthātā purassaraḥ //

evamapyastu bhagavannekavīravadhe mama /
amoghāṃ dehi me śaktiṃ yathā hanyāṃ pratāpinam //

utkṛtya tu pradāsyāmi kuṇḍale kavacaṃ ca te /
nikṛtteṣu tu gātreṣu na me bībhatsatā bhavet //
indra uvāca /

na te bībhatsatā karṇa bhaviṣyati kathañcana /
braṇaścaiva na gātreṣu yastvaṃ nānṛtamicchasi //

yādṛśaste piturvarṇastejaśca vadatāṃvara /
tādṛśenaiva varṇena tvaṃ karṇa bhavitā punaḥ //

vidyamāneṣu śastreṣu yadyamoghāmasaṃśaye /
pramatto mokṣyase cāpi tvayyevaiṣā patiṣyati //
karṇa uvāca /

saṃśayaṃ paramaṃ prāpya vimokṣye vāsavīmimām /
yathā māmauttha śakra tvaṃ satyametadbravīmi te //
vaiśampāyana uvāca /

tataḥ śaktiṃ prajvalitāṃ pratigṛh viśāmpate /
śastraṃ gṛhītvā niśitaṃ sarvagātrāṇyakṛntata //

tato devā mānavā dānavāśca nikṛntantaṃ karṇamātmānameva /
dṛṣṭvā sarve siṃhanādānpraṇedu- rna hyasyāsīnmukhajo vai vikāraḥ //

tato divyā dundubhayaḥ praṇeduḥ papātoccaiḥ puṣpavarṣaṃ ca divyam /
dṛṣṭvā karṇaṃ śastrasankṛttagātraṃ mahuścāpi smayamānaṃ nṛvīram //

tataśchittvā kavacaṃ divyamaṅgā- ttathaivārdraṃ pradadau vāsavāya /
tathotkṛtya pradadau kuṇḍale te karṇāttasmātkarmaṇā tena karṇaḥ //

tato devo mudito vajrapāṇi- rdṛṣṭvā karṇaṃ śastranikṛttagātram /
tataḥ śakraḥ prahasanvañcayitvā karṇaṃ loke yaśasā yojayitvā / kṛtankāryaṃ pāṇḍavanāṃ hi bhene tataḥ paścāddivamevotpapāta //

śrutvā karṇaṃ muṣitaṃ dhārtarāṣṭrā dīnāḥ sarve bhagnadarpā ivāsan /
tāṃ racāvasthāṃ gamitaṃ sūtaputraṃ śrutvā pārthā jahṛpuḥ kānanasthāḥ //
janamejaya uvāca /

kvastā vīrāḥ pāṇḍavāste babhūvuḥ kutaścaite śrutavantaḥ priyaṃ tat /
kiṃ vā'kārṣurdvādaśe'bde vyatīte tanme sarvaṃ bhagavānvyākarotu //
vaiśampāyana uvāca /

labdhvā kṛṣṇāṃ saindhavaṃ drāvayitvā vipraiḥ sārdhaṃ kāmyakādāśramātte /
mārkaṇḍeyācchrutavantaḥ purāṇaṃ kadevarṣīṇaāṃ caritaṃ vistareṇa //

pratyājagmuḥ sarathāḥ sānuyātrāḥ sarvaiḥ sārdhaṃ sūtapaurogavaiste /
tato yayurdvaitavanaṃ nṛvīrā nistīryaivaṃ vanavāsaṃ samagram //