Mahabharata · Chapter 3.310

etasminneva kāle tu dhṛtarāṣṭrasya vai sakhā /
sūto'dhiratha ityeva sadāro jāhnavīṃ yayau //

tasya bhāryā'bhavadrājanrūpeṇāsadṛśī bhuvi / rādhā nāma mahābhāgā na sā putramavindata /
apatyārthe paraṃ yatnamakarocca viśeṣataḥ //

sā dadarśātha mañjūṣāmuhyamānāṃ yadṛcchayā /
dattarakṣāpratisarāmanvālambhanaśobhanām //

ūrmītaraṅgairjāhnavyāḥ samānītāmupahvaram /
vivartamānāṃ bahuśaḥ punaḥpunaritastataḥ //

tataḥ sā vāyunā rājansrotasā ca balīyasā /
upānīto yataḥ sūtaḥ sabhāryo jalamāśritaḥ //

sā tu kautūhalātprāptāṃ grāhayāmāsa bhāminī /
tato nivedayāmāsa sūtasyādhirathasya vai //

sa tāmuddhṛtya mañjūṣāmutsārya jalamantikāt /
yantrairudghāṭayāmāsa so'paśyattatrabālakam //

mṛṣṭakuṇḍalayuktena vadanena virājitam /
parimlānamukhaṃ bālaṃ rudantaṃ kṣudhitaṃ bhṛśam //

sa tu taṃ parayā lakṣmyā dṛṣṭvā yuktaṃ varātmajam / sa sūto bhāryayā sārdhaṃ vismayotphullalocanaḥ /
aṅkamāropya taṃ bālaṃ bhāryāṃ vacanamabravīt //

idamatyadbhutaṃ bhīru yato jātosmi bhāmini /
dṛṣṭavāndevagarbho'yaṃ manye'smākamupāgataḥ //

anapatyasya putro'yaṃ devairdatto dhruvaṃ mama /
ityuktvā taṃ dadau putraṃ rādhāyai sa mahīpate //

rapratijagrāha taṃ rādhā vidhivaddivyarūpiṇam /
putraṃ kamalagarbhābhaṃ devagarbhaṃ śriyā vṛtam //

stanyaṃ samasravaccāsya daivādittha niścayaḥ / pupoṣa cainaṃ vidhivadvavṛdhe sa ca vīryavān /
tataḥ prabhṛti cāpyanye prābhavannaurasāḥ sutāḥ //

nāmakarma ca cakruste kuṇḍale tas dṛśyate /
karṇa ityeva taṃ bālaṃ dṛṣṭvā karṇaṃ sakuṇḍalam //

vasuvarmadharaṃ dṛṣṭvā taṃ bālaṃ hemakuṇḍalam /
nāmāsya vasuṣeṇeti tataścakrurdvijātayaḥ //

evaṃ sa sūtaputratvaṃ jagāmāmitavikramaḥ /
vasuṣeṇa itikhyāto vṛṣa ityeva ca prabhuḥ //

sūtasya vavṛdhe'ṅgeṣu jyeṣṭhaḥ putraḥ sa vīryavān /
cāreṇa viditaścāsītpṛthayā divyavarmabhṛt //

sūtastvadhirathaḥ putraṃ vivṛddhaṃ samayena tam /
dṛṣṭvā prasthāpayāmāsa puraṃ vāraṇasāhvayam //

tatropasadanaṃ cakre droṇasyeṣvastrakarmaṇi /
sakhyaṃ duryodhanenaivamagamatsa ca vīryavān //

droṇātkṛpācca rāmācca so'stragrāmaṃ caturvidham /
labdhvā loke'bhavatkhyātaḥ parameṣvāsatāṃ gataḥ //

sandhāya dhārtarāṣṭreṇa pārthānāṃ vipriye rataḥ /
yoddhumāśaṃsate nityaṃ phalgunena mahātmanā //

sadā hi tas spardhā'sīdarjunana viśāmpate /
arjunasya ca karṇena yato dvandvaṃ babhūva ha //

etadguhyaṃ mahārāja sūryasyāsīnna saṃśayaḥ /
yaḥ sūryasambhavaḥ karṇaḥ kuryātpratikule rataḥ //

taṃ tu kuṇḍalinaṃ dṛṣṭvā varmaṇā ca samanvitam /
avadhyaṃ samare matvā paryatapyadyudhiṣṭhiraḥ //

yadā ca karṇo rājendra bhānumantaṃ divākaram /
stauti madhyandine prāpte prāñjaliḥ salilotthitaḥ //

tatrainamupatiṣṭhanti brāhmaṇā dhanahetunā /
nādeyaṃ tasya tatkāle kiñcidasti dvijātiṣu //

tamindro brāhmaṇo bhūtvā bhikṣāṃ dehītyupasthitaḥ / svāgataṃ ceti rādheyastamatha pratyabhāṣata //