Mahabharata · Chapter 3.309

tato garbhaḥ samabhavatpṛthāyāḥ pṛthivīpate /
śukle daśottare pakṣe tārāpatirivāmbare //

sā bāndhavabhayādbālā garbhaṃ taṃ vinigūhatī /
dhārayāmāsa suśroṇī na caināṃ bubudhe janaḥ //

na hi tāṃ veda nāryanyā kāciddhātreyikāmṛte /
kanyāpuragatāṃ bālāṃ nipuṇāṃ parirakṣaṇe //

tataḥ kālena sā garbhaṃ suṣuve varavarṇinī /
kanyaiva tasya devasya prasādādamaraprabham //

tathaivābaddhakavacaṃ kanakojjvalakuṇḍalam /
haryakṣaṃ vṛṣabhaskandhaṃ yathāsya pitaraṃ tathā //

jātamātraṃ ca taṃ garbhaṃ dhātryā sammantrya bhāminī / utsraṣṭukāmā taṃ garbhaṃ kārayāmāsa bhārata /

mañjūṣāṃ śilpibhistūrṇaṃ sunaddhāṃ supratiṣṭhitām // plavairbahuvidhairbaddhāṃ plavanārthaṃ jale nṛpa /
ajinairmṛdubhiścaivaṃ saṃstīrṇaśayanāṃ tathā //

mañjūṣāyāṃ samādhāya svāstīrṇāyāṃ samantataḥ / madhūcciṣṭasthitāyāṃ taṃ sukhāyāṃ rudatī tathā /
ślakṣṇāyāṃ supidhānāyāmaśvanadyāmavāsṛjat //

jānatī cāpyakartavyaṃ kanyāyā garbhadhāraṇam /
putrasnehena sā rājankaruṇaṃ paryadevayat //

samutsṛjantī mañjūpāmaśvanadyāṃ tadā jale /
uvāca rudatīkuntī yāni vākyāni tacchṛṇu //

svasti te'stvāntarikṣebhyaḥ pārthivebhyaśca putraka /
divyebhyaścaiva bhūtebhyastathā toyacarāśca ye //

śivāste santu panthāno mā ca te paripanthinaḥ /
āgatāśca tathā putra bhavantyadrohacetasaḥ //

pātu tvāṃ varuṇo rājā salile salileśvaraḥ /
antarikṣe'ntarikṣasthaḥ pavanaḥ sarvagastathā //

pitā tvāṃ pātu sarvatra tapanastapatāṃvaraḥ /
yena dattosi me putra divyena vidhinā kila //

ādityā vasavo rudrāḥ sādhyā viśve ca devatāḥ /
marutaśca sahendreṇa diśaśca sadidīśvarāḥ //

rakṣantu tvāṃ surāḥ sarve sameṣu viṣameṣu ca /
vetsyāmi tvāṃvideśepi kavacenābhisūcitam //

dhanyaste putra janarako devo bhānurvibhāvasuḥ /
stvāṃ drakṣyati divyena cakṣuṣā vāhinīgatam //

dhanyā sā pramadā yā tvāṃ putratve kalpayiṣyati /
yasyāstvaṃ tṛṣitaḥ putra stanaṃ pāsyasi devaja //

konu svapnastayā dṛṣṭo yā tvāmādityavarcasam /
divyavarmasamāyuktaṃ divyakṛṇḍalabhūṣitam //

padmāyataviśālākṣaṃ padmatāmradalojjvalam /
sulalāṭaṃ sukeśāntaṃ putratve kalpayiṣyati //

dhanyā drakṣyanti putra tvāṃ bhūmau saṃsarpamāṇakam /
avyaktakalavākyāni vadantaṃ reṇuguṇṭhitam //

dhanyā drakṣyanti putra tvāṃ punaryauvanagocaram /
himavadvanasambhūtaṃ siṃhaṃ kesariṇaṃ yathā //

evaṃ bahuvidhaṃ rājanvilapya karuṇaṃ pṛthā /
avāmṛjatamajjūṣāmaśvanadyāṃ tadā jale //

rudatī putraśokārtā niśīthe kamalekṣaṇā /
dhātryā saha pṛthā rājanputradarśanalālasā //

visarjayitvā mañjūṣāṃ sambodhanabhayātpituḥ /
viveśa rājabhavanaṃ punaḥ śokāturā tataḥ //

mañjūṣā tvaśvanadyāḥ sā yayau carmayaṇvatīṃ nadīm /
carmaṇvatyāścayamunāṃ tato gaṅgāṃ jagāma ha //

gaṅgāyāḥ sūtaviṣayaṃ campāmanuyayau purīm /
sa mañjūṣāgato garbhastaraṅgairuhyamānakaḥ //

amṛtādutthitaṃ divyaṃ tanuvarma sakuṇḍalam /
dhārayāmāsa taṃ garbhaṃ daivaṃ ca vidhinirmitam //

etadguhyaṃ mahārāja sūryasyāsīnmahātmanaḥ / sa sūryasambhavo garbhaḥ kuntyā garbheṇa dhāritaḥ //