Mahabharata · Chapter 3.308

sā tu kanyā bahuvidhaṃ bruvantī madhuraṃ vacaḥ /
anunetuṃ sahasrāṃśuṃ na śaśāka manasvinī //

na śaśāka yadā bālā pratyākhyātuṃ tamonudam /
bhītā śāpāttato rājandadhyau dīrghamathāntaram //

anāgasaḥ pituḥ śāpo brāhmaṇasya tathaiva ca /
mannimittaḥ kathaṃ na syātkruddhādasmādvibhāvasoḥ //

bālenāpi satā mohādbhṛśaṃ sāpahnavānyapi /
nā'bhyāsādayitavyāni tejāṃsi ca tapāṃsi ca //

sāhamadya bhṛśaṃ bhītā gṛhītvā ca kare bhṛśam /
kathaṃ tvakāryaṃ kuryāṃ vai pradānaṃ hyātmanaḥ svayam //

sā vai śāpaparitrastā bahu cintayatī hṛdā /
mohenābhiparītāṅgī smayamānā punaḥpunaḥ //

taṃ devamabravīdbhītā bandhūnāṃ rājasattama /
vrīḍāvihvalayā vācā śāpatrastā viśāmpate //

pitā me dhriyate deva mātā cānye ca bāndhavāḥ /
na teṣu dhriyamāṇaeṣu vidilopo bhavedayam //

tvayā tu sangamo deva yadi syādvidhivarjitaḥ /
mannimittaṃ kulasyāsya loke'kīrtirna saṃśayaḥ //

athavā dharmametaṃ tvaṃ manyase tapatāṃvara /
ṛte pradānādbandhubhyastava kāmaṃ karomyaham //

ātmapradānaṃ durdharṣa tava kṛtvāsatī tvaham /
tvayi dharmo yaśaścaiva kīrtirāyuśca dehinām //
sūrya uvāca /

na te pitā na te mātā guravo vā śucismite /
prabhavanti pradāne te bhadraṃ te śṛṇu me vacaḥ //

sarvānkāmayate yasmātkanerdhātośca bhāmini /
tasmātkanyeha suśroṇī svatantrā varavarṇini //

nādharmaścaritaḥ kaścittvayā bhavati bhāmini /
adharmankuta evāhaṃ vareyaṃ lokakāmyayā //

anāvṛtāḥ striyaḥ sarvā narāśca varavarṇini /
svabhāva eṣa lokānāṃ vikāro'nya iti smṛtaḥ //

sā mayā sahasangamya punaḥ kanyā bhaviṣyasi /
putraśca te mahāvāddurbhaviṣyati na saṃśayaḥ //
kuntyuvāca /

yadi putro mama bhavettvattaḥ sarvatamonuda / kuṇḍalī kavacī śūro mahābāhurmahābalaḥ /
astu me saṅgamo deva anena samayena te //
sūrya uvāca /

bhaviṣyati mahābāhuḥ kuṇḍalī divyavarmabhṛt /
ubhayaṃ cāmṛtamayaṃ tas bhadre bhaviṣyati //
kuntyuvāca /

yadyatadamṛtādasti kuṇḍale varma cottamam /
mama putrasya yaṃ vai tvaṃ matta utpādayiṣyasi //

astu me saṅgamo deva yathoktaṃ bhagavaṃstvayā /
tvadvīryarūpasatvaujā dhaṟmayukto bhavetsa ca //
sūrya uvāca /

adityā kuṇḍale rājñi datte me mattakāśini /
tasmai dāsyāmi vāmoru varma caivedamuttamam //
vaiśampāyana uvāca /

paramaṃ bhagavannevaṃ saṅgamiṣye tvayā saha /
yadi putro bhavedevaṃ yathā vadasi gopate //
vaiśampāyana uvāca /

tathetyuktvā tu tāṃ kuntīmāviveśa vihangamaḥ /
svarbhānuśatruryogātmā nābhyāṃ pasparśa caiva tām //

tata sā vihvalevāsītkanyā sūrays tejasā /
papāta cātha sā devī śayane mūḍhacetanā //
sūrya uvāca /

sādhayiṣyāmi suśroṇi putraṃ vai janayiṣyasi /
sarvaśastrabhṛtāṃśreṣṭhaṃ kanyā caiva bhaviṣyasi //
vaiśampāyana uvāca /

tataḥ sā vrīḍitā bālā tadā sūryamathābravīt /
evamastviti rājendraprasthitaṃ bhūrivarcasam //

itismoktā kuntirājātmajā sā vivasvantaṃ yācamānā salajjā /
tasminpuṇye śayanīye papāta mohāviṣṭā vepamānā lateva //

tigmāṃśustāṃ tejasā mohayitvā yogenāviśyātmasaṃsthāṃ cakāra /
na caivaināṃ dūṣayāmāsa bhānuḥ sañjñāṃ lebhe bhūya evāta bālā //