Mahabharata · Chapter 3.307

gate tasmindvijaśreṣṭhe kasmiṃścitkālaparyaye /
cintayāmāsa sā kanyā mantragrāmabalābalam //

ayaṃ vai kīdṛśastena mama datto hamātmanā /
mantragrāmo balaṃ tasya jñāsye nāticirāditi //

evaṃ sañcintayantī sā dadarśartuṃ yadṛcchayā /
vrīḍitā sā'bhavadbālā kanyābhāve rajasvalā //

tato harmyatalasthā sā mahārhaśayanocitā /
prācyāṃ diśi samudyantaṃ dadarśādityamaṇḍalam //

tatra baddhamanodṛṣṭirabhavatsā sumadhyamā /
na cātapyata rūpeṇa bhānoḥ sandhyāgatasya sā //

tasyā dṛṣṭirabhūddivyā sā'paśyaddivyadarśanam /
āmuktakavacaṃ devaṃ kuṇḍalābhyāṃ vibhūṣitam //

tasyāḥ kautūharalaṃ tvāsīnmantraṃ prati narādhipa /
āhvānamakarotsā'tha tasya devasya bhāminī //

prāṇānupaspṛśya tadā hyājuhāva divākaram /
ājagāma tato rājaṃstvaramāṇo divākaraḥ //

madhupiṅgo mahābāhuḥ kambugrīvo hasanniva /
aṅgadī baddhamukuṭo diśaḥ prajvālayanniva //

yogātkṛtvā dvidhā'tmānamājagāma tatāpa ca /
ābabhāṣe tataḥ kuntīṃ sāmnā paramabalgunā //

āgatosmi vaśaṃ bhadre tava mantrabalātkṛtaḥ /
kiṃ karomi vaśo rājñi brūhi kartā tadasmi te //
kuntyuvāca /

gamyatāṃ bhagavaṃstatra yata evāgato hyasi /
kautūhalātsamāhūtaḥ prasīda bhagavanniti //
sūrya uvāca /

gamiṣye'haṃ yathā mā tvaṃ bravīṣi tanumadhyame /
na tu devaṃ samāhūya nyāyyaṃ preṣayituṃ vṛthā //

tavābhisandhi subhage rasūryātputro bhavediti /
vīryeṇāpratimo loke kavacī kuṇḍalīti ca //

sā tvamātmapradānaṃ vai kuruṣva gajagāmini / utpatsyati hi putraste yathāsankalpamaṅgane /
atha gacchāmyahaṃ bhadre tvayā sangamya susmite //

yadi tvaṃvacanaṃ nādya kariṣyasi mama priyam /
śapsye kanye'nyathā kruddho brāhmaṇaṃ pitaraṃ ca te //

tvatkṛte tānpradhakṣyāmi sarvānapi na saṃśayaḥ /
pitaraṃ caiva te mūḍhaṃ yo na vetti tavānayam //

tas ca brāhmaṇasyādya yosau mantramadāttava /
śīlavṛttamavijñāya dhāsyāmi vinayaṃ param //

ete hi vibudhāḥ sarvepurandaramukhā divi /
tvayā pralabdhaṃ paśyanti smayanta iva māṃ śubhe //

paśya cainānsuragaṇāndivyaṃ cakṣuridaṃ hi te /
pūrvameva mayā dattaṃ dṛṣṭavatyasi yena mām //
vaiśampāyana uvāca /

tato'paśyatridaśānrājaputrī sarvānava sveṣu dhiṣṇyeṣu khasthān /
prabhāvantaṃ bhānumantaṃ mahāntaṃ yathā'dityaṃ rocamānāṃstathaiva //

sā tāndṛṣṭvā tridaśāneva bālā sūryaṃ devī vacanaṃ prāha bhītā /
gaccha tvaṃ vai gopate svaṃ vimānaṃ kanyābhāvādduḥkha evāpacāraḥ //

pitā mātā guravaścaivaye'nye dehasyāsya prabhavanti pradāne /
nāhaṃ dharmaṃ lopayiṣyāmi loke strīṇāṃ vṛttaṃ pūjyate deharakṣā //

mayā mantrabalaṃ jñātumāhūtastvaṃ vibhāvaso /
bālyādbāleti tatkṛtvā kṣantumarhasi me vibho //
sūrya uvāca /

bāleti kṛtvā'nunayaṃ tavāhaṃ dadāni nānyānunayaṃ labheta /
ātmapradānaṃ kuru kuntikanye śāntistavaivaṃ hi bhavecca bhīru //

na cāpi gantuṃ yuktaṃ hi mayā mithyākṛtena vai /
asametya tvayā bhīru mantrāhūtena bhāmini //

gamiṣyāmyanavadyāṅgi loke samavahāsyatām / gaccheyameva suśroṇi gato'haṃ vai nirākṛtaḥ /
sarveṣāṃ vibudhānāṃ ca vaktavyaḥ syāṃ tathā śubhe //

sā tvaṃ mayā samāgaccha putraṃ lapsyasi mādhśam /
viśiṣṭā sarvalokeṣu bhaviṣyasi na saṃśaya //