Mahabharata · Chapter 3.288

tato niryāya svapurātkumbhakarṇaḥ sahānugaḥ /
apaśyatkapisainyaṃ ratajjitakāśyagrataḥ sthitam //

sa vīkṣamāṇastatsainyaṃ rāmadarśanakāṅkṣayā /
apaśyaccāpi saumitriṃ dhanuṣpāṇiṃ vyavasthitam //

tamabhyetyāśu harayaḥ parivabruḥ samantataḥ /
śailavṛkṣāyudhā nādānamuñcanbhīṣaṇāstataḥ //

abhyaghnaṃśca mahākāyairbahubhirjagatīruhaiḥ /
karajairatudaṃścānye vihāya bhayamuttamam //

bahudhā yudhyamānāste yuddhamārgaiḥ plavangamāḥ /
nānāpraharaṇairbhīmai rākṣasendramatāḍayan //

sa tāḍyamānaḥ prahasanbhakṣayāmāsa vānarān /
balaṃ caṇḍabalākhyaṃ ca vajrabāhuṃ ca vānaram //

taddṛṣṭvā vyathanaṃ karma kumbhakarṇasya rakṣasaḥ /
udakrośanparitrastāstāraprabhṛtayastadā //

tānuccaiḥ krośataḥ sainyāñśrutvā sa hariyūthapān /
abhidudrāva sugrīvaḥ kumbhakarṇamapetabhīḥ //

tato nipatya vegena kumbhakarṇaṃ mahāmanā /
sālena jaghnivānmūrdhniṃ balena kapikuñjaraḥ //

sa mahātmā mahāvegaḥ kumbhakarṇas mūrdhani /
bibheda sālaṃ sugrīvo na caivāvyathayatkapiḥ //

tato vinadyasahasā sālasparśavibodhitaḥ /
dorbhyāmādāya sugrīvaṃ kumbhakarṇo'haradbalāt //

hriyamāṇaṃ tu sugrīvaṃ kumbhakarṇena rakṣasā /
avekṣyābhyadravadvīraḥ saumitrirmitranandanaḥ //

so'bhipatya maharvegaṃ rukmapuṅkhaṃ mahāśaram /
prāhiṇotkumbhakarṇāya lakṣmaṇaḥ paravīrahā //

sa tasya dehāvaraṇaṃ bhittvā dehaṃ ca sāyakaḥ /
jagāma dārayanbhūmiṃ rudhireṇa samukṣitaḥ //

tathā sa bhinnahṛdayaḥ samutsṛjya kapīśvaram /
vegena mahatā'viṣṭastiṣṭhatiṣṭheti cābravīt //

kumbhakarṇo maheṣvāsaḥ pragṛhītaśilāyudhaḥ /
abhidudrāva saumitrimudyamya mahatīṃ śilām //

tasyābhipatatastūrṇaṃ kṣurābhyāmucchitau karau /
ciccheda niśitāgrābhyāṃ sa babhūva caturbhujaḥ //

tānapyas bhujānsarvānpragṛhītaśilāyudhān /
kṣuraiścicchedalaghvastraṃ saumitriḥ pratidarśayan //

sa babhūvātikāyaśca bahupādaśirobhujaḥ /
taṃ brahmāstreṇa saumitrirdadārādricayopamam //

sa papāta mahāvīryo divyāstrābhihato raṇe /
mahāśanivinirdagdhaḥ pādapo'ṅkuravāniva //

taṃ dṛṣṭvā vṛtrasankāśaṃ kumbhakarṇaṃ tarasvinam /
gatāsuṃ patitaṃ bhūmau rākṣasāḥ prādravanbhayāt //

tathātāndravato yodhāndṛṣṭvā tau dūṣaṇānujau /
avasthāpyātha saumitriṃ sankruddhāvabhyadhāvatām //

tāvādravantau sankruddhau vajravegapramāthinau /
abhijagrāha saumitrirvinadyobhau patatribhiḥ //

tataḥ sutumulaṃ yuddhamabhavadromaharṣaṇam /
dūṣaṇānujayoḥ pārtha lakṣmaṇas ca dhīmataḥ //

mahatā śaravarṣeṇa rākṣasau so'bhyavarpata /
taṃ cāpivīrau sankruddhāvubhau tau samavarṣatām //

muhūrtamevamabhavadvajravegapramāthinoḥ /
saumitreśca mahābāhoḥ samprahāraḥ sudāruṇaḥ //

athādriśṛṅgamādāya hanumānmārutātmajaḥ /
abhidrutyādade prāṇānvajravegasya rakṣasaḥ //

nīlaśca mahatā grāvṇā dūpaṇāvarajaṃ hariḥ /
pramāthinamabhidrutya pramamātha mahābalaḥ //

tataḥ prāvartata punaḥ sangrāmaḥ kaṭukodayaḥ /
rāmarāvaṇasainyānāmanyonyamabhidhāvatām //

śataso nairṛtānvanyā jaghnurvanyāṃśca nairṛtāḥ / nairṛtāstatravadhyante prāyeṇa na tu vānarāḥ //