Mahabharata · Chapter 3.289

tataḥ śrutvāhataṃ saṅkhye kumbhakarṇaṃ sahānugam /
prahastaṃ ca maheṣvāsaṃ dhūmrākṣaṃ cātitejasam //

putraminadrajitaṃ vīraṃ rāvaṇaḥ pratyabhāṣata /
jahirāmamamitraghna sugrīvaṃ ca salakṣmaṇam //

tvayā hi mama satputra yaśo dīptamupārjitam /
jitvāvajradharaṃ saṅkhye sahasrākṣaṃ śacīpatim //

antarhitaḥ prakāśo vā divyairdattavaraiḥ śaraiḥ /
jahi śatrūnamitraghna mama śastrabhṛtāṃvara //

rāmalakṣmaṇasugrīvāḥ śarasparśaṃ na te'nagha /
samarthāḥ pratisoḍhuṃ ca kutastadanuyāyinaḥ //

agatā yā prahastena kumbhakarṇena cānagha /
kharasyāpacitiḥ saṅkhye tāṃ gaccha tve mahābhuja //

tvamadya niśitairbāṇairhatvā śatrūnsasainikān /
pratinandaya māṃ putra purā jitveva vāsavam //

ityuktaḥ sa tathetyuktvā rathamāsthāya daṃśithaḥ /
prayayāvindrajidrājaṃstūrṇamāyodhanaṃ prati //

tato viśrāvya vispaṣṭaṃ nāma rākṣasapuṅgavaḥ /
āhvayāmāsa samare lakṣmaṇaṃ śubhalakṣaṇam //

taṃ lakṣmaṇo'bhyadhāvacca pragṛhya saśaraṃ dhanuḥ /
trāsayaṃstalaghoṣeṇa siṃhaḥ kṣudramṛgaṃ yathā //

tayoḥ samabhavadyuddhaṃ sumahajjayagṛddhinoḥ /
divyāstravidupostīvramanyonyaspardhinostadā //

rāvaṇistu yadā nainaṃ viśeṣayati sāyakaiḥ /
tato gurutaraṃ yatnamātiṣṭhadbalināṃ varaḥ //

tata evaṃ mahāvegairardayāmāsa tomaraiḥ /
tānāgatānsa ciccheda saumitrirniśitaiḥ śaraiḥ //

te nikṛttāḥ śaraistīkṣṇairnyapatandharaṇītale /
sādhakā rāvaṇerājau śataśaḥ śakalīkṛtāḥ //

tamaṅgado vālisutaḥ śrīmānudyamya pādapam /
abhidrutya mahāvegastāḍayāmāsa mūrdhani //

tasyendrajidasambhrāntaḥ prāsenorasi vīryavān /
prahartumaicchattaṃ cāsya prāsaṃ ciccheda lakṣmaṇaḥ //

tamabhyāśagataṃ vīramaṅgadaṃ rāvaṇātmajaḥ /
gadayā'tāḍayatsavye pārśvevānarapuṅgavam //

tamacintya prahāraṃ sa balavānvālinaḥ sutaḥ /
sasarjendrajitaḥ krodhātsālaskandhaṃ tathāṅgadaḥ //

so'ṅgadena rupotsṛṣṭo vadhāyendrajitastaruḥ /
jaghānendrajitaḥ pārtha rathaṃ sāśvaṃ sasārathim //

tato hatāśvātpraskandya rathātsa hatasārathiḥ /
tatraivāntardadhe rājanmāyayā rāvaṇātmajaḥ //

antarhitaṃ viditvā taṃ bahumāyaṃ ca rākṣasam /
rāmastaṃ deśamāgamya tatsainyaṃ paryarakṣata //

sa rāmamuddiśya śaraistato dattavaraistadā /
vivyādha sarvagātreṣu lakṣmaṇaṃ ca mahābalam //

tamadṛśyaṃśaraiḥ śūrau māyayā'ntarhitaṃ tadā /
yodhayāmāsaturubhau rāvaṇiṃ rāmalakṣmaṇau //

sa ruṣā sarvagātreṣu tayoḥ puruṣasiṃhayoḥ /
vyasṛjatsāyakānbhūyaḥ śataśo'tha sahasraśaḥ //

tamadṛśyaṃ vicinvantaḥ sṛjantamaniśaṃ śarān /
harayo viviśurvyoma pragṛhya mahatīḥ śilāḥ //

tāṃśca tau cāpyadṛśyaḥ saśarairvivyādha rākṣasaḥ /
sa bhṛśaṃ tāḍayāmāsa rāvaṇirmāyayā vṛtaḥ //

tau śarairarditau vīrau bhrārau rāmalakṣmaṇau / petaturgaganādbhūmiṃ sūryācandramasāviva //