Mahabharata · Chapter 3.270

tato diśaḥ samparivṛtya pārthā mṛgānvarāhānmahipāṃsca hanvā /
dhanurdharāḥ śreṣṭhatamāḥ pṛthivyāṃ pṛthakcarantaḥ sahitā babhūvuḥ //

tato mṛgavyālajanānukīrṇaṃ mahāvanaṃ tadvihagopaghuṣṭam /
bhrātṝṃśca tānabhyavadadyudhiṣṭhiraḥ śrutvā giro vyāharatāṃ mṛgāṇām //

ādityadīptāṃ diśamabhyupetya mṛgā dvijāḥ krūramime vadanti /
āyāsamugraṃ prativedayanto mahābhayaṃ śatrubhirvā'vamānam //

kṣipraṃ nivartadhvamalaṃ mṛgairno mano hi me dūyati dahyate ca /
buddhiṃ samācchādya ca me samanyu- ruddhūyate prāṇapatiḥ śarīre //

saraḥ suparṇana hṛtoragendra- marājakaṃ rāṣṭramiveha śāntam /
evaṃvidhaṃ me pratibhāti kāmyakaṃ śauṇḍairyathā pītasuraśca kumbhaḥ //

te saindhavairagnyanilogravegai- rmahājavairvājibhiruhyamānāḥ /
yuktairbṛhadbhiḥ surathairnṛvīrā- stadāśramāyābhimukhā babhūvuḥ //

teṣāṃ tu gomāyuranalpaghoṣo nivartatāṃ vāmamupetya pārśvam /
pravyāharattatpravimṛśya rājā provāca bhīmaṃ ca dhanañjayaṃ ca //

yathā vadatyepa vihīnayoniḥ sālāvṛkovāmamupetya pārsvam /
suvyaktamasmānavamatya pāpaiḥ kṛto'bhimardaḥ kurubhiḥ prasahya //

etyātha te tadvanamāviśanto mahatyaraṇye mṛgayāṃ caritvā /
bālāmapaśyanta tadā rudantīṃ dhātreyikāṃ preṣyavadhūṃ priyāyāḥ //

tāmindrasenastvarito'bhisṛtya rathādavaplutya tato'bhyadhāvat /
provāca caināṃ vacanaṃ narendra dhātreyikāmārtatarastadānīm //

kiṃ rodiṣi tvaṃ patitā dharaṇyāṃ kiṃ ta mukhaṃ śuṣyati dīnavarṇam /
kaccinna pāpaiḥ sunṛśaṃsakṛdbhiḥ pramāthitā draupadī rājaputrī / gateṣvaraṇyaṃ hi suteṣu pāṇḍoḥ kaccitparairnāpakṛtaṃ vane'smin //

paryākulā sādhu samīkṣyasūta- mabhyāpatantaṃ drutamindrasenam /
uro ghnatī kaṣṭataraṃ tadānī- muccaiḥ pracukrośa hṛteti devī //
indrasena uvāca /

anindyarūpā tu viśālanetrā śarīratulyā kurupuṅgavānām /
kenātmanāśāya yadāpanītā chidraṃ samāsādya narendrapatnī //

yadyeva devīṃ pṛthivīṃ praviṣṭā divaṃ prapannā'pyathavā samudram /
tasyā gamiṣyanti pade hi pārthā- stathā hi santapyati dharmarājaḥ //

ko hīdṛśānāmarimardanānāṃ kleśakṣamāṇāmaparājitānām /
prāṇaiḥ samāmiṣṭatamāṃ jihīrṣe- danuttamaṃ ratnamiva pramūḍhaḥ //

na budhyate nāthavatīmihādya bahiścaraṃ hṛdayaṃ pāṇḍavānām /
kasyādya kāyaṃ pratibhidya ghorā mahīṃ pravekṣyanti śitāḥ śarāgryāḥ //

mā tvaṃ śucastāṃ prati bhīru viddhi yathā'dya kṛṣṇā punareṣyatīti /
nihatya sarvāndviṣataḥ samagrā- npārthāḥ sameṣyanatyatha yājñasenyā //

athābravīccārumukhaṃ prasṛjya dhātreyikā sārathimindrasenam /
jayadrathenāpahṛtāpramathya pañcendrakalpānparibhūya kṛṣṇā //

tiṣṭhanti vartmāni navānyamūni vṛkṣāśca na mlānti tathaiva bhagnāḥ /
āvartayadhvaṃ hyanuyāta śīghraṃ na dūrayātaiva hi rājaputrī //

sannahyadhvaṃ sarva evendrakalpā mahānti cārūṇi ca daṃśanāni /
gṛhṇīta cāpāni mahādhanāni śarāṃśca śīghraṃ padavīṃ vrajadhvam //

purā hi nirbhartsanadaṇḍamohitā pramūḍhacittā vadanena śuṣyatā /
dadāti kasmaicidanarhate tanuṃ varājyapūrṇāmiva bhasmani srucam //

purā tuṣāgnāviva hūyate haviḥ purā śmaśāne sragivāpaviddhyate /
purā ca somo'dhvarago'valihyate śunā yathā viprajane pramohite //

purā hi pārthāśca dṛtau ca kāpilī prasicchate kṣīradhārā yatadhvam /
mahatyaraṇye mṛgayāṃ caritvā purā sṛgālo nalinīṃ vigāhate //

purā hi mantrāhutipūjitāyāṃ hutāgnivedyāṃ balibhuṅgilīyate /
śrutiṃ ca samyakprasṛtāṃ mahādhvare grāmyo jano yadvadasau na nāśayet //

mā vaḥ priyāyāḥ sunasaṃ sulocanaṃ candraprabhācchaṃ vadanaṃ prasannam /
spṛśyācchubhaṃ kaścidakṛtyakārī śvā vai puroḍāśamivādhvarastham //

etāni vartmānyanuyāta śīghraṃ mā vaḥ kālaḥ kṣipramihātyagādvai //

śīghraṃ pradhāvadhvamito narendrā yāvanna dūraṃ vrajatīti pāpaḥ /
pratyāharadhvaṃ dviṣatāṃ sakāśā- llakṣmīmiva svāṃ dayitāṃ nṛsiṃhāḥ //
yudhiṣṭhira uvāca /

bhadre pratikrāma niyaccha vācaṃ mā'smatsakāśe paruṣāṇyavocaḥ /
rājāno vā yadi vā rājaputrā balena mattāḥ pañcatāṃ prāpnuvanti //
vaiśampāyana uvāca /

etāvaduktvā prayayurhi śīghraṃ tānyeva vartmānyanuvartamānāḥ /
muhurmuhurvyālavaducchvasanto jyāṃ vikṣipantaśca mahādhanurbhyaḥ //

tato'paśyaṃstasya sainyasya reṇu- muddhūtaṃ vai vājisvurapraṇunnam /
padātīnāṃ madhyagataṃ ca dhaumyaṃ vikrośantaṃ bhīma pārthetyabhīkṣṇam //

te sāntvya dhaumyaṃ paridīnasatvāḥ sukhaṃ bhavānetviti rājaputrāḥ /
śyenā yathaivāmiṣasamprayuktā javena tatsainyamathābhyadhāvan //

teṣāṃ mahendropamavikramāṇāṃ saṃrabdhānāṃ dharṣaṇādyājñasenyāḥ /
krodhaḥ prajajvāla jayadrathaṃ ca dṛṣṭvā priyāṃ tasya rathe sthitāṃ ca //

pracukruśuścāpyatha sindhurājaṃ vṛkodaraścaiva dhanañjayaśca /
yamau ca rājā ca mahādhanurdharā- stato diśaḥ sammumuhuḥ pareṣām //