Mahabharata · Chapter 3.269

saroṣarāgopahatena valgunā sarāganetreṇa natonnatabhruvā /
mukhena visphūrya suvīrarāṣṭrapaṃ tato'bravīttaṃ drupadātmajā punaḥ //

yaśasvinastīkṣṇaviṣānmahārathā- nabhibruvanmūḍha na lajjase katham /
mahendrakalpānniratānsvakarmasu stitānsamūheṣvapi yakṣarakṣasām //

na kiñcidāryāḥ pravadanti pāpaṃ vanecaraṃvā gṛhamedhinaṃ vā /
tapasvinaṃ samparipūrṇavidyaṃ bhajanti caivaṃ sunarāḥ suvīra //

ahaṃ tu manye tava nāsti kaści- detādṛśe kṣatriyasanniveśe /
yastvadya pātālamukhe patantaṃ pāṇau gṛhītvā pratisaṃhareta //

nāgaṃ praminnaṃ girikūṭakalpa- mupatyakāṃ haimavatīṃ carantam /
daṇḍīva yūthādapasedhasi tvaṃ yo jetumāśaṃsasi dharmarājam //

bālyātprasuptasya mahābalasya siṃhas pakṣmāṇi mukhāllunāsi /
padā samāhatya palāyamānaḥ kruddhaṃ yadā drakṣyasi bhīmasenam //

mahābalaṃ ghorataraṃ pravṛddhaṃ jātaṃ hariṃ parvatakandareṣu /
prasuptamugraṃ prapadena haṃsi yaḥ kruddhamāyotsyasi jiṣṇumugram //

kṛṣṇoragau tīkṣṇamukhau dvijihvau mattaḥ padā krāmasi pucchadeśe /
yaḥ pāṇḍavābhyāṃ puruṣottamābhyāṃ jaghanyajābhyāṃ prayuyutsase tvam //

yathā ca veṇuḥ kadalī nalo vā phalantyabhāvāya na bhūtaye'tmanaḥ /
tathaiva māṃ taiḥ parirakṣyamāṇā- mādāsyase karkaṭakīva garbham //
jayadratha uvāca /

jānāmi kṛṣṇe viditaṃ mamaita- dyathāvidhāste naradevaputrāḥ /
na tvevametena vibhīṣaṇena śakyā vayaṃ trāsayituṃ tvayā'dya //

vayaṃ punaḥ saptadaśeṣu kṛṣṇe kuleṣu sarve'navameṣu jātāḥ /
ṣaḍbhyo guṇebhyo'bhyadhikā vihīnā nmanyāmahe draupadī pāṇḍuputrān //

sā kṣipramātiṣṭha gajaṃ rathaṃ vā na vākyamātreṇa vayaṃ hi śakyāḥ /
āśaṃsa vā tvaṃ kṛpaṇaṃ vadantī sauvīrarājasya punaḥ prasādam //
draupadyuvāca /

mahābalā kintviha durbaleva sauvīrarājasya matā'hamasmi /
nāhaṃ pramāthādiha sampratītā sauvīrarājaṃ kṛpaṇaṃ vadeyam //

yasyā hi kṛṣṇau padavīṃ caretāṃ samāsthitāvekarathe sametau /
indro'pitāṃ nāpaharetkathañci- nmanuṣyamātraḥ kṛpaṇaḥ kuto'nyaḥ //

yathā vikīṭī paravīraghātī nighnanrathastho dviṣatāṃ manāṃsi /
madantare tvaddhvajinīṃ praveṣṭā vakṣaṃ dahannagnirivoṣṇageṣu //

janārdanaḥ sāndhakavṛṣṇivīro maheṣvāsāḥ kekayāścāpi sarve /
ete hi sarve mama rājaputrāḥ prahṛṣṭarūpāḥ padavīṃ careyuḥ //

maurvīvisṛṣṭāḥ stanayitnughoṣā gāṇḍīvamuktāstvativegavantaḥ /
hastaṃ samāhatya dhanañjayasya bhīmāḥ śabdaṃ ghorataraṃ nadanati //

gāṇḍīvamuktāṃśca mahāśaraughān pataṅgasaṅghāniva śīghravegān /
yadā draṣṭāsyarjunaṃ vīryaśālinaṃ tadā svabuddhiṃ pratininditāsi //

saśaṅkhaghoṣaḥ satalatraghoṣo gāṇḍīvadhanvā muhurudvahaṃśca /
yadā śarānarpayitā tavorasi tadā manaste kimivābhaviṣyat //

gadāhastaṃ bhīmamabhidravantaṃ mādrīputrau sampatantau diśaśca /
amarṣajaṃ krodhaviṣaṃ vamantau dṛṣṭvā ciraṃ tāpamupaiṣyase'dhama //

yathā vā'haṃ nāticare kathañci- tpatīnmahārhānmanasā'pijātu /
tenādya satyena vaśīkṛtantvāṃ draṣṭāsmi pārthaiḥ parikṛṣyamāṇam //

na sambhramaṃ gantumahaṃ hi śakṣye tvayā nṛśaṃsena vikṛṣyamāṇā /
samāgatā'haṃ hi kurupravīraiḥ punarvanaṃ kāmyakamāgatā'smi //
vaiśampāyana uvāca /

ityevamuktastu sa sindhunātha- stāṃ draupadīmāhaviśālanetrām /
āruhyatāmāśu rathaṃ madīyaṃ mā tvāṃ valāddaupadikarṣayeham //

sā tānanuprekṣya viśālanetrā jighṛkṣamāṇānavabhartsayantī /
provāca mā mā spṛśateti bhītā dhaumyaṃ pracukrośa purohitaṃ sā //

jagrāha tāmuttaravastradeśe jayadrathastaṃ samavākṣipatsā /
tayā samākṣiptatanuḥ sa pāpaḥ papāta śākhīva nikṛttamūlaḥ //

pragṛhyamāṇā tu mahājavena muhurviniḥśvasya ca rājaputrī /
sā mṛṣyamāṇā rathamāruroha dhaumyasya pādāvabhivādya kṛṣṇā //
dhaumya uvāca /

neyaṃ śakyā tvayā netumavijitya mahārathān /
dharmaṃ kṣatras paurāṇamavekṣasva jayadratha //

kṣudraṃ kṛtvāphalampāpaṃ tvaṃ prāpsyasi na saṃśayaḥ /
āsādya pāṇḍavānvīrāndharmarājapurogamān //
vaiśampāyana uvāca /

ityuktavāhriyamāṇāṃ tāṃ rājaputrīṃ yaśasvinīm / anvagacchattadā dhaumyaḥ padātigaṇamadhyagaḥ //