Mahabharata · Chapter 3.268

tathā'sīneṣu sarveṣu teṣu rājasu bhārata /
koṭikāśyo jagāmāśu sindhurājaniveśanam //

yaduktaṃ kṛṣṇayā sārdhaṃ tatsarvaṃ pratyavedayat /
koṭikāśyavacaḥ śrutvā śaibyaṃ sauvīrako'bravīt //

yadā vācaṃ vyāharantyāmasyāṃ me ramate manaḥ /
sīmantinīnāṃ sukhyāyāṃ vinivṛttaḥ kathaṃ bhavān //

etāṃ dṛṣṭvā striyo me'nyā yathā śākhāmṛgastriyaḥ /
pratibhānti mahābāho satyametadbravīmi te //

darśanādeva hi manastayā me'pahṛtaṃ bhṛśam /
tāṃ samācakṣva kalyāṇīṃ yadi syācchaibya mānuṣī //
koṭika uvāca /

eṣā vai draupadī kṛṣṇā rājaputrī yaśasvinī /
pañcānāṃ pāṇḍuputrāṇāṃ mahiṣī sammatā bhṛśam //

sarveṣāṃ caiva pārthānāṃ priyā bahumatā satī /
tayā sametya sauvīra sauvīrābhimukho vraja //
vaiśampāyana uvāca /

evamuktaḥ pratyuvāca paśyāmi draupadīmiti /
patiḥ sauvīrasindhūnāṃ duṣṭabhāvo jayadrathaḥ //

sa praviśyāśramaṃ puṇyaṃ siṃhagoṣṭhaṃ vṛko yathā /
ātmanā saptamaḥ kṛṣṇāmidaṃ vacanamabravīt //

kuśalaṃ te varārohe bhartāraste'pyanāmayāḥ /
yeṣāṃ kuśalakāmāsi te'pikaccidanāmayāḥ //
draupadyuvāca /

api te kuśalaṃ rājanrāṣṭre kośe bale tathā / kaccidekaḥ śibīnāḍhyānsauvīrānsaha sindhubhiḥ /
anutiṣṭhasi dharmeṇa ye cānye viditāstvayā //

kauravyaḥ kuśalī rājā kuntīputro yudhiṣṭhiraḥ /
ahaṃ ca bhrātaraścāsya yāṃścānyānparipṛcchasi //

pādyaṃ pratigṛhāṇedamāsanaṃ ca nṛpātmaja /
mṛgānvitā mṛgīścaiva prātarāśaṃ dadāni te //

aiṇeyānpṛṣatānnyaṅkūnhariṇāñśarabhāñśaśān /
ṛkṣāvrurūñśambarāṃśca gavayāṃśca mṛgānbahūn //

varāhāmahiṣāṃścaiva yāścānyā mṛgajātayaḥ /
pradāsyati svayaṃ tubhyaṃ kuntīputro yudhiṣṭiraḥ //
jayadratha uvāca /

kuśalaṃ prātarāśasya sarvaṃ me ditsitaṃ tvayā /
ehi me rathamāroha sukhamāpnuhi kevalam //

gataśrīkānhṛtarājyānkṛpaṇāngatacetasaḥ /
araṇyavāsinaḥ pārthānnānuroddhuṃ tvamarhasi //

naiva prājñā gataśrīkaṃ bhartāramupayuñjate /
yuñjānamanuyuñjīta na śariyaḥ sankṣaye vaset //

śriyā vihīnā rāṣṭrācca vinaṣṭāḥ śāśvatīḥ samāḥ /
alaṃ te pāṇḍuputrāṇāṃ bhaktyā kleśamupāsitum //

bhāryā me bhava suśroṇi tyajainānmukhamāpnuhi /
akhilānsindhusauvīrānāpnuhi tvaṃ mayā saha //
vaiśampāyana uvāca /

ityuktā sindhurājena vākyaṃ hṛdayakampanam /
kṛṣṇā tasmādapākrāmaddeśātsabhrukuṭīmukhī //

avamatyāsya tadvānkyamākṣipya ca sumadhyamā /
maivamityabravītkṛṣṇā lajjasveti ca saindhavam //

sā kāṅkṣamāṇā bhartṛṇāmupayātamaninditā /
vilambayāmāsa paraṃ vākyairvākyāni yuñjatī //
draipadyuvāca /

naivaṃ vada mahābāho nyāyyaṃ tvaṃ na ca manyase /
pāṇḍūnāṃ dhārtarāṣṭrāṇāṃ svasā caiva kanīyasī //

duśśalā nāma tasyāstvaṃ bhartā rājakulodvaha /
mama bhrātā ca nyāyyena tvayā rakṣyā mahāratha //

dharmiṣṭhānāṃ kule jāto na dharmaṃ tvamavekṣase /
ityuktaḥ sindhurājotha vākyamuttaramabravīt //

rājñāṃ dharmaṃ na jānīṣe striyo ratnāni caiva hi /
sādhāraṇāni loke'sminpravadanti manīṣiṇaḥ //

svasā ca svasriyā caiva bhrātṛbhāryā tathaiva ca / sukhaṃ gṛhṇanti rājānastāśca tatra nṛpodbhavāḥ //