Mahabharata · Chapter 3.26

vasatsu vai dvaitavane pāṇḍaveṣu mahātmasu /
anukīrṇaṃ mahāraṇyaṃ brāhmaṇaiḥ samapadyata //

īryamāṇena satataṃ brahmaghoṣeṇa sarvaśaḥ /
brahmalokasamaṃ puṇyamāsīddvaitavanaṃ saraḥ //

yajuṣāmṛcāṃ sāmnāṃ ca gadyānāṃ caiva sarvaśaḥ /
āsīduccāryamāṇānāṃ niḥsvano hṛdayangamaḥ //

jyāghoṣaścaiva pārthānāṃ brahmaghoṣaśca dhīmatām /
saṃsṛṣṭaṃ brahmaṇā kṣatraṃ bhūya eva vyarocata //

athābravīdbako dālbhyo dharmarājaṃ yudhiṣṭhiram /
sandhyāṃ kaunteyamāsīnamṛṣibhiḥ parivāritam //

paśya dvaitavane pārtha brāhmaṇānāṃ tapasvinām /
homavelāṃ kuruśreṣṭha samprajvalitapāvakām //

caranti dharmaṃ puṇye'smiṃstvayā guptā dhṛtavratāḥ /
bhṛgavo'ṅgirasaścaiva vāsiṣṭhāḥ kāśyapaiḥ saha //

āgastyāśca mahābhāgā ātreyāścottamavratāḥ /
sarvasya jagataḥ śreṣṭhā brāhmaṇāḥ sangatāstvayā //

idaṃ tu vacanaṃ pārtha śṛṇvekāgramanā mama /
bhrātṛbhiḥ saha kaunteya yattvāṃ vakṣyāmi kaurava //

brāhma kṣatreṇa saṃsṛṣṭaṃ kṣatraṃ ca brahmaṇā saha /
udīrṇe dahataḥ śatrūnvanānīvāgnimārutau //

nābrāhmaṇastāta ciraṃ bubhūṣe- dicchannamaṃ lokamamuṃ ca jetum /
vinītadharmārthamapetamohaṃ labdhvā dvijaṃ hanti nṛpaḥ sapatnān //

carannaiśreyasaṃ dharmaṃ prajāpālanakāritam /
nādhyagacchadbalirloke tīrthamanyatra vai dvijāt //

anūnamāsīdasurasya kāmai- vairocaneḥ śrīrapi cākṣayā'sīt /
labdhvā mahīṃ brāhmaṇasamprayogā- tteṣvācaranduṣṭamayatho vyanaśyat //

nābrāhmaṇaṃ bhūmiriyaṃ sabhūti- rvarṇaṃ dvitīyaṃ bhajate cirāya /
samudranemirnamate tu tasmai yaṃ brāhmaṇaḥ śāsti nayairvinītam //

kuñcarasyeva sangrāme parigṛhyāṅkuśagraham /
brāhmāṇairviprahīnasya kṣatrasya kṣīyate balam //

brāhmaṇyanupamā dṛṣṭiḥ kṣātramapratimaṃ balam /
tau yadā carataḥ sārdhaṃ tadā lokaḥ prasīdatī //

yathā hi sumahānagniḥ kakṣaṃ dahati sānilaḥ /
tathā dahati rājanyo brāhmaṇena samaṃ ripum //

brāhmaṇeṣveva medhāvī buddhiparyeṣaṇaṃ caret /
alabdhasya ca lābhāya labdhasya parivṛddhaye //

alabdhalābhāya ca labdhavṛddhaye / yathārhatīrthapratipādanāya /
yaśasvinaṃ vedavidaṃ vipaścitaṃ bahuśruṃ brāhmaṇameva vāsayet //

brāhmaṇeṣūttamā bhaktistava nityaṃ yudhiṣṭhira /
tena te sarvalokeṣu dīpyate prathitaṃ yaśaḥ //
vaiśampāyana uvāca /

tataste brāhmaṇāḥ sarve bakaṃ dālbhyamampūjayan /
yudhiṣṭhiraṃ stūyamāne bhūyaḥ sumanaso'bhavan //

dvaipāyano nāradaśca jāmadagnyaḥ pṛthuśravāḥ /
indradyumno bhālukiśca kṛtacetāḥ sahasrapāt //

karṇaśravāśca muñjaśca lavaṇāśvaśca kāśyapaḥ /
hārītaḥ sthūṇakarṇaśca agniveśyo'tha śaunakaḥ //

kṛtavākca suvāścaiva bṛhadaśco vibhāvasuḥ /
ūrdhvaretā vṛṣāmitraḥ suhotro hotravāhanaḥ //

ete cānye ca bahavo brāhmaṇāḥ saṃśitavratāḥ / ajātaśatrumānarcuḥ purandaramivarṣayaḥ //