Mahabharata · Chapter 3.25

tatkānanaṃ prāpya narendraputrāḥ sukhocitā vāsamupetya kṛcchram /
vijahrurinadrapratimāḥ śiveṣu sarasvatīsālavaneṣu teṣu //

yatīṃśca rājā sa munīṃśca sarvāṃ stasminvane mūlaphalairudagraiḥ /
dvijātimukhyānṛṣabhaḥ kurūṇāṃ santarpayāmāsa mahānubhāvaḥ //

iṣṭīśca pitryāṇi tathā kriyāśca mahāvane vasatāṃ pāṇḍavānām /
purohitastatra samṛddhatejā- ścakāra dhaumyaḥ pitṛvannṛpāṇām //

apetya rāṣṭrādvasatāṃ tu teṣā- mṛṣiḥ purāṇo'tithirājagāma /
tamāśramaṃ tīvrasamṛddhatejā mārkaṇḍeyaḥ śrīmatāṃ pāṇḍavānām //

tamāgataṃ jvalitahutāśanaprabhaṃ mahāmanāḥ kuruvṛṣabho yudhiṣṭhiraḥ /
apūjayatsuraṛṣimānavārcitaṃ mahāmuniṃ hyanupamasatvavīryavān //

sa sarvaviddraupadīṃ vīkṣya dīnāṃ yudhiṣṭiraṃ bhīmasenārjunau ca /
saṃsmṛtyarāmaṃ manasā mahātmā tapasvimadhye'smayatāmitaujāḥ //

taṃ dharmarājo vimanā ivābravī- tsarve hriyā santi tapasvino'mī /
bhavānidaṃ kiṃ smayatīva hṛṣṭa- stapasvināṃ paśyatāṃ māmudīkṣya //
mārkaṇḍeya uvāca /

na tāta hṛṣyāmi na ca smayāmi praharṣajo māṃ bhajatena darpaḥ /
tavāpadaṃ tvadya samīkṣya rāmaṃ satyavrataṃ dāśarathiṃ smarāmi //

sa cāpi rājā saha lakṣmaṇena vane nivāsaṃ pitureva śāsanāt /
dhanvī caranpārtha mayaiva dṛṣṭo gire purā ṛṣyamūkasya sānau //

sahasranetrapratimo mahātmā yamasya netā namuceśca hantā /
piturnideśādanaghaḥ svadharmaṃ caranvane dāśarathiścakāra //

sa cāpi śakras samaprabhāvo mahānubhāvaḥ samareṣvajeyaḥ /
vihāya bhogānacaradvaneṣu neśe balasyeti caredadharmam //

bhāpāśca nābhāgabhagīrathādayo mahīmimāṃ sāgarāntāṃ vijitya /
satyena te'pyajayastāta lokā- nneśe balasyeti caredadharmam //

alarkamāhurnavarya santaṃ satyavrataṃ kāśikarūśarājam /
vihāya rājyāni vasūni caiva neśe balasyeti caredadharmam //

dhātrā vidhiryo vihitaḥ purāṇai- staṃ pūjayanto naravarya santaḥ /
saptarṣayaḥ pārtha divi prabhānti neśe balasyeti caredadharmam //

mahābalānparvatakūṭamātrā- nviṣāṇinaḥ paśya gajānnarendra /
sthitānnideśe naravarya dhātu- rneśe balasyeti caredadharmam //

sarvāṇi bhūtāni narendra paśya tathā yathāvadvihitaṃ vidhātrā /
svayonitaḥ karma sadācaranti nese balasyeti caredadharmam //

satyenaṃ dharmeṇa yathārhavṛttyā hriyā tathā sarvabhūtānyatītya /
yaśaśca tejaśca tavāpi dīptaṃ vibhāvasorbhāskarasyeva pārta //

yathāpratijñaṃ ca mahānubhāva kṛcchraṃ vane vāsamimaṃ nirūṣya /
tataḥ śriyaṃ tejasā tena dīptā- mādāsvase pārthiva kaurevabhyaḥ //
vaiśampāyana uvāca /

tamevamuktvā vacanaṃ maharṣi- stapasvimadhye sahitaṃ suhṛddhiḥ /
āmantrya dhaumyaṃ sahitāṃśca pārthāṃ- stataḥ pratasthe diśamuttarāṃ saḥ //