Mahabharata · Chapter 3.27

tato vanagatāḥ pārthāḥ sāyāhne saha kṛṣṇayā /
upaviṣṭāḥ kathāścakrurduḥkhaśokaparāyaṇāḥ //

priyā ca darśanīyā ca paṇḍitā ca pativratā /
atha kṛṣṇā dharmarājamidaṃ vacanamabravīt //
draupadyuvāca /

na nūnaṃ tasya pāpasya duḥkhamasmāsu kiñcana /
vidyate dhārtarāṣṭrasya nṛśaṃsasya durātmanaḥ //

yastvāṃ rājanmayā sārdhamajinaiḥ prativāsitam /
vanaṃ prasthāpya duṣṭātmā nānvatapyata durmatiḥ //

āyasaṃ hṛdayaṃ nūnaṃ tasya duṣkṛtakarmaṇaḥ / yastvāṃ dharmaparaṃ śreṣṭhaṃ rūkṣāṇyaśrāvayattadā /
vacanānyaparokṣāṇi durvācyāni ca saṃsadi //

sukhocitamaduḥkhārhaṃ durātmā sasuhṛdgaṇaḥ /
īdṛśaṃ duḥkhamānīya modate pāpapūruṣaḥ //

caturṇāmeva pāpānāmasraṃ na patitaṃ tadā /
tvayi bhārata niṣkrānte vanāyājinavāsasi //

duryodhanasya karṇasya śakuneśca durātmanaḥ /
durbhrātustasya cograsya rājanduḥkhaśāsanasya ca //

itareṣāṃ tu sarveṣāṃ kurūṇāṃ kurusattama /
duḥkhenābhiparītānāṃ netrebhyaḥ prāpatajjalam //

idaṃ ca śayanaṃ dṛṣṭvā yaccāsītte purātanam /
śocāmitvāṃ mahārājaduḥkhānarhaṃsukhocitam //

dāntaṃ yacca sabhāmadhya āsanaṃ ratnabhūṣitam /
dṛṣṭvā kuśabṛśīṃ cemāṃ śoko māṃ dārayatyayam //

yadapaśyaṃ sabhāyāṃ tvāṃ rājabhiḥ parivāritam /
tacca rājannapaśyantyāḥ kā sāntirhṛdayasyame //

yā tvā'hraṃ candanādigdhamapaśyaṃ sūryavarcasam /
sā tvāṃ paṅkamalādigdhaṃ dṛṣṭvā muhyāmi bhārata //

yā tvā'haṃ kauśikairvastraiḥ śubhrairācchāditaṃ purā /
dṛṣṭavatyasmirājenad्ra sā'dya paśyāmi cīriṇam //

yacca tadrukmapātrībhirbrāhmaṇebhyaḥ sahasraśaḥ /
hriyate te gṛhādannaṃ saṃskṛtaṃsārvakāmikam //

yatīnāmagṛhāṇāṃ te tathaiva gṛhamedhinām /
dīyate bhojanaṃ rājannatīva guṇavatprabho //

satkṛtāni sahasrāṇi sarvakāmaiḥ purā gṛhe / sarvakāmaiḥ suvihitairyadapūjayathā dvijān /
tacca rājannapaśyantyāḥ kā śāntirhṛdayasya me //

yatte bhrātṝnmahārāja yuvāno mṛṣṭakuṇḍalāḥ /
abhojayanta mṛṣṭānnaiḥ sūdāḥ paramasaṃskṛtaiḥ //

sarvāṃstānadya paśyāmi vane vanyena jīvinaḥ /
aduḥkhārhānmanuṣyendra nopaśāmyati me manaḥ //

bhīmasenamimaṃ cāpi duḥkhitaṃ vanavāsinam /
dhyāyataḥ kiṃ na manyuste prāpte kāle vivardhate //

bhīmasenaṃ hi karmāṇi svayaṃ kurvāṇamacyutam /
sukhārhaṃ duḥkhitaṃ dṛṣṭvā kasmādrājannupekṣase //

satkṛtaṃ vividhairyānairvastrairuccāvacaistathā /
taṃ te vanagataṃ dṛṣṭvā kasmānmanyurna vardhate //

ayaṃ kurūnraṇe sarvānhantumutsahate prabhuḥ /
tvatpratijñāṃ pratīkṣaṃstu sahate'yaṃ vṛkodaraḥ //

yo'rjunenārjunastulyo dvibāhurbahubāhunā /
śarātisarge śīghratvātkālāntakayamopamaḥ //

yas śastrapratāpena praṇatāḥ sarvapārthivāḥ /
yajñe tava mahārāja brāhmaṇānupatasthire //

tamimaṃ puruṣavyāghraṃ pūjitaṃ devadānavaiḥ /
dhyāyantamarjunaṃ dṛṣṭvā kasmādrājanna kupyasi //

dṛṣṭvā vanagataṃ pārthamaduḥkhārhaṃ sukhocitam /
na ca tevardhate manyustena muhyāmi bhārata //

yo devāṃśca manuṣyāṃśca sarpāṃścaikaratho'jayat /
taṃ te vanagataṃ dṛṣṭvā kasmānmanyurna vardhate //

yo yānairadbhutākārairhayairnāgaiśca saṃvṛtaḥ /
prasahya vittānyādatta pārthivebhyaḥ parantapa //

kṣipatyekena vegena pañcabāṇaśatāni yaḥ /
taṃ te vanagataṃ dṛṣṭvā kasmānmanyurna vardhate //

śyāmaṃ bṛhantaṃ taruṇaṃ carmiṇāmuttamaṃ raṇe /
nakulaṃ te vane dṛṣṭvā kasmānmanyurna vardhate //

darśanīyaṃ ca śūraṃ ca mādrīputraṃ yudhiṣṭhira / 3-27-32bsahadevaṃ vane dṛṣṭvā kasmātkṣamasi pārthiva //

nakulaṃ sahadevaṃ ca dṛṣṭvā te duḥkhitāvubhau /
aduḥkhārhau manuṣyendra kasmānmanyurna vardhate //

drupadasya kule jātāṃ snuṣāṃ pāṇḍormahātmanaḥ / dhṛṣṭadyumnasya bhaginīṃ vīrapatnīmanuvratām /
māṃ vai vanagatāṃ dṛṣṭvā kasmātkṣamasi pārthiva //

nūnaṃ ca tava naivāsti manyurbharatasattama /
yatte bhrātṝṃśca māṃ caiva dṛṣṭvā navyathate manaḥ //

na nirmanyuḥkṣatriyo'sti loke nirvacanaṃ smṛtam /
tadadya tvayi paśyāmi kṣatriye viparītavat //

yo na darśayate tejaḥ kṣatriyaḥ kāla āgate /
sarvabhūtāni taṃ pārtha sadā paribhavantyuta //

tattvayā na kṣamā kāryā śatrūnprati kathañcana /
tejasaiva hi te śakyā nihantuṃ nātra saṃśayaḥ //

tathaiva yaḥ kṣamākāle kṣatriyo nopaśāmyati / apriyaḥ sarvabhūtānāṃ somutreha ca naśyati //