મહાભારત · અધ્યાય 3.26

વસત્સુ વૈ દ્વૈતવને પાણ્ડવેષુ મહાત્મસુ ।
અનુકીર્ણં મહારણ્યં બ્રાહ્મણૈઃ સમપદ્યત ॥

ઈર્યમાણેન સતતં બ્રહ્મઘોષેણ સર્વશઃ ।
બ્રહ્મલોકસમં પુણ્યમાસીદ્દ્વૈતવનં સરઃ ॥

યજુષામૃચાં સામ્નાં ચ ગદ્યાનાં ચૈવ સર્વશઃ ।
આસીદુચ્ચાર્યમાણાનાં નિઃસ્વનો હૃદયન્ગમઃ ॥

જ્યાઘોષશ્ચૈવ પાર્થાનાં બ્રહ્મઘોષશ્ચ ધીમતામ્ ।
સંસૃષ્ટં બ્રહ્મણા ક્ષત્રં ભૂય એવ વ્યરોચત ॥

અથાબ્રવીદ્બકો દાલ્ભ્યો ધર્મરાજં યુધિષ્ઠિરમ્ ।
સન્ધ્યાં કૌન્તેયમાસીનમૃષિભિઃ પરિવારિતમ્ ॥

પશ્ય દ્વૈતવને પાર્થ બ્રાહ્મણાનાં તપસ્વિનામ્ ।
હોમવેલાં કુરુશ્રેષ્ઠ સમ્પ્રજ્વલિતપાવકામ્ ॥

ચરન્તિ ધર્મં પુણ્યેઽસ્મિંસ્ત્વયા ગુપ્તા ધૃતવ્રતાઃ ।
ભૃગવોઽઙ્ગિરસશ્ચૈવ વાસિષ્ઠાઃ કાશ્યપૈઃ સહ ॥

આગસ્ત્યાશ્ચ મહાભાગા આત્રેયાશ્ચોત્તમવ્રતાઃ ।
સર્વસ્ય જગતઃ શ્રેષ્ઠા બ્રાહ્મણાઃ સન્ગતાસ્ત્વયા ॥

ઇદં તુ વચનં પાર્થ શૃણ્વેકાગ્રમના મમ ।
ભ્રાતૃભિઃ સહ કૌન્તેય યત્ત્વાં વક્ષ્યામિ કૌરવ ॥

બ્રાહ્મ ક્ષત્રેણ સંસૃષ્ટં ક્ષત્રં ચ બ્રહ્મણા સહ ।
ઉદીર્ણે દહતઃ શત્રૂન્વનાનીવાગ્નિમારુતૌ ॥

નાબ્રાહ્મણસ્તાત ચિરં બુભૂષે- દિચ્છન્નમં લોકમમું ચ જેતુમ્ ।
વિનીતધર્માર્થમપેતમોહં લબ્ધ્વા દ્વિજં હન્તિ નૃપઃ સપત્નાન્ ॥

ચરન્નૈશ્રેયસં ધર્મં પ્રજાપાલનકારિતમ્ ।
નાધ્યગચ્છદ્બલિર્લોકે તીર્થમન્યત્ર વૈ દ્વિજાત્ ॥

અનૂનમાસીદસુરસ્ય કામૈ- વૈરોચનેઃ શ્રીરપિ ચાક્ષયાઽસીત્ ।
લબ્ધ્વા મહીં બ્રાહ્મણસમ્પ્રયોગા- ત્તેષ્વાચરન્દુષ્ટમયથો વ્યનશ્યત્ ॥

નાબ્રાહ્મણં ભૂમિરિયં સભૂતિ- ર્વર્ણં દ્વિતીયં ભજતે ચિરાય ।
સમુદ્રનેમિર્નમતે તુ તસ્મૈ યં બ્રાહ્મણઃ શાસ્તિ નયૈર્વિનીતમ્ ॥

કુઞ્ચરસ્યેવ સન્ગ્રામે પરિગૃહ્યાઙ્કુશગ્રહમ્ ।
બ્રાહ્માણૈર્વિપ્રહીનસ્ય ક્ષત્રસ્ય ક્ષીયતે બલમ્ ॥

બ્રાહ્મણ્યનુપમા દૃષ્ટિઃ ક્ષાત્રમપ્રતિમં બલમ્ ।
તૌ યદા ચરતઃ સાર્ધં તદા લોકઃ પ્રસીદતી ॥

યથા હિ સુમહાનગ્નિઃ કક્ષં દહતિ સાનિલઃ ।
તથા દહતિ રાજન્યો બ્રાહ્મણેન સમં રિપુમ્ ॥

બ્રાહ્મણેષ્વેવ મેધાવી બુદ્ધિપર્યેષણં ચરેત્ ।
અલબ્ધસ્ય ચ લાભાય લબ્ધસ્ય પરિવૃદ્ધયે ॥

અલબ્ધલાભાય ચ લબ્ધવૃદ્ધયે । યથાર્હતીર્થપ્રતિપાદનાય ।
યશસ્વિનં વેદવિદં વિપશ્ચિતં બહુશ્રું બ્રાહ્મણમેવ વાસયેત્ ॥

બ્રાહ્મણેષૂત્તમા ભક્તિસ્તવ નિત્યં યુધિષ્ઠિર ।
તેન તે સર્વલોકેષુ દીપ્યતે પ્રથિતં યશઃ ॥
વૈશમ્પાયન ઉવાચ ।

તતસ્તે બ્રાહ્મણાઃ સર્વે બકં દાલ્ભ્યમમ્પૂજયન્ ।
યુધિષ્ઠિરં સ્તૂયમાને ભૂયઃ સુમનસોઽભવન્ ॥

દ્વૈપાયનો નારદશ્ચ જામદગ્ન્યઃ પૃથુશ્રવાઃ ।
ઇન્દ્રદ્યુમ્નો ભાલુકિશ્ચ કૃતચેતાઃ સહસ્રપાત્ ॥

કર્ણશ્રવાશ્ચ મુઞ્જશ્ચ લવણાશ્વશ્ચ કાશ્યપઃ ।
હારીતઃ સ્થૂણકર્ણશ્ચ અગ્નિવેશ્યોઽથ શૌનકઃ ॥

કૃતવાક્ચ સુવાશ્ચૈવ બૃહદશ્ચો વિભાવસુઃ ।
ઊર્ધ્વરેતા વૃષામિત્રઃ સુહોત્રો હોત્રવાહનઃ ॥

એતે ચાન્યે ચ બહવો બ્રાહ્મણાઃ સંશિતવ્રતાઃ । અજાતશત્રુમાનર્ચુઃ પુરન્દરમિવર્ષયઃ ॥