Mahabharata · Chapter 3.259

duryodhanaṃ mokṣayitvā pāṇḍuputrā mahābalāḥ /
kimakārṣurvane tasmiṃstanmamākhyātumarhasi //
vaiśampāyana uvāca /

tataḥ śayānaṃ kaunteyaṃ rātrau dvaitavana mṛgāḥ /
svapnānte darśayāmāsurbāṣpakaṇṭhā yudhiṣṭhiram //

tānabravītsa rājendro vepamānānkṛtāñjalīn /
brūta yadvaktukāmāḥ stha ke bhavantaḥ kimiṣyate //

evamuktāḥ pāṇḍavena kaunteyena yaśasvinā /
pratyabruvanmṛgāstatrahataśeṣā yudhiṣṭhiram //

vayaṃ mṛgā dvaitavane hataśiṣṭāstu bhārata /
notsīdema mahārāja kriyatāṃ vāsaparyayaḥ //

bhavanto bhrātaraḥ śūrāḥ sarva evāstrakovidāḥ /
kulānyalpāvaśiṣṭāni kṛtavanto vanaukasām //

bījabhūtā vayaṃ kecidavaśiṣṭā mahāmate /
vivardhemahi rājendra prasādātte yudhiṣṭhira //

tānvepamānānvitrastānbījamātrāvaśeṣitān /
mṛgāndṛṣṭvā suduḥkhārto dharmarājo yudhiṣṭhiraḥ //

tāṃstathetyabravīdrājā sarvabhūtahite rataḥ /
yathā bhavanto bruvate kariṣyāmi ca tattathā //

ityevaṃ pratibuddhaḥ sa rātryante rājasattamaḥ /
abravītsahitānbhrātṝndayāpanno mṛgānprati //

ukto rātrau mṛgairasmi svapnānte hataśeṣitaiḥ /
tanubhūtāḥ sma bhadraṃ te dayā naḥ kriyatāmiti //

te satyamāhuḥ kartavyā dayā'smābhirvanaukasām /
sāṣṭamāsaṃ hi no varṣaṃ yadenānupayunkṣmahe //

punarvahumṛgaṃ ramyaṃ kāmyakaṃ kānanottamam /
tatremāṃ vasatiṃ śiṣṭāṃ viharanto ramemahi //
vaiśampāyana uvāca /

tataste pāṇḍavāḥ śīghraṃ prayayurdharmakovidāḥ //

brāhmaṇaiḥ sahitā rājanye ca tatrasahoṣitāḥ /
indrasenādibhiścaiva preṣyairanugatāstadā //

te yātvā susukhairmārgaiḥ svannaiḥ śucijalānvitaiḥ /
dadṛśuḥ kāmyakaṃ puṇyamāśramaṃ tāpasānvitam //

viviśuste sma kauravyā vṛtā viprarṣabhaistadā / tadvanaṃ bharataśreṣṭhāḥ svargaṃ sukṛtino yathā //