Mahabharata · Chapter 3.258

praviśantaṃ mahārāja sūtāstuṣṭuvuracyutam /
janāścāpi maheṣvāsaṃ tuṣṭuvū rājasattamam //

lājaiścandanacūrṇaiśca vikīrya ca janāstataḥ /
ūṭurdiṣṭyā nṛpāvighnaḥ samāptoyaṃ kratustava //

apare tvabruvaṃstatravādikāstaṃ mahīpatim /
yaudhiṣṭhirasya yajñasya na samo hyeṣa te kratuḥ //

naiva tasya kratoreṣa kalāmarhati ṣoḍaśīm /
evaṃ tatrābruvankecidvātikāstaṃ janeśvaram //

suhṛdastvabruvaṃstatra ati sarvānayaṃ kratuḥ /
pravartito hyayaṃ rājñā dhārtarāṣṭreṇa dhīmatā //

yayātirnahuṣaścāpi māndhātā bharatastathā /
kratumenaṃ samāhṛtya pūtāḥ sarve divaṃ gatāḥ //

etā vācaḥ śubhāḥ śṛṇvansuhṛdāṃ bharatarṣabha /
praviveśa puraṃ hṛṣṭaḥ svaveśma ca narādhipaḥ //

abhivādya tataḥ pādānmatāpitrorviśāmpate /
bhīṣmadroṇakṛpādīnāṃ vidurasya ca dhīmataḥ //

abhivāditaḥ kanīyobhirbhrātṛbhirbhrātṛnandanaḥ /
niṣasādāsane mukhye bhrātṛbhiḥ parivāritaḥ //

tamutthāya mahārājaṃ sūtaputro'bravīdvacaḥ /
diṣṭyā te bharataśreṣṭha samāpto'yaṃ mahākratuḥ //

hateṣu yudhi pārtheṣu rājasūye tathā tvayā /
āhṛte'haṃ naraśreṣṭha tvāṃ sabhājayitā punaḥ //

tamabravīnmahārājo dhārtarāṣṭro mahāyaśāḥ /

satyametattvayoktaṃ hi pāṇḍaveṣu durātmasu / nihateṣu naraśreṣṭha prāpte cāpi mahākratau /
rājasūye punarvīra tvamevaṃ vardhayiṣyasi //

evamuktvā mahārāja karṇamāśliṣya bhārata /
rājasūyaṃ kratuśreṣṭhaṃ cintayāmāsa kauravaḥ //

so'bravītkauravāṃścāpi pārśvasthānnṛpasattamaḥ /
rādheyasaubalādīnvai dhārtarāṣṭro mahīpatiḥ //

kadā tu taṃ kratuvaraṃ rājasūyaṃ mahādhanam /
nihatya pāṇḍavānsarvānāhariṣyāmi kauravāḥ //

tamabravīttadā karṇaḥ śṛṇu me rājakuñjara /
pādau na dhāvaye tāvadyāvanna nihato'rjunaḥ //

kīlālajaṃ na khādeyaṃ kariṣye cāsuravratam /
nāstīti naiva vakṣyāmi yācito yena kecanit //

athotkruṣṭaṃ maheṣvāsairdhārtarāṣṭrairmahārathaiḥ /
pratijñāte phalgunasya vadhe karṇena saṃyuge //

vijitāṃścāpyamanyanta pāṇḍavāndhṛtarāṣṭrajāḥ /
tadā pratijñāmāruhya sūtaputreṇa bhāṣite //

dūryodhano'pi rājendra visṛjyanarapuṅgavān /
praviveśa gṛhaṃśrīmānyathā caitrarathaṃ prabhuḥ //

te'pisarve maheṣvāsā jagmurveśmāni bhārata /
svānisvani mahārāja bhīṣmadroṇādayo nṛpā //

pāṇḍavāśca maheṣvāsā dūtavākyapracoditāḥ /
cintayantastamevārthaṃ nālabhanta sukhaṃ kvacit //

bhūyaśca cārai rājendra pravṛttirupapāditā /
pratijñā sūtaputarsya vijayasya vadhaṃ prati //

etacchrutvā dharmasutaḥ samudvigno narādhipa /
adhomukhaściraṃ tasthau kiṃ kāryamiti cintayan //

abhedyakavacaṃ matvā karṇamadbhutavikramam /
anusmaraṃś sankleśānna śāntimupajagmivān //

tasya cintāparītasya buddhirjajñe mahātmanaḥ /
bahuvyālamṛgākīrṇaṃ tyaktuṃ dvaitavanaṃ vanam //

dhārtarāṣṭro'pi nṛpatiḥ praśaśāsa vasundharām /
bhrātṛbhiḥ sahito vīrairbhīṣmadroṇakṛpaistathā //

sangamya sūtaputreṇa karṇenāhavaśobhinā /
satataṃ prīyamāṇo vai devinā saubalena ca //

duryodhanaḥ priye nityaṃ vartamāno mahībhṛtām /
pūjayāmāsa viprendrānkratubhirbhūridakṣiṇaiḥ //

bhrātṝṇāṃ ca priyaṃ rājansa cakāra parantapaḥ / niścitya manasā vīro dattabhuktaphalaṃ dhanam //